W Kulowje nadźijeja so noweho spěchowanskeho programa

Kulow (AK/SN). Swoje měšćanske srjedźišćo chce Kulow z pomocu měšćanskotwarskeho spěchowanskeho programa saněrować a wožiwić. K tomu prócuja so wo přiwzaće do programa Zwjazka a kraja za žiwe centrumy. Kaž měšćanska rada na swojim zašłym posedźenju wobzamkny, ma spěchowanski koncept za 20,3 hektary wulku płoninu w srjedźišću Kulowa płaćić. Tu chcedźa najwšelako­riše naprawy za cyłkownje wjace hač dwanaće milionow eurow zwoprawdźić. Dwě třećinje z toho móhli spěchowanske srědki być, třećinu by město same zapłaćić dyrbjało, kaž Martin Neumann wot Drježdźanskeje wuwićoweje towaršnosće STEG namjetowaše.

Dale wón poruči, zo měło so personalne městno za měšćanski management wutworić. Tajki fachowc by so na městnje wo wotewrjenske časy wobchodow, zarjadowanja, wukładne wokna a wob­sahowe prašenja starać móhł.