Krótkopowěsće (25.03.21)
Sejm noweli přihłosował
Drježdźany. Sakski krajny sejm je wčera nowelu rozhłosoweho statneho zrěčenja sćelaka MDR schwalił. Frakcije CDU, SPD a Zelenych hłosowachu za naćisk, Lěwica so hłosa wzda, AfD bě přećiwo tomu. Tež krajnej parlamentaj Durinskeje a Saksko-Anhaltskeje matej zrěčenju hišće přihłosować. Hakle potom je Serbam stajne městno w rozhłosowej radźe MDR skónčnje zaručene.
Hódnota znowa jasnje překročena
Budyšin. Po wčerawšej incidency pod 100 je RKI za Budyski wokrjes dźensa ze 123,4 zaso tajku nad rozsudnej hódnotu podał. Wokrjes pak chce nowe powšitkowne postajenje Sakskeje wočaknyć a hakle potom wo dalšim postupowanju rozsudźić. Wčera zwěsći wokrjes Budyšin 125 nowych natyknjenjow z koronawirusom, Zhorjelski wokrjes 121. Ličba padow z britiskej mutaciju wirusa powjetši so tam wo 14. Dźensniša incidenca po RKI je we wokrjesu Zhorjelc 159,5.
Nowu skóržbu zapodali
Krótkopowěsće (24.03.21)
Wo dalšim postupowanju rěčałoj
Budyšin. Budyski wokrjes měješe wčera po RKI třeći dźeń za sobu incidencnu hódnotu nad sto. Krajny rada Michael Harig chcyše so ze sakskim ministerskim prezidentom Michaelom Kretschmerom (wobaj CDU) wo postupowanju nowych wobmjezowanjow dla dorozumić. We wokrjesu rozprawjachu wo jědnaće dalšich natyknjenjach z koronawirusom a wo dźewjeć smjertnych padach. Po RKI wučinja incidenca tu dźensa 95,7.
Křižerjo dale čakaja
Drježdźany. Sakski ministerski prezident Michael Kretschmer (CDU) je we wobłuku nowinarskeje konferency wčera podšmórnył, zo ma „za prawe, infekcisku žołmu přez jutry złamać. Sakska je na to pokazana kaž lědma dalši kraj.“ Što to za křižerjow woznamjenja, wo tym „dyrbi so woměrje rěčeć. Njesmě pak žane zhromadźenje syłow ludźi być.“
Zwěrjo coowa „sej wupožčić“
Krótkopowěsće (23.03.21)
Mjenje natyknjenjow
Budyšin. W Budyskim wokrjesu informowaše strowotniski zarjad wčera wo třoch dalšich natyknjenjach z koronu a wo dalšim smjertnym padźe. Aktualnje je 634 schorjenych (-9). RKI poda dźensa incidencu 116,8. W Zhorjelskim wokrjesu zwěsćichu sydom nowoinfekcijow, jedna wosoba je zemrěła. Indicenca po RKI je tam dźensa 140,5.
Götz Schweighöfer zemrěł
Budyšin. Dźiwadźelnik Götz Schweighöfer je njedźelu 61lětny po ćežkej chorosći zemrěł. Wotrostł bě wón w Altenburgu, wot lěta 2000 do 2008 skutkowaše ze swójby dźiwadźelnikow pochadźacy w Budyskim Němsko-Serbskim ludowym dźiwadle. Mjez druhim hraješe Götz Schweighöfer Čorneho młynka w kruchu „Krabat“ a naposledk w Budyskim lětnim dźiwadle „Olsenbande“.
Žane zjawne mytowanje
Krótkopowěsće (22.03.21)
Wolóženja cofnjene
Zhorjelc. Po třoch dnjach za sobu z incidencu nad 100 je Zhorjelski wokrjes předwčerawšim z nowym powšitkownym postajenjom reagował. Wolóženja buchu cofnjene, kontakty zaso wobmjezowane. Wčera mějachu tam 36 nowonatyknjenjow z koronu, incidenca po RKI dźensa bě 165,8. Budyski wokrjes rozprawješe přez kónc tydźenja wo 223 dalšich infekcijach a wo smjertnymaj padomaj. RKI poda dźensa incidencu 123,8.
Kamjenska Boršć přiwzata
Berlin. Konferenca kulturnych ministrow krajow je minjeny pjatk rozsudźiła, Kamjensku Boršć do zwjazkoweho zapisa imaterielneho kulturneho namrěwstwa přiwzać. Před lětom bě Sakska ju jako jedyn z najwjetšich šulskich a domizniskich swjedźenjow swobodneho stata z wjace hač 300 lět trajacej tradiciju nominowała. Dohromady 20 nowych do nětko 126 zapisow wopřijaceje němskeje lisćiny imaterielneho kulturneho namrěwstwa su wobzamknyli.
Do Pólskeje žane ćahi njejězdźa
Krótkopowěsće (19.03.21)
Dalše mutacije wirusa
Budyšin. We wokrjesu Budyšin rozprawjachu wčera wo 62 dalšich koronanatyknjenjach. Z 238 podhladow na mutaciju wirusa bu 23 wobkrućenych, incidenca wučinješe 122,6, po RKI dźensa rano 92,1. 68 infekcijow mějachu wčera w Zhorjelskim wokrjesu. Ličba dopokazanych britiskich mutacijow je tam wo dźewjeć na 120 rozrostła, incidenca bě 142,45 a dźensa po RKI 132,2.
Pólsku jamu dale njerozšěrić
Drježdźany. Ze zhromadnym zjawnym listom namołwjeja Zwjazk za wobswět a přirodoškit Sakskeje (BUND), Zelena liga, Greenpeace Němskeje a organizacija Client Earth sakskeho ministerskeho prezidenta Michaela Kretschmera (CDU), skóržbu Čěskeje přećiwo wutwarej jamy Turów podpěrać. „Europske směrnicy dodźeržeć měło tež w zajimje Sakskeje być“, w spisu mjez druhim rěka.
Chcedźa lětak znowa wudać
Krótkopowěsće (18.03.21)
Widźomnje wjac natyknjenjow
Budyšin. Z wčera zwěsćenymi 78 koronainfekcijemi je sydomdnjowska incidenca w Budyskim wokrjesu na 115 rozrostła. Dwaj 78lětnaj pacientaj staj zemrěłoj, krajnoradny zarjad zdźěli. Wokrjes Zhorjelc registrowaše 111 dalšich natyknjenjow, pjeć smjertnych padow wot 22. februara do 10. měrca a incidencu 136,51. Techniskich problemow dla njeje Roberta Kochowy institut dźens dopołdnja žane ličby podał.
Pufrowe pasmo powjetšene
Budyšin. Rozšěrjaceje so afriskeje swinjaceje mrětwy dla je sakska krajna direkcija pufrowe pasmo zawrjeneje kónčiny powjetšiła. W Budyskim wokrjesu płaća z tym zwisowace rjadowanja za někotre wjesne dźěle gmejnow Wulka Dubrawa, Bukecy, Rakecy, Łaz, Malešecy, Radwor kaž tež za Sprjewiny Doł a město Wóspork, kaž krajnoradny zarjad zdźěli.
Mróčel na Marsu
Krótkopowěsće (17.03.21)
Incidenca zaso pod 100
Budyšin. Budyski wokrjes je wčera wo zwěsćenych dwanaće natyknjenjach z koronu informował. Ličba smjertnych padow rozrosće wo jedyn na 781. Strowotniski zarjad mjenowaše incidencu 109,33, RKI dźensa 83,4. Zhorjelski wokrjes rozprawješe wčera wo 71 nowoinfekcijach, wo dwěmaj smjertnymaj padomaj wot spočatka februara a wo incidency 119,20. RKI poda dźensa 97,3.
Chcedźa čěšćinu nawuknyć
Budyšin. Za lětnjej rěčnej kursaj čěšćiny w Praze a Českich Budějovicach je tuchwilu pjeć serbskich zajimcow. Štyrjo z nich měješe loni hižo připrajenje, jich kurs pak bě korony dla wupadnył. Tak chcedźa so lětsa wobdźělić. Jim přidruži so dalša požadarka, kaž Jadwiga Kaulfürstowa z Rěčneho centruma WITAJ zdźěli. Šesta wosoba ma tuchwilu status narunanskeje kandidatki.
Stela za Marju Grólmusec
Krótkopowěsće (16.03.21)
Europeada znowa přestorčena
Flensburg. FUEN jako wuhotowar europeady je wčera zdźělił, zo su so wona a korutanscy hosćićeljo turněra dojednali, europske koparske mišterstwa awtochtonych narodnych mjeńšin koronapandemije dla hakle klětu w lěću přewjesć. Koronawirusa dla njemóža so koparske wubranki, tež serbska, na turněr přihotować. We wobłuku europeady njebychu předpisy hygieny zaručić móhli.
Dźěl šćěpjenjow přetorhnyli
Budyšin. Šćěpjenja pře koronu ze serumom AstraZeneca su tež w Budyskim a Zhorjelskim wokrjesu přetorhnyli. Sakska ma so po poručenju Paula Ehrlichoweho instituta, po tym zo buchu pady z trombozu mozow w zwisku ze šćěpjenjom znate. Budyski wokrjes zwěsći wčera sydom nowonatyknjenjow. Incidenca wučinješe 107,66, po RKI dźensa rano 102,7. Wokrjes Zhorjelc je wčera štyri infekcije přizjewił a incidencu 109,21. Ta bě po wobličenju RKI dźensa rano 96,9.
Jednokolijowosć haći
Krótkopowěsće (15.03.21)
Incidenca po RKI 100 překročiła
Budyšin. Wo 209 dalšich natyknjenjach z koronu rozprawja Budyski wokrjes wot minjeneho pjatka hač do njedźele. Dotal mějachu tam 149 podhladow na mutaciju wirusa, w 14 padach su tajku dopokazali. Wčerawša incidenca wokrjesa bě 111,33, po RKI dźensa rano 105,8. Zhorjelski wokrjes je nastupajo incidencu po RKI dźensa ze 109,6 druhi dźeń za sobu nad sto. Wčera bě tam 28 infekcijow, incidenca wučinješe 110,4.
Bikulturny charakter sylnić
Podstupim. Wosebity wuběrk za strukturne wuwiće Łužicy Braniborskeho krajneho sejma je we wobłuku swojeho wirtuelnje wuhotowaneho 6. rjadneho posedźenja mjez druhim wobzamknył, zo ma so „kraj pola Zwjazka wo srědki za sylnjenje němsko-serbskeho charaktera“ regiona prócować. Namjet bě frakcija Lěwicy zapodała.
Testy přechodnje do šulow dać
Krótkopowěsće (12.03.21)
Dalše spěšnotesty
Budyšin. Darmotne spěšnotesty za ludnosć přichodnu wutoru popołdnju a štwórtk dopołdnja w Kamjencu kaž tež srjedu we Wojerecach zmóžnja Budyski wokrjes. Tam zwěsćichu wčera 39 koronanatyknjenjow a dwaj smjertnej padaj. Incidenca wučinješe 88,33, RKI mjenuje dźensa 73,1. We wokrjesu Zhorjelc bě wčera 53 infekcijow, z toho 21 britiskeje mutacije, incidenca bě 104,46, po RKI 92,6.
Wšitcy zajimcy přeprošeni
Wojerecy. Swjatočnje wotkryta budźe nowa wopomnjenska tafla „W tymle domje załožichu 24.7.1921 župy Domowiny, Zwjazka Łužiskich Serbow“ při radnej pincy we Wojerecach prózdnin dla hižo sobotu, 17. julija, a to z małym serbskim zarjadowanjom za wšěch zajimcow. Wo tym informowachu tele dny na posedźenju předsydstwa Wojerowskeje župy „Handrij Zejler“.
Krajny rada zadźiwany
