Krótkopowěsće (20.08.20)
Pücklerowy park dale spěchuja
Mužakow. Wopytawši Mužakowski park wjercha Pücklera chcyše kulturna statna ministerka Monika Grütters (CDU) dźensa dojednanje wo dalšim spěchowanju swětoweho namrěwstwa UNESCO ze sakskim ministerskim prezidentom Michaelom Kretschmerom (CDU) podpisać. Dotalne zrěčenje kónc lěta wuběži. Dale chcyštaj so dojednać wo nowotwarje Informaciskeho a kubłanskeho centruma Mužakowskeho zahorka.
Znješkódnja bombu w Grodku
Grodk. 50kilogramowu bombu z Druheje swětoweje wójny je słužba za wotstronjenje wojerskich srědkow dźensa wot 10 hodź. w Grodkowskim měšćanskim dźělu Dubrawa započała znješkódnić. Wuslědk njebě hač do redakciskeho kónca za tute wudaće znaty. Kaž měšćanske zarjadnistwo informuje, měješe 1 400 ludźi swoje bydlenje wopušćić, mjez nimi 98 wobydlerjow jedneje hladarnje.
Wjace hač 600 přeńdźenjow
Krótkopowěsće (19.08.20)
Čarje přepołoženej
Budyšin. Sprjewiny kolesowarski puć a ruta Serbske impresije stej we wobłuku Delnjohórčanskich hatow přepołoženej. Kaž Budyski krajnoradny zarjad zdźěli, je dwulětneje twarskeje naprawy dla wotrězk po hatach zawrjeny. Wobě čarje wjedźetej nětko wot Budyskeho spjateho jězora přez Chwaćicy, Wulku Dubrawu, Zdźěr a Klukš do Brězyny. Rozmysluja samo wo trajnym přepołoženju.
Sakska kritizuje namjet
Drježdźany. Namjet zwjazkoweho sejma, zakoń wo stasijowych aktach změnić, je sakska justicna ministerka Katja Meier (Zwjazk 90/Zeleni) kritizowała. Wotpohlad je, stasijowe akty w kóždym wuchodoněmskim kraju w jednym archiwje centralizować. Njejasny je přichod wotnožkow bjez archiwa w Kamjenicy a Drježdźanach. Meier žada sej, sakske stejnišća wobchować.
Rudne horiny kopate połne
Krótkopowěsće (18.08.20)
Sakska swjeći 30. róčnicu
Aue-Bad Schlema/Drježdźany. Ze stadionowym koncertom w Aue woswjeći Swobodny stat Sakska swoje nowozałoženje a jednotu Němskeje před 30 lětami. Kaž statna kenclija wčera zdźěli, wustupitej Sakska statna kapała Drježdźany a Krajny hórski hudźbny korps Sakskeje 5. septembra zhromadnje w Rudnohórskim stadionje Aue-Bad Schlema. Nadrobnosće chcedźa jutře wozjewić.
Staroměšćanski festiwal wupadnje
Budyšin. Wot 30. awgusta do 1. septembra planowany staroměšćanski festiwal je Budyske turistiske towarstwo nětko wotprajiło. Předsydstwo towarstwa ma rizika hladajo na koronapandemiju za přewulke. Předwidźany bě po lońšej premjerje festiwala „Woda, wuměłstwo, swětło“ znowa wobšěrny serbski program.
Nowa rektorka uniwersity
Krótkopowěsće (17.08.20)
W dowolu so natyknyli
Budyšin/Zhorjelc. Porno pjatkej žanu změnu nastupajo koronawirus w Budyskim wokrjesu njezwěsća. Aktualnje štyrjo inficěrowani su wšitcy tak mjenowani dowolowi nawrótnicy. W Zhorjelskim wokrjesu zwyši so ličba natyknjenych wo dalšu wosobu na dohromady 66. Wosom wobydlerjam wukazachu karantenu, tak zo je tuchwilu cyłkownje 200 ludźi izolowanych.
Serbske zynki w Korutanskej
Pliberk. We wobłuku třikrajoweho wuměłskeho projekta „Přechod 03 – Wobrazy krajiny“ wuhotuja w muzeju Wernera Berga w korutanskim Pliberku čitanje a koncert. 21. awgusta zahudźa Walburga Wałdźic, Heidemarja Wiesnerec a Gerold Gnausch kaž tež kwartet modernsax Berlin. Swójsku kaž tež lyriku Kita Lorenca recituja Cvetka Lipuš, Anja Golob a Źilka.
Hosćenc ma wotnajerku
Krótkopowěsće (14.08.20)
Snadny rozrost infekcijow
Budyšin/Zhorjelc. Kaž strowotniski zarjad wokrjesa Budyšin zdźěli, je dalšej natyknjeni z koronawirusom registrował. Tak su aktualnje štyri pady znate. Wokomiknje je 35 wobydlerjow w karantenje (- 6). W Zhorjelskim wokrjesu zwěsćichu štyri nowe infekcije. Z tuchwilu dohromady 63 natyknjenych wosobow stej dwě w chorowni. Cyłkownje 192 kontaktnych wosobow (+1) je w karantenje.
Pokaza wuměłsku instalaciju
Budyšin. Serbski wuměłc Jan Bělk pokaza za dwaj tydźenjej, 28. a 29. awgusta, na Budyskim torhošću we wobłuku Staroměšćanskeho swjedźenja swoju wobchodźomnu instalaciju „Pohlady diferency“. Bělkowy, wot Załožby za serbski lud spěchowany multimedialny projekt tworješe loni zazběh festiwala šesćiměstow „Přinć a woteńć“.
Chipy přećiwo paducham
Krótkopowěsće (13.08.20)
Policija reagowała
Drježdźany. W zwisku z protestami na dalnodróze B 96 w Hornjej Łužicy je policija mjeztym wjace hač 40 chłostanskich jednanjow zahajiła. Při tym dźe po słowach sakskeho nutřkowneho ministra Rolanda Wöllera (CDU) mjez druhim wo zapřimnjenje do nadróžneho wobchada, wo nuzowanje a wo zranjenje ćěła.
Wo podpěru so požadać
Budyšin. Předewzaća z hač do 249 sobudźěłaćerjemi móža so wotnětka wo wukubłansku premiju abo dalše spěchowanja ze zwjazkoweho programa „wukubłanske městna zawěsćić“ na agenturach za dźěło požadać, kaž Budyski zarjad informuje. Próstwu zapodać je móžno přez telefon-hotline 0800/455520 abo internetnje pod www.arbeitsagentur.de/sachsen >> Ausbildungsprämie.
Parkowanišća ze sensorami
Krótkopowěsće (12.08.20)
Směrnicy wobzamknyli
Drježdźany. Sakske knježerstwo je wčera na swojim posedźenju dojednanju mjez Zwjazkom a krajemi přihłosowało, zwoprawdźić strukturnu změnu kaž tež spěchowanske směrnicy. Regiony maja prawo dóstać sobu rěčeć. We Łužicy chcedźa Domowinu zapřijeć. Komuny resp. jich předewzaća móža próstwy wo spěchowanje stajeć, wučinjace zasadnje 90, zdźěla tež 97,5 procentow.
Zesylnja team
Budyšin. Producent mašinow za pjekarnje Budyska DEBAG, zesylnja swój team za rozšěrjenje w Němskej. Wot 1. awgusta je 31lětny Erik Adler, kiž hižo wot lěta 2016 za DEBAG skutkuje, předawanski nawoda za region wuchod. Tež w Bayerskej maja nětko noweho šefa za předań. Tradicionalne předewzaće chce swoju prezencu po cyłym kraju dale sylnić.
Internaty w hotelach
Praha/Brno. W zwisku z koronawirusowej epidemiju bědźa so čěske hotele z njedostatkom hosći. Wěsty wupuć móhło hižo wot nazymy wužiwanje njewobsadźenych stwow jako narunanka hewak njedosahacych městnow w studentskich internatach być. Wosebje w Praze a Brnje móhła so ideja za hoteljejow kaž tež studentow wudanić.
Krótkopowěsće (11.08.20)
Nahubnik zwonka rjadownje
Podstupim. Po zahajenju noweho šulskeho lěta chcyše braniborski kabinet na swojim dźensnišim posedźenju na kóždy pad wobzamknyć, zo je škitny nahubnik w šulach zwonka wuwučowanskich rumnosćow a dworow za přestawki winowatostny. Wo dalšim přiměrjenju krajneho postajenja nastupajo wobmjezowanja koronapandemije dla chcychu dźensa popołdnju informować.
Danielu Krien mytuja
Drježdźany. Sakske literarne myto 2020 dóstanje Daniela Krien. W Lipsku bydlaca awtorka budźe za swoje dotalne prozowe twórby wuznamjenjena. Loni je 55lětna awtorka roman „Die Liebe im Ernstfall“ předpołožiła. Wot lěta 2012 spožča sakske ministerstwo za wědomosć, kulturu a turizm hromadźe ze Sakskej literarnej radu kóžde druhe lěto myto w hódnoće 10 000 eurow.
Třećina Saksow mało zasłuža
Krótkopowěsće (10.08.20)
Pytaja wirusa dla pomocnikow
Budyšin/Zhorjelc. Přez kónc tydźenja su w Zhorjelskim wokrjesu pjeć dalšich nowoinfekcijow z koronawirusom zwěsćili. Wjetšina z aktualnje 57 natyknjenych bydli abo dźěła w Bjernadźičanskim (Bernstadt) domje za zbrašenych. W tym zwisku wokrjes wobydlerjow namołwja so dobrowólnje na polu hladanja angažować. W Budyskim wokrjesu stej dale dwě wosobje inficěrowanej.
Liča ze srědkom kónc lěta
Brüssel. Strowotniska komisarka EU Stella Kyriakides liči kónc lěta z prěnim šćěpjenskim srědkom přećiwo koronje. „Byrnjež wěšćenja hišće riskantne byli, su dobre pokazki, zo srědk kónc abo spočatk noweho lěta předleži“, rjekny komisarka časopisej Handelsblatt. Wona pak skedźbnja na to, zo njemóže šćěpjenski srědk zrazom wšě ćeže rozrisać. Dowola pak krok po kroku nawrót k normaliće.
Scholz kanclerski kandidat SPD
Krótkopowěsće (07.08.20)
Ličba infekcijow přiběrała
Budyšin/Zhorjelc. W Budyskim wokrjesu je so dalša wosoba z koronawirusom natyknyła, z čimž stej aktualnje dwaj padaj znatej. W Zhorjelskim wokrjesu zwěsćeja tuchwilu dohromady 43 inficěrowanych, 33 wjace hač wčera. Tamniši krajny rada Bernd Lange (CDU) w tym zwisku namołwja, předpisy hygieny bóle wobkedźbować.
Lěsnym wohenjam wobarać
Offenbach/Podstupim. Horce lětnje wjedro Němska wjedrowa słužba za Saksku připowědźa, wočakujo přichodne dny temperatury hač do 36 stopnjow. Strach lěsnych wohenjow tu kaž tež w Braniborskej dale přiběra. Po słowach tamnišeho krajneho społnomócnjeneho za škit před lěsnymi wohenjemi Raimunda Engela njeje dešć minjeny kónc tydźenja ničo změnił, bě to „kapka na wupar“.
Z nahubnikom do šule
