Korzym (UM/SN). Znata Korzymska terma je po połdralětnym zawrjenju wot minjeneho pjatka wopytowarjam zaso přistupna. Předsydźe zamołwiteho zaměroweho zwjazka Svenej Gabrielej je to přičina wjesela a dźakownosće. „Dźakuju so w prěnim rjedźe sobudźěłaćerjam, kotřiž su nam najebać zawrjenje a krótkodźěło swěrni wostali“, wón wu­zběhnje. Z něhdźe 30 přistajenymi bě kupjel do nuzoweje přestawki šła, z runje telko ludźimi su ju nětko zaso wotewrěli.

Koćinski Krabatowy mlokowy (MKH) swět drje je z wobłukom direktneho zwičnjenja swójskich wudźěłkow w kónčinje jónkrótne ratarske předewzaće, kotrež na konwencionelne wašnje zwěrjata plahuje. Stajnje witaja skupiny ludźi, kotrymž ratarski kołoběh nazornje pokazuja a rozkładuja, wšako je dołhi čas trěbny, prjedy hač kruwa mloko dawa. Dale móža so wopytowarjo wo tym přeswědčić, zo so ćelatam, jałojcam a dejkam derje dźe. Transparenca to, kotraž je wšeje česće hódna. Přiwšěm chce zawod hišće wjace činić a twari tuchwilu modernu hródź, hdźež budźe awtomatizacija wulku rólu přewzać. Komfort a zwěrjeće dobro stej při tym wažnej zaměraj. Nowa technika zaruča intensiwnišu kontrolu kruwow a ratarjo zamóža spěšnišo reagować, jelizo daty zwučene hódnoty njepokazuja. Runje tak změja burja wjace chwile so ze zwěrjatami zaběrać. Přikład z Koćiny pokaza, zo so tež w ratarstwje wjele hiba. To je dalša zmužita kročel! Bianka Šeferowa

Dobrošecy (SN/BŠe). Dowolnicy w Sakskej su njedawno swoje najwoblubowaniše přebywanišća wuzwolili. W kategoriji prózdninske bydlenje dóstanje tež hornjołužiski hosćićel titul „Lubušk hosći“. Woblubowane bydlenje je w Dobrošecach (Doberschütz) pola Malešec hnydom na kromje biosferoweho rezerwata Hornjołužiska hola a haty. Na wulkim třistronskim statoku su dwě separatnej bydleni a dowolowy domčk zarjadowane. Z hódnoćenjom 99 wot 100 móžnych dypkow zdoby sej Dobroščanski statok najlěpši wuslědk nominowanych, kaž Marketingowa towaršnosć Hornja Łužica-Delnja Šleska informuje. Tak njeje jenož najlěpše prózdninske bydlenje tudyšeje kónčiny, ale cyłeje Sakskeje.

Mějićelej statoka Heike Schulz a Jens Richter staj jara zbožownaj: „W juliju 2018 smój podpěru spěchowanskeho programa Leader přebywanišćo z cyłkownje šěsć łožemi wotewrěłoj. Wulke naprašowanje naju zmuži poskitk rozšěrić, a smój hač do lětušeje meje dalše přenocowanske móžnosće wutworiłoj. Titul je namaj wulki dźak hosći, ale tež pohon, dale z dobrym hosćićelom być.“

Roboter a kumštna inteligenca wažnej zakładaj za dalše wuwiće zawoda

Wjazońca (UM/SN). Předewzaće Trumpf tzwr we Wjazońcy ma swoje hłowne sy­dło w šwabskim Ditzingenje, přiwšěm nawodnistwo do stejnišća we Łužicy zaměrnje inwestuje. To potwjerdźichu na wčerawšej nowinarskej konferency, hdźež dźěše wo přichodne plany a hižo docpěte kompetency. „Wjazońca je naš kompetencny centrum, dźe-li wo awtomatizaciju“, rozłoži přitomnym jednaćel Wjazońčanskeho stejnišća Armin Brüchle. Awtomatizacija we łužiskim zawodźe dźě twori wažny zakład, zo ma skupina Trumpf stajnje dosć materiala.