Krótkopowěsće (05.05.22)
Wurjadna „hłowna“ 3. junija
Budyšin. Wurjadna hłowna zhromadźizna Domowiny wotměje so pjatk, 3. junija 2022, wot 17 hodź. w Choćebuzu. To je prezidij zwjazkoweho předsydstwa třěšneho zwjazka na wuradźowanju wčera w Budyšinje rozsudźił. Zdobom je gremij naćisk změnow wustawkow organizacije schwalił, zo bychu wone žadanjam hamtskeho sudnistwa w Drježdźanach wotpowědowali, kotrež wustawki towarstwow juristisce pruwuje.
Niwow lědma změnjeny
Budyšin. Niwow incidency kaž tež nowych natyknjenjow z koronawirusom je nimale njezměnjeny. Roberta Kochowy institut mjenowaše dźensa za Budyski wokrjes incidencu 330,2 a 221 w běhu 24 hodźin zwěsćenych infekcijow. Za wokrjes Zhorjelc je RKI 212 natyknjenjow a dalšich šěsć smjertnych padow podał, incidenca je 263,4. Zhorjelski wokrjes njeje wčera žane ličby wozjewił.
Cil je bjezbarjernosć
Krótkopowěsće (04.05.22)
Myto Miny Witkojc wupisane
Podstupim. Třeći raz je Braniborska dźensa Myto Miny Witkojc za angažement na dobro serbskeje rěče a kultury wupisała. Komuny w zdźědźenym serbskim sydlenskim rumje runje tak kaž towarstwa a zwjazki z poćahom k serbstwu a čłonojo jury móža namjety hač do 30. junija braniborskemu ministerstwu za wědomosć, slědźenje a kulturu zapodać. Wuznamjenjenje je z 2 500 eurami dotěrowane.
Incidenca dale spadowaca
Budyšin. Dalše natyknjenja z koronawirusom dožiwjamy runje tak kaž dale woteběracu incidencu. Tuta wučinja po Roberta Kochowym instituće dźensa w Budyskim wokrjesu 332,5. Nimo toho mjenowaše RKI tam 325 zwěsćenych infekcijow a tři smjertne pady. Wokrjes Zhorjelc rozprawješe wčera wo 193 natyknjenjach a štyrjoch zemrětych pacientach, incidenca po RKI je tu dźensa 247,8.
Juristiski dorost w Budyšinje
Krótkopowěsće (03.05.22)
Dźesać lět kontaktny běrow
Wrocław. Ze swjedźenskim zarjadowanjom su wčera wječor dźesaćlětne wobstaće kontaktneho běrowa Sakskeje we Wrocławju woswjećili. Jednaćelka Judith Šołćina sposrědkowa nawodźe zastupnistwa zbožopřeća Domowiny. Wona, direktorka Budyskeho Serbskeho muzeja Christina Boguszowa a referent Domowiny za kulturu a wukraj Clemens Škoda su Serbow tam zastupowali.
Spad bjezdźěłnosće dale traje
Budyšin. Wo dalšim spadźe bjezdźěłnosće we wuchodnej Sakskej rozprawja dźensa Budyska wotnožka Zwjazkoweje agentury za dźěło. W měsacu apryl bě tu 16 912 bjezdźěłnych, 569 (-3,3 procenty) mjenje hač w měrcu. 1 300 wosobow je zaso přistajenje našło. Firmy dale jara za nowymi dźěławymi pytaja, wosebje w předźěłacym přemysle, strowotnistwje, socialnistwje a we wikowanju.
Dźeń a mjenje natyknjenjow
Krótkopowěsće (02.05.22)
Po poł lěće: Žane smjertne pady
Berlin/Budyšin/Zhorjelc. Roberta Kochowemu institutej (RKI) njebuchu po nimale poł lěće žane dalše smjertne pady w zwisku z koronawirusom zdźělene. Pandemija přiwšěm přewinjenja njeje. Incidenca w Budyskim wokrjesu je po RKI 411,1. W Zhorjelskim wokrjesu zwěsćichu 174 nowych infekcijow a incidencu 330,9. Tamniši krajnoradny zarjad informuje dodatnje wo třoch zemrětych pacientach za dobu wot 21. do 23. apryla.
Myto žurnalistomaj z Ukrainy
Bonn. Mjezynarodny zjawnoprawniski sćelak Němska žołma spožči lětuše myto „DW Freedom of Speech Award“ ukrainskimaj žurnalistomaj Jewgenyjej Malolstce a Mstylawej Černowej. Wobaj rozprawjataj tuchwilu z Mariupola. Wuznamjenjenje hódnoći angažement a zasłužby za swobodu rěčenja.
Pakety do Ukrainy zadarmo
Krótkopowěsće (29.04.22)
Staw infekcijow dale woteběra
Budyšin/Zhorjelc. Po Roberta Kochowym instituće (RKI) je so incidenca w Hornjej Łužicy dale znižiła. W Budyskim wokrjesu wučinja wona aktualnje 484,5. We wokrjesu Zhorjelc je so ličba na 397,1 pomjeńšiła. Tamniši krajnoradny zarjad informuje wo 178 nowych natyknjenjach z koronawirusom, mjez kotrymiž zwěsćichu dohromady 14 infekcijow pola dźěći. Jednoho pacienta hladaja tuchwilu na intensiwnej staciji.
Narodne myto Wernerej Schulze
Weimar. Narodna załožba Němskeje spožči lětuše „Narodne myto Němskeje“ něhdyšemu wojowarjej za wobydlerske prawa w Němskej demokratiskej republice Wernerej Schulze. We wopodstatnjeju rěka, zo je so wjelelětny parlamentownik w Berlinje a Brüsselu a čłon Zwjazka 90/Zelenych „lětdźesatki z wulkej prócu a njehladajo tójšto spjećowanjow za natwar a zakitowanje demokratije angažował“.
Wulke plany Praskeje metro
Krótkopowěsće (28.04.22)
Myto běłoruskim žurnalistam
Paris. UNESCO spožči lětuše myto „Guillermo Cano World Press Freedom Prize“ Zwjazkej žurnalistow Běłoruskeje. Z nim počesća jednotliwcow, organizacije a institucije, zasadźowace so za swobodu nowinarstwa. „Z mytom solidarizujemy so ze wšěmi žurnalistami na swěće, kotřiž kritisce a dowěrliwje wo awtoritarnych režimach rozprawjeja. Smy jim poboku a česćimy sej jich kuražu“, tak UNESCO.
Statnik wobrućeny
Lipsk. Dawid Statnik wostanje předsyda Sakskeho krajneho wustawa za priwatny rozhłós a nowe medije SLM. Čłonojo gremija su jeho wutoru na skonstituowacym posedźenju w Lipsku wobkrućili, informuje SLM w zdźělence. Kaž Statnik rjekny, je najwažniši nadawk tež w nowej wólbnej dobje dawać skutkowne impulsy za pozitiwne wuhotowanje přichoda medijow w Sakskej.
Lědma změnjena incidenca
Krótkopowěsće (27.04.22)
Podwojene přiražki předwidźane
Berlin. W dotal předležacym naćisku zwjazkoweho etata 2022 je skónčnje zwyšenje přiražkow za Berlinski mjeńšinowy sekretariat štyrjoch awtochtonych narodnych mjeńšin w Němskej wo 98 000 eurow předwidźane. To je nimale podwojenje dotalnych srědkow, kaž rozprawješe póndźelu Stefan Seidler, zapósłanc Južnoschleswigskeho wolerskeho zwjazka w zwjazkowym sejmje.
Incidenca tróšku niša hač wčera
Budyšin. Pandemija přetrata njeje. Incidenca po Roberta Kochowym instituće je dźensa w Budyskim wokrjesu z 538,6 a w Zhorjelskim ze 419,1 tróšku niša hač wčera. RKI je za wokrjes Budyšin dale 405 natyknjenjow z koronawirusom a smjertny pad podał. Wo 296 dalšich zwěsćenych infekcijach, mjez nimi je 23 dźěći, a štyrjoch zemrětych z doby 1. do 13. apryla je wokrjes Zhorjelc wčera rozprawjał.
Nalětnje schadźowanje OLGW
Krótkopowěsće (26.04.22)
Znowa livestream planowany
Budyšin. Přihoty serbskeje wubranki muži na lětušu europeadu w Korutanskej połnje běža. To zhonichu wčera čłonojo přihotowanskeho wuběrka w Budyšinje. Planowane je znowa koparske duele serbskeje wubranki w livestreamje wusyłać, za čož wjedźe tuchwilu team wokoło Michała Cyža planowanske rozmołwy z MDR. Kónc meje chcedźa doskónčny kader wubranki zjawnosći předstajić.
Incidenca zaso wyša
Budyšin. Roberta Kochowy institut je dźensa z 557,7 za Budyski wokrjes a 454,6 za Zhorjelski stupacej incidency wozjewił. Za wokrjes Budyšin mjenowaše RKI dale 381 zwěsćenych natyknjenjow z koronawirusom a smjertny pad. Strowotniski zarjad w Zhorjelcu informowaše wčera za dobu wot minjeneje soboty wo 281 infekcijach a třoch w zwisku z koronu zemrětych ze 16. a 17. apryla.
Dwójce telko honjakow
Krótkopowěsće (25.04.22)
Schuster zastojnstwo nastupił
Drježdźany. Armin Schuster je dźensa zastojnstwo sakskeho ministra nutřkowneho nastupił a powołanske wopismo z ruki ministerskeho prezidenta Michaela Kretschmera (wobaj CDU) dóstał. Wón chce w swojim skutkowanju komunalnej politice wulku wažnosć přicpěwać. 60lětny naslědnik minjeny pjatk pušćeneho Rolanda Wöllera je dotal zwjazkowy zarjad za škit ludnosće a katastrofowu pomoc nawjedował.
Incidenca znowa woteběrała
Budyšin. Přez kónc tydźenja je incidenca w Hornjej Łužicy wobstajnje woteběrała. Roberta Kochowy institut je dźensa za Budyski wokrjes ličbu 481,2 a za Zhorjelski 368,8 podał. Wčera a dźensa njeje RKI za wobaj wokrjesaj žane dalše zwěsćene natyknjenja wozjewił. Wokrjes Zhorjelc informowaše pjatk wo 295 infekcijach, mjez nimi bě 31 dźěći, a smjertnym padźe wot 11. apryla.
Ukrainske knihi zawěsćić
Krótkopowěsće (22.04.22)
Juristiske přepruwowanje
Lipsk/Zhorjelc. Wokrjes Zhorjelc da předpisy ze sakskeho zakonja wo zarunanju financow, posledni raz změnjeneho loni 31. měrca, wot wustawoweho sudnistwa w Lipsku přepruwować. Wokrjes widźi so zranjeny w swojim prawje samozarjadnistwa a měni, zo swoje wustawoprawnisce kazane financielne minimalne wuhotowanje zaručene njeje. To wustawowe sudnistwo wčera zdźěli.
Incidenca dale pod 500
Budyšin. Z hódnotomaj 494,6 w Budyskim a 335,7 w Zhorjelskim wokrjesu je incidenca po Roberta Kochowym instituće dźensa w Hornjej Łužicy dale pod 500. RKI je za wokrjes Budyšin 524 natyknjenjow z koronawirusom a smjertnej padaj podał. Wokrjes Zhorjelc rozprawješe wčera wo 274 infekcijach a třoch zemrětych schorjenych z doby 9. do 16. apryla.
Dźeniki Šwjele w LND wušli
