Krótkopowěsće (02.05.23)
CDU dale najsylniša strona
Drježdźany. Wolacy w Sakskej CDU najbóle dowěrjeja. W měsačnym woprašowanju instituta Civey a „Sächsische.de“ z njedźelnym prašenjom („Koho byšće wolili, bychu-li njedźelu wólby krajneho sejma w Sakskej byli?“) je CDU znowa 34 procentow docpěła, kaž hižo 2. apryla. Za AfD hłosowaše 26 procentow (-1), Zelenych dźewjeć (+1), SPD wosom (-1) a Lěwicu 10 (+1). Štyri procenty za FDP njedosahaja za zaćah do krajneho sejma.
Swoje žadanje wobnowił
Budyšin. Zapósłanc sakskeho krajneho sejma Marko Šiman (CDU) je swoje žadanje za wutwarom zwjazkoweje awtodróhi A4 wobnowił. Pozadk toho su wólby noweho wyšeho měšćanosty Berlina Kaia Wegnera (CDU), kotryž nochce plany za wutwar zwjazkoweje awtodróhi A100 w němskej stolicy podpěrać. Po słowach Šimana měli srědki za wutwar A 4 mjez Drježdźanami a Zhorjelcom wužiwać.
Nowa atrakcija w parku
Krótkopowěsće (28.04.23)
Ansambl sotrownje wopytali
Mały Wjelkow. Wiceprezidentaj zwjazka Europa Nostra prof. dr. Jacek Purchla z Krakowa a Petr Svoboda z Prahi staj štwórtk na přeprošenje dr. Uwe Kocha, němskeho prezidenta zwjazka, město Budyšin kaž tež sotrownju Ochranowskeje bratrowskeje wosady w Małym Wjelkowje wopytałoj. Před dwěmaj tydźenjomaj bu ansambl sotrownje do lisćiny 7 najwohroženišich kulturnych městnosćow Europy přiwzaty.
Młoda alternatiwa prawicarska
Drježdźany. Sakski wustawoškit zastopnjuje młodźinsku organizaciju AfD „Młodu alternatiwu“ nětko jako zawěsćenu prawicarsku organizaciju. Z tym wotpowěduje wustawoškit kraja rozsudej Zwjazkoweho wustawoškita wot srjedy. Z tutoho zastopnjowanja rezultuje wobkedźbowanje organizacije ze srědkami tajneje słužby kaž tež intensiwniše pruwowanje sobustawow.
Mejske demonstracije
Krótkopowěsće (27.04.23)
„Bagatelizowana namóc“
Budyšin. Po mjeztym „wosmym zapalerskim nadpadźe“ na twarnišća předewzaća Hentschke Bau kritizuje firma, zo so „pady njekonsekwentnje přepytuja“. Nimo toho hrozytej „tež jednostronskeho a bagatelizowaceho rozprawnistwa w medijach dla nadal permanentna namóc a teror pře twarnišća, mašiny a wosoby“.
Pomałšo po Ochranowje
Lipsk. Po Wojerecach je Ochranow jako druhe łužiske město iniciatiwje „Žiwjenjahódne města a gmejny“ přistupiło. W njej angažuje so aktualnje wjace hač 660 němskich teritorialnych korporacijow (Gebietskörperschaften), reprezentowacych něhdźe 28 milionow wobydlerjow, za „samopostajenje wobmjezowanjow spěšnosće“. Dołhodobny zaměr je „přezcyłne zawjedźenje tempo-30-conow po komunalnym posudźowanju w městach a wsach“.
Hrjebjenjowy puć wotewrěli
Krótkopowěsće (26.04.23)
Wučbne myto Sakskeje
Drježdźany. Sakske ministerstwo za wědomosć je Wučbne myto Sakskeje wuwołało. Z tym chcedźa wusahowace docentki a docentow počesćić, kotřiž wučbnu maćiznu z nowymi, mudrymi idejemi a konceptami posrědkuja. Myto ma so dwulětnje spožčić wuwučowacym, jednotliwcam a skupinam, na uniwersitach, wysokich šulach w swobodnym staće a na powołanskej akademiji Sakskeje.
Minister wopyta Chrósćicy
Kamjenc. Na přeprošenje zapósłanca krajneho sejma Alojsa Mikławška (CDU) wopyta nutřkowny minister Sakskeje Armin Schuster (CDU) přichodny pjatk sportowe zjednoćenstwo Chrósćicy, zo by so wo stawje přihotow na Europeadu 2024 wobhonił. Rozmołwjeć chce so z trenarjemi a zamołwitymi zjednoćenstwa kaž tež z pjeć předsydami dwurěčnych sportowych towarstwow zarjadniskeho zwjazka.
Hackerojo produkciju haća
Krótkopowěsće (25.04.23)
Žadyn klima-camp w Miłorazu
Trjebin. Hižo dołho připowědźeny „klimowy camp“ so nětko tola w Miłorazu njewotměje. Aktiwisća su wčera na swojim twitter-kanalu zdźělili, zo dyrbja swój camp přestorčić. Njedźelu běchu domoródni, mjez nimi tež wjele Serbow, z „rjećazom ludźi“ přećiwo campej protestowali, wšako je přesydlenje brunicy dla wot wulkeje wjetšiny wobydlerjow wjeski akceptowane.
Wjace přihladowarjow přiwabili
Budyšin. Němsko-Serbske ludowe dźiwadło je swoju lětušu turneju ducy po Delnjej Łužicy „z jasnym publikumowym plusom“ zakónčiło. Na štyrjoch předstajenjach komedije „Piwo“ w Hochozy, Choćebuzu, Radušu a Dešnje zličichu dohromady něhdźe 250 přihladowarjow, štož woznamjenja porno lońšemu rozrost wo 20 procentow.
Bosniski rěčespytnik zemrěł
Krótkopowěsće (24.04.23)
Leberecht dale na čole gmejny Łaz
Łaz. Thomas Leberecht (CDU) wostanje wjesnjanosta Łazowskeje gmejny. Na njedźelnišich wólbach je so wón ze 66 procentami wotedatych płaćiwych hłosow jasnje přećiwo wužadarjej Frankej Försterej (AfD) přesadźił. Förster je 30 procentow hłosow docpěł. „Wólbny wuslědk je wuraz dowěry wobydlerjow do mnje a do mojeho dźěła a je mi z wulkim pohonom do přichoda“, praji Leberecht.
Delnjoserbšćina w Translatoru
Choćebuz. Delnjoserbšćinu jako druhu mjeńšinowu rěč w Němskej je koncern Microsoft do swojeho přełožowanskeho programa MS Bing Translator a do Translator-app zapřijał. Wo tym je nawodnica Rěčneho centruma Witaj (RCW) dr. Beata Brězanowa sobotu na hłownej zhromadźiznje Domowiny informowała. Po hornjoserbskich hodźa so nětko tež delnjoserbske teksty do wjace hač sto dalšich rěčow mašinelnje přełožować.
Nowa wjednica pěstowarnje
Krótkopowěsće (21.04.23)
Myto za Slepjansku wosadu
Radebeul. Slepjanska wosada je dóstała „Sakske myto za přichod“. Hižo srjedu přepoda so w Radebeulu wot sakskeho ministra za wobswět, Wolframa Günthera, pjenježne myto we wysokosći 5 000 eurow. Přičina počesćenja je wuběrny angažement Slepjanskeje wosady. Tak su cisterny za dešćowu wodu natwarili a tež solarna naprawa na třěše fary je nastała.
Rokotak z druhim albumom
Budyšin. „Hornjołužiski indie-spěwytwórc“ Rokotak, kaž so Milan Grojlich sam mjenuje, wozjewi dźensa swój druhi album „Punkt und Komma“. Produkcija je online na znatych platformach přistupna kaž tež jako CD na předań a wopřijima dohromady dwanaće spěwow. Stilistisce „nawjaza nowostka konsekwentnje na před lětomaj wušły debit ‚Riech an Blumen‘, chabłacy mjez žanromaj šanson a americana“.
Sylna marka Němskeje z Budyšina
Krótkopowěsće (20.04.23)
Wo misionstwje zhonili
Pančicy-Kukow. Po dlěšej přestawce móžeše Domowinska skupina Pančicy-Kukow wčera swoje prěnje zarjadowanje w awli ponowjeneje Šule Ćišinskeho přewjesć. Před něhdźe 40 skupinarjemi a hosćimi přednošowaše dr. Lubina Malinkowa wo Ochranowje a Serbach. Předewšěm wěnowaše so wona misionskemu skutkowanju wjacorych Serbow w rozdźělnych kónčinach swěta.
„Rukatl-Bier“ dobyćer
Frankfurt n.M./Kumwałd. Ze swojej kreaciju „Rukatl-Bier“ je sebi Kumwałdska piwarnja „ProBier“ złotu medaliju zdobyła. Na wubědźowanju International Trophy 2023 zamó piwo z Kumwałda jury přeswědčić. Nicole Kosch, Maik Richter a Frank Walther, kotrež piwarnju wobhospodarjeja, su přez dobyće jara wjeseli, wšako su so lětsa k prěnjemu razej na rozrisanju wobdźělili.
Fabriku na muzej přeměnili
Krótkopowěsće (19.04.23)
Za festiwal pytaja přewodnikow
Budyšin. Přihotowanski wuběrk Mjezynarodneho folklorneho festiwala Łužica po swojim wčerawšim posedźenju informuje, zo je so dotal hižo něhdźe 800 šulerkow a šulerjow za jim wěnowanej wosebitej předstajeni w Budyšinje přizjewiło. Zarjadowani stej z tym nimale wuknihowanej. Dale wuběrk zdźěla, zo přijimuja hišće přizjewjenja zajimcow, kotřiž hudźbnu skupinu přewodźeja.
Pućowanske kóšty přewysoke
Drježdźany. Sakske statne knježerstwo je loni kóšty za pućowanje we wysokosći 443.000 € měło. Tuta wysoka ličba wuwabi raznu kritiku sakskeho zwjazka płaćerjow dawkow. Prezident zwjazka porokowaše ministerki a ministrow za jich njepoměrne wudawki. Hač maja nałožowane pjenjezy woprawdźity wužitk, njeda so dopokazać. Najwyše wudawki měješe pječa hospodarski minister Dulig.
Praski hród bóle přistupny
Krótkopowěsće (18.04.23)
FUEN wo kubłanju wuradźuje
Sibiu. Přechod z pěstowarnje do šule je hłowna tema zeńdźenja dźěłoweho zjednoćenstwa kubłanje Federalistiskeje unije europskich narodnosćow (FUEN) w sedmihródskim měsće Sibiu w Rumunskej. Na zarjadowanju wot dźensnišeho hač do pjatka so kubłanska referentka Domowiny Katrin Suchec-Dźisławkowa a jednaćel Serbskeho šulskeho towarstwa Andreas Ošika wobdźělitaj.
Mjezynarodno-serbske widejo
Drježdźany. Skupina Skaprifischer je minjenu sobotu hudźbne widejo adapcije spěwa „Změny“ sowjetskeje band Kino oficialnje na znatych internetowych platformach wozjewiła. Klip, w kotrymž sćělesnja Božena Bjaršec hłownu rólu, bu pod nawodom běłoruskeho režisera Artsjoma Lobacha a z hóstnej wokalistku Utu Šwejdźic zwoprawdźeny.
Wjace ruskich požadarjow azyla
