Krótkopowěsće (12.11.20)
Natyknjenja přeco hišće přiběraja
Budyšin. W Budyskim wokrjesu zwěsćichu wčera 186 dalšich infekcijow z koronawirusom. Ličba smjertnych padow je wo dwaj na 42 přiběrała. Aktualnje schorjenych je 1 848 (+84), z toho 45 (+1) stacionarnje lěkuja. Inficěrowanych bě w Kulowje 160 wosobow, w Pančicach-Kukowje 53 a w Ralbicach-Róžeńće 49. W Zhorjelskim wokrjesu wujewichu testy wčera 179 natyknjenjow. Šěsć pacientow je w zwisku z koronu zemrěło.
Skóržba Vattenfalla wuspěšna
Karlsruhe. Financne zarunanje wěstym wobhospodarjerjam milinarnjow pospěšeneho kónca wužiwanja atomoweje mocy dla po reaktorowej katastrofje w Fukushimje ma so hišće raz dospołnje noworjadować. Změna zakonja z lěta 2018 je njedospołna a njeje ženje płaćiwosće nabyła. To rozsudźi dźensa Zwjazkowe wustawowe sudnistwo po skóržbje energijoweho koncerna Vattenfall.
Unikat so nawróćił
Krótkopowěsće (11.11.20)
Njewidźi móžnosć wuwólnjenja
Budyšin. Hladajo na aktualne ličby koronainfekcijow njewidźi sakski ministerski prezident Michael Kretschmer (CDU) žanu móžnosć, zo bychu wobmjezowanja wuwólnili. Budyski wokrjes je wčera 120 nowych natyknjenjow přizjewił. Aktualnje je 1 764 wosobow (+13) na koronu schorjenych, 44 (-5) z nich lěkuja w chorowni. W Kulowje bě wčera 168 inficěrowanych, w Pančicach-Kukowje 48 a w Ralbicach-Róžeńće 47.
Etnologowka nowa prezidentka
Mnichow/Berlin. Ze 66lětnej Carolu Lentz steji prěni raz etnologowka jako prezidentka na čole Goethoweho instituta. Čestnohamtske zastojnstwo nastupi profesorka z Mainza zajutřišim jako naslědnica Klausa-Dietera Lehmanna. 80lětny je wot lěta 2008 jako prezident Goethoweho instituta ze zarjadnišćemi w tuchwilu 98 krajach swěta skutkował.
Feist zastojnstwo dale wukonja
Krótkopowěsće (10.11.20)
Wirus dale zachadźa
Budyšin. Z 48 nowymi padami je ličba z koronawirusom natyknjenych w Budyskim wokrjesu wčera na 3 046 rozrostła. Třo dalši pacienća su zemrěli (40). Z aktualnje 1 751 (-40) schorjenych 51 (-7) stacionarnje lěkuja. Wčera bě 3 720 ludźi w karantenje. Krajny rada Michael Harig (CDU) je so profylaktisce do karanteny podał, dokelž měješe kontakt z pozdźišo pozitiwnje testowanej wosobu.
Za schadźowanku so přizjewić
Budyšin. Zajimcy, kotřiž chcedźa na lětušej schadźowance pódla być, móža so online za zarjadowanje přizjewić. Městna na wirtuelnej žurli su wobmjezowane. Dalše informacije a link za přizjewjenje namakaja zajimcy pod www.schadźowanka.de. Hač budźe livestream po dotal zwučenym wašnju na Youtube widźeć, dotal jasne njeje.
Politikarjo CDU w karantenje
Krótkopowěsće (09.11.20)
Nowostce LND tež jako e-book
Budyšin. Lětsa w Ludowym nakładnistwje Domowina wušłej wěcna kniha Cordule Ratajczakoweje „Nowa swoboda?“ a powědančko Angele Stachoweje „Slědne dny strowja“ w delnjoserbskim přełožku předležitej nětko tež jako e-bookaj. Elektroniskej wudaći hodźitej so w shopje LND pod www.domowina-verlag.de skazać.
Nowe hudźbne widejo
Budyšin. Najnowši widejowy klip „Krabat“ serbskich hiphoperow z mjenami Lil Handrij, FloJ & SMAN je po swojej wčerawšej premjerje na Youtubekanalu „Serbska hduźba“ dotal něhdźe 1 100 přihladowarjow přiwabił. Produkciju běštej Załožba za serbski lud a kampanja „So geht sächsisch“ spěchowałoj.
Partitura Mětška wozjewjena
Berlin. Hudźbne nakładnistwo Edition Roy, specializowane na publikowanje referencnych zynkonošakow a notow přewažnje noweje hudźby, je partituru serbskeho komponista Jura Mětška wudało. Kruch „Quatuor noir“ je twórba za braču, cello a kontrabasaj, kotruž bě Mětšk w nadawku Budyskeho kulturneho zarjada spisał. Muzikalije su mjez druhim w Smolerjec kniharni na předań.
Krótkopowěsće (06.11.20)
Korona-hotspot Němskeje
Budyšin/Zhorjelc. Budyski a Zhorjelski wokrjes stej korona-hotspot Němskeje. Krajnoradnej zarjadaj stej wčera ličbje 328 resp. 305 natyknjenjow na 100 000 wobydlerjow w minjenych sydom dnjach wozjewiłoj. Ličba zwěsćenych koronainfekcijow je wo 169 na 2 545, smjertnych padow wo sydom na 36 w Budyskim wokrjesu rozrostła. W Zhorjelskim powjetši so ličba natyknjenjow wo 109 na 1 416 a smjertnych padow wo dwaj na 32.
Hłowna wólbna wotprajena
Chrósćicy. Župa Kamjenc je swoju hłownu a wólbnu zhromadźiznu 18. nowembra wotprajiła, Domowina dźensa zdźěli. Za přičinu mjenuja aktualne postajenja koronakrizy dla. Kaž čłonka župneho předsydstwa Katharina Jurkowa rjekny, „dyrbimy nětko zamołwiće jednać a dalšemu rozpřestrěću korony zadźěwać, zo móžemy hromadźe hody swjećić“. Zhromadźiznu chce Kamjenska župa spočatk 2021 nachwatać.
Schow před koronu w klóštrje
Krótkopowěsće (05.11.20)
Dale mnohe nowonatyknjenja
Budyšin/Zhorjelc. Ličba wšitkich wobkrućenych koronainfekcijow w Budyskim wokrjesu je wčera wo 250 na cyłkownje 2 376 rozrostła. Aktualnje schorjenych je 1 459 ludźi (+230). Z nich 36 (+7) w chorowni lěkuja. Zhorjelski wokrjes je wčera 194 nowonatyknjenjow přizjewił, cyłkownje 1 814. W klinikach staraja so wo 110 pacientow (+5).
Wokrjesny zjězd přestorčeny
Budyšin. Za 14. nowember planowany zjězd Budyskeho wokrjesneho zwjazka CDU přesunu trajaceje koronapandemije dla najprjedy raz na 9. januar 2021. To je wokrjesne předsydstwo rozsudźiło, rěka w nowinskej zdźělence wokrjesneho běrowa. Wot přestorčenja je zdobom nominacija direktneho kandidata za klětuše wólby zwjazkoweho sejma potrjechena. Po zakonju móhli zjězd wotměć. Tuchwilnych wobmjezowanjow zetkawanja dla pak chcedźa ludnosći z přikładom być, tak so tež po tym maja.
Symbol města ponowjeja
Krótkopowěsće (04.11.20)
Dalša pacientka wumrěła
Budyšin/Zhorjelc. Ličba na koronawirus schorjenych, kotrychž klinisce lěkuja, bě wčera w Budyskim wokrjesu 29, w Zhorjelskim wokrjesu je wo 46 na 105 rozrostła. Tam zastaruja w klinice we wokrjesu 102 wosobje, dalšej w chorowni w Budyskim wokrjesu a w Drježdźanskej klinice jednu. W Budyskim wokrjesu je dalša pacientka wumrěła, cyłkownje je nětko 29 smjertnych padow. Po testach zwěsćichu tam wčera 79 nowoinfekcijow, w Zhorjelskim 151.
Wohrožena kónčina postajena
Drježdźany. Sakska je wčera powšitkowne postajenje wukazała, zo by rozšěrjenju afriskeje swinjaceje mrětwy (ASP) zadźěwała. Postajena je tak mjenowana wohrožena kónčina kołowokoło městnosće třělenja z ASP inficěrowaneho dźiwjeho swinjeća na teritoriju Krušwica/Pěchč w Zhorjelskim wokrjesu. Tam za hońtwjerjow, plahowarjow swini a powšitkownosć wosebite rjadowanja płaća.
Inwestuja do stejnišća
Krótkopowěsće (03.11.20)
Woidke z koronu natyknjeny
Podstupim. Braniborski ministerski prezident Dietmar Woidke (SPD) bu pozitiwnje na koronawirus testowany. Wón njeje po prěnich zjawach nazymjenja njedźelu žane dalše słužbne terminy wukonjał, zdźěli dźensa knježerstwowy rěčnik Florian Engels. Nětko kontaktowe wosoby identifikuja.
Podpěra promowowacym
Drježdźany. Sakska tři městna promowowacych na Uniwersiće Zjednoćenych narodow w Drježdźanach financnje podpěruje. Spěchuja doktorandki a doktorandow z prohowych a wuwićowych krajow při slědźenjach na temu „Wot Covid-19 wotkryte prašenja resursoweho zwiska powołanskich skupin w agarnym a žiwidłowym zastaranskim rjećazu“. Při tym dźěłaja tež ze slědźenskim institutom za globalne změny Čěskeje akademije wědomosće CzechGlobe hromadźe.
Zetkanje přestorčene
Krótkopowěsće (02.11.20)
120 nowych infekcijow
Budyšin. W Budyskim wokrjesu bu wčera 120 nowych infekcijow z koronawirusom zwěsćenych. Z tym je ličba w sydom dnjach poćahowana na ličbu wobydlerstwa 781. W karantenje je 2 415 ludźi. 41 dalšich pacientow je wuhojenych. Tuchwilu je we wokrjesu 1 166 ludźi inficěrowanych. 32 z nich so w klinikach hoja. Mjeztym je dalši pacient zemrěł.
Myto Büchnera Elce Erb
Darmstadt. Autorka Elke Erb je sobotu w Darmstadtskim Statnym dźiwadle Myto Georga Büchnera přijała. Korony dla bě tam lědma publikuma. Z mytom bu 82lětna lyrikarka a basnica za swoje „njezaměnliwe“ literarne žiwjenske tworjenje wuznamjenjena. Myto we wysokosći 50 000 eurow Němskeje akademije za rěč a basnjenje je najwažniše wuznamjenjenje na polu literatury w Němskej.
Filmowy festiwal přesunjeny
Choćebuz. Organizatorojo 30. filmoweho festiwala Choćebuz (FFC) su podawk na 8. do 13. decembra 2020 přesunyli. Dualny festiwal wotměwa so w tych dnjach z předstajenjom filmow w kinach delnjołužiskeho města kaž tež na internetnej stronje festiwala. Kartki za předstajenje filmow w kinach wot 3. do 8. nowembra dale płaća.
Krótkopowěsće (30.10.20)
Dalše infekcije zwěsćili
Budyšin/Zhorjelc. W Budyskim wokrjesu su wčera 141 dalšich nowonatyknjenych z koronawirusom zwěsćili. Tuchwilu je tu dohromady 793 wosobow inficěrowanych, dwanaće z nich w chorowni lěkuja. Budysku pěstowarnju „Friedrich Schiller“ su jednoho koronoweho pada dla zawrěli. W Zhorjelskim wokrjesu je so 40 ludźi znowa natyknyło, dohromady maja tam 716 inficěrowanych, z kotrychž je 28 w chorowni.
Serbska rada wuradźowała
Budyšin. Digitalnje zetkachu so wčera čłonojo Rady za serbske naležnosće Sakskeje. Radźićeljo zaběrachu so mjez druhim z wot statneho knježerstwa předpołoženym naćiskom zakonja k skrućenju zažneho a šulskeho kubłanja. W lisće Sakskej statnej kencliji kritizuja w jeje nadawku wudaty wosebity zešiwk „Mosaika“, w kotrymž serbska rěč a kultura ze žanym słowom njenaspomnjenej njejstej.
Žadna cyrkej so wotpaliła
