Prewencija jara wažna
Přećiwo wupřestrěću afriskeje swinjaceje mrětwy zaměrnje wojuja
Budyšin (SN/BŠe). Afriska swinjaca mrětwa so dale a bóle po Braniborskej wupřestrěwa. Zaměrnje pytaja tam za zahinjenymi zwěrjatami, za čož wužiwaja mjez druhim trutowu techniku. Předewšěm w nocy je policajski helikopter z kameru zasadźeny, z kotrejž móža dźiwje swinje wuslědźić. Dotal su w zwjazkowym kraju 49 mortwych swini našli, kotrež strašny wirus w sebi mějachu. Poslednjej dwě namakachu we wokrjesu Sprjewja-Nysa. Tež we wokrjesu Wódra-Sprjewja su fachowcy šěsć mortwych dźiwich swinjow zwěsćili.
Wčera su dalši pomocnicy ze Saarbrückena do Braniborskeje přijěli, zo bychu za zahinjenej dźiwinu pytali. Šěsć wodźerjow ze swojimi psami je nětko we wokrjesu Sprjewja-Nysa zasadźenych. Schleswigsko-Holsteinska a Porynsko-Pfalcowska stej hižo pytanske jednotki do potrjechenych wokrjesow pósłałoj.
Wudźěłki maja zrozumjenje budźić
Kampanja „Wot hórnika k namórnikej“ wabi za dowolowu kónčinu łužiskeje jězoriny. Nětko su nowe wudźěłki nastali, z kotrymiž chce tamniši turistiski zwjazk na jónkrótnu krajinu skedźbnjeć, hdźež maja tež Serbja swoju domiznu.
Zły Komorow (AK/SN). Z hesłom „Wot hórnika k namórnikej“ wabi mjezy přesahowacy turistiski zwjazk Łužiska jězorina hižo wot lěta 2012 za nastawacu dowolowu kónčinu z cyłkownje 23 jězorami a pławnymi zwiskami. Změna wot hórnistwoweho rewěra k dowolowemu regionej steji w srjedźišću. Zhromadnje z agenturu „Die Piktografen“ w Grabinje (Finsterwalde) a z tekstowej dźěłarnju Uty Baumgarten w Nowej Wsy (Burgneudorf) je wot lońšeho oktobra wjele kreatiwnych ilustrowanych wudźěłkow kaž dopisnicow, imagowych kartkow, podłožkow, prospektow, wumolowanskich knižkow, planow a banerow nastało. Wažny partner w zwisku ze zwoprawdźenjom idejow bě tradiciske towarstwo Brunica Zły Komorow. Cyłkowne kóšty kampanje wučinjeja 49 000 eurow.
Sobudźěłaćerki a sobudźěłaćerjo Choćebuskeho zjawneho ...
Durje helikopterow wotewrjene byli
Ideje młodostnych chcedźa lětsa hišće zwoprawdźić
Wojerecy (SN/BŠe). Němska załožba dźěći a młodostnych (DKJS) namołwja młodostnych, so aktiwnje na procesu strukturneje změny wobdźělić. Sobotu tydźenja su k tomu młodźinske konferency pod hesłom misija 2038 přewjedli. Poprawom běchu zarjadowanja na štyri stejnišćach w Zhorjelcu, Lubiju, Złym Komorowje a Wojerecach předwidźane. Krótkodobnje přijědźechu zajimcy ze Złeho Komorowa do města nad Čornym Halštrowom a zetkachu so w tamnišej Kulturnej fabrice. Zaměr bě, prěnje konkretne projektne ideje za swoju domiznu zdźěłać, kotraž chce załožba financielnje a fachowje přewodźeć.
Wosebitosć bě, zo móžachu młodostni konferency tamnych stejnišćow z pomocu digitalneje techniki sćěhować a so mjez sobu wuměnjeć. Hladajo na koronapandemiju bě so DKJS za tajku wariantu zarjadowanja rozsudźiła.
Domchowaja kukuricu za silažu
Serbska kultura je inowaciski motor
Serbski lud je wažny kluč za wuspěšnu strukturnu změnu we Łužicy, rěka wuslědk projekta „Inowacija z tradiciju“. Slědźenišćo Center for Responsible Research and Innovation (CeRRI) Fraunhoferskeho instituta za dźěłowe hospodarstwo a organizaciju (IAO) je w nadawku Łužiskeho hospodarskeho regiona (WRL) potenciale Serbow za strukturnu změnu přepytowało.
Choćebuz (SN/at). Slědźerjo su na prěnjej runinje tři serbske inowaciske róle wudźěłali, kaž WRL w nowinskej zdźělence informuje: Serbski lud spleće Łužicu, twori identitu wutworjacu kótwicu a twari mosty. Ke kóždemu z tychle atributow su konkretne jednanske naćiski zdźěłali. Zdobom wuprajeja politice, wědomosći, hospodarstwu a towaršnosći poručenja, kak móhli serbske tradicije a hódnoty jako motor inowacije za strukturnu změnu we Łužicy wužiwać.
Karbonowe niće wuwić a produkować
Hamor (CK/SN). Při Hamorskej milinarni chcedźa přichodnje na polu lochkich twarskich maćiznow slědźić. Za to nochcedźa tam jenož labor natwarić, ale karbonowe niće w pilotowej připrawje tež produkować. Wotpowědny dokument wo tym su minjeny tydźeń sakski minister za regionalne wuwiće Thomas Schmidt (CDU) kaž tež zastupnicy łužiskeho energijoweho zastaraćela LEAG a Fraunhoferskeho instituta za mašinotwar a přeformowansku techniku podpisali (SN informowachu). „Kooperacija je přikład toho, kak móže dołho trajaca strukturna změna wupadać. Hamorej wotwěra so tak puć do noweje industrijneje doby“, statny minister Schmidt podšmórny.
W Slepom je so wčera něhdźe sto ludźi zetkało a so zhromadnje do ...
Dźěło so w běhu lět změniło
Hladajo na pjelnjenje jamow po hórnistwje je resursa woda bytostna. Dokelž pak smy wot njeje dźeń a wotwisniši, měli z njej jara zamołwiće wobchadźeć. Wosebita centrala je so minjene dwaceći lět wo to starała.
Zły Komorow (SN/BŠe). Łužiska a srjedźoněmska towaršnosć hórnistwoweho zarjadnistwa (LMBV) zhladowaše póndźelu na dwaj lětdźesatkaj wuspěšneho wodohospodarstwa we Łužicy. W zhromadnym dźěle ze zarjadami a institucijemi je LMBV docpěła, zo z wodu w hórnistwowej kónčinje zamołwiće wobchadźeja. Wudobywanje brunicy dźě je w zašłosći hladajo na wodowy etat swoje slědy zawostajiło. Tohodla je LMBV samozrozumliwje kompleksne nadawki přewzała.
