Budyšin/Drježdźany (SN/BŠe). Rjemjeslniske zawody pytaja nuznje za wučomnikami, pandemija pak situaciju na powołanskich wikach dale přiwótřa. Wšako njejsu žane zarjadowanja powołanskeje orientacije móžne, hdźež bychu młodostni składnosć měli so ze zastupjerjemi předewzaćow abo rjemjeslniskich zjednoćenstwow rozmołwjeć. Zwisk k šulerjam pobrachuje, a přichodne wukubłanske lěto so hižo w lěću zahaji. „Dóstawamy wjele telefonatow staršich, šulerjow a poradźowarjow w praksy, kotřiž trjebaja poradźowanje“, praji jednaćelka Budyskeho wokrjesneho rjemjeslnistwa Sabine Gotscha-Schock. Wukubłanske městna su zdobom na internetnej stronje wopisane. „Tuchwilu so pola čłonow našich zjednoćenstwow za dalšimi swobodnymi městnami za lětsa a klětu prašamy“, wona informuje. Tak nastawaja aktualne lisćiny za kónčinu, wo kotrychž móža so zajimcy pola wokrjesneho rjemjeslnistwa wobhonić. Jednaćelce je ćežke połoženje wědome, ćim bóle wona namołwja so wosobinsce na akterow wobroćić.

Wot koronakrizy potrjechene su tež zawody, kotrež njetrjebachu swoje dźěło přetorhnyć, kaž ćišćernja Schiemenz w Choćebuzu. Zawod bě do wudyrjenja pandemije wulki dźěl swojich dochodow z plakatami za kina a z wabjenskim materialom za hosćency, turizm, kulturne institucije a zarjadowarjow nadźěłał, kaž jednaćel Frank Schiemenz (hlej wobraz) rozprawja. Loni srjedź měrca pak běchu wšitke předewzaća skazanki wróćo sćahnyli. Tak je firma 35 procentow wobrota přisadźiła. „Tajku stratu njemóžemy hižo nachwatać“, Schiemenz měni. Wón so nětko nadźija, zo wobmjezowanja bórze zběhnu a zo móže zaso „normalnje“ dźěłać. Foto: Michael Helbig

Lońše ličby přenocowanjow po cyłej Łužicy dopokazuja, kak turistiski wobłuk­ pod koronapandemiju ćerpi. Wšudźe pak hotuja so na nowu sezonu, kotraž ma ćim wuspěšniša być. Šansy za to su po wšěm zdaću jara dobre.

Budyšin (SN/BŠe). Lońše straty turistikarjow regiona koronapandemije dla nětko skónčnje tež w ličbach předleža. Marketingowa towaršnosć Hornja Łužica-Delnja Šleska (MGO) je so z nimi bliže zaběrała. Ličba absolutnych přenocowanjow hosći, kotřiž su loni do Hornjeje Łužicy přišli, leži pola 1 578 446, štož je 434 592 mjenje hač w rekordnym lěće 2019, hdźež bě wjac hač dwaj milionaj hosći w regionje přenocowało. MGO trochuje pobrachowace dochody na ně­hdźe 51,5 milionow eurow. Tale hoberska ličba nam wuwědomja, kak turistiski wobłuk ćerpi. Jara pozitiwnje pak hódnoći MGO wuwiće, zo ludźo dlěje w regionje přebywaja hač hewak. Tak je so tale přerězna ličba wot 2,6 na 2,9 dnjow powjetšiła. Zaměr­, přerěznje tři dny přebytka docpěć, je tuž bliski. Předewšěm campingownišća a poskićerjo dowolowych by­dlenjow registrowachu dlěše přebytki.

Truty maja bjezdwěla tež we Łužicy přichod. Před něšto dnjemi su Serbske Nowiny wo ruskim startupje VIRA tzwr w Choćebuzu rozprawjeli, kotryž na delnjołužiskim lětanišću Kopańce (Neuhausen) swoje truty za ćežkotransporty abo tež za wohnjowoborne zasadźenja testuje. Dźensa čitamy wo prócowanjach za perspektiwu Kamjenskeho lětanišća. Derje, zo na kromje Lessingoweho města wobstejacu infrastrukturu jenož njewobnowjeja, ale ju z kompetencnym centrumom za přichod wukmanjeja. Zarjadowanej testowej koridoraj do směra na Wojerecy k partnerej w strowotnistwje a do směra na Rychbach z ratarskim ćežišćom swědčitej wo tym, zo dźe wo dopóznaća we wšelakich wobłukach. Truty jako specifiski srědk awtonomneho lětanja su transportery přichoda. Wšako je zatykane dróhi njemyla. Tež w ratarstwje a lěsni­stwje móhli nadawki přewzać, za kotrež ža­noho čłowjeka za zwučenym wodźidłom a wobchadne puće njetrjebaš. Axel Arlt