Krótkopowěsće (23.12.22)
Dalša kritika na Wićazu
Drježdźany/Berlin. Kritika na hodownym postrowje Budyskeho krajneho rady Uda Wićaza (CDU) zaměstnjenje ćěkancow nastupajo njewomjelknje. Berlinska socialna senatorka Katja Kipping (Lěwica) komentuje tón jako „překročenje prawa a zapowědźenje dźěła“. Sakska justicna ministerka Katja Meier (Zeleni) wumjetuje Wićazej, zo demokratiju, prawnostatnosć a dostojnosć čłowjeka z nohomaj tepta. Sakska předsydka FDP Anita Maaß rěči wo wulkim spodźiwanju, kotrež je Wićaz mjez demokratami wubudźił.
Kniha na dobro rewitalizacije
Groß Köritz. Nowa publikacija „Serbsku rěc dožywiś – Sorbisch erleben“ je tele dny wušła. Wona bu we wobłuku idejoweho wubědźowanja Załožby za serbski lud mytowana. Wuměłča Karen Ascher a žurnalistka Dörthe Ziemer stej „knihu sobučinjenja za dorosćenych“ wuhotowałoj.
Božemje City
Krótkopowěsće (22.12.22)
Policajski rewěr přepodali
Budyšin. Modernizowany Budyski policajski rewěr bu wčera w přitomnosći sakskeho ministra nutřkowneho Armina Schustera (CDU) přepodaty. 2017 běchu bywšu žurlu přetwarili, lěto pozdźišo hosćenc zapřijeli. W nětko wotzamknjenym třećim twarskim wotrězku su rumnosće zajeća, garderoby a sanitarne wobłuki wobnowili.
Wysoki chorobny staw
Drježdźany. Wo rekordnym chorobnym stawje informuje chorobna kasa technikarjow (TK) w Sakskej. Mjez pola njeje zawěsćenymi ludźimi, kiž wšědnje na dźěło chodźa, je aktualnje 5,19 procentow chorych pisanych. To je wjace hač hódnota 4,16 procentow loni. Hišće wšitke daty njekmanosće dźěłać njepředleža, tola „ležimy z choropisanjemi hižo nětko nad ličbami minjenych lět“, zwěsći Alexander Krauß, nawoda TK w Sakskej.
Začuće wěstoty skrućić
Krótkopowěsće (21.12.22)
Wusud podpěry mordarstwa dla
Itzehoe. 97 lětna Irmgard F., něhdyša sekretarka koncentraciskeho lěhwa Stutthof pola Gdańska, bu podpěry mordarstwa dla na dwulětne chłostanje z pruwowanskim časom zasudźena. Krajne sudnistwo Itzehoe dóńdźe k wusudej na zakładźe młodźinskeho chłostanskeho prawa, dokelž běše wobskoržena za čas njeskutka hakle mjez 18 a 19 lětami stara.
SMiLE-studije wozjewjene
Washington. Smithsonian institut we Washingtonje je nětko wšitke studije projekta SMiLE wo rěčnej rewitalizaciji w sydom europskich mjeńšinach wozjewił. Mjez nimi je tež nastawk wo hornjo- a delnjoserbšćinje dr. Cordule Ratajczakoweje (Budyšin) a prof. dr. Nicole Dołowy-Rybińskeje (Waršawa). Wozjewjenje bu na Budyskej SMiLE-konferency w juniju 2019 připowědźene.
Prěni Leopard w Čěskej
Krótkopowěsće (20.12.22)
Noweho předsydu wuzwolili
Budyšin. Na zhromadźiznje towaršnikow Marketingoweje towaršnosće Hornja Łužica-Delnja Šleska su wčera noweho předsydu wuzwolili. Tak budźe w přichodźe krajny rada Budyskeho wokrjesa Udo Wićaz (CDU) na čole skutkować. Jako městopředsydu su towaršnicy jeho Zhorjelskeho kolegu w zastojnstwje dr. Stephana Meyera (CDU) pomjenowali.
Wodarnja jenož zdźěla dopušćena
Wojerecy. Wšelakich njeregularnosćow dla, kotrež běchu při přepruwowanjach w Ćiskowskej wodarni zwěsćili, je planowany dźensniši zazběh dźěła jenož zdźěla móžny. Po wuprajenju jednaćela Wolfa-Thomasa Hendricha su kritiski dźěl w naprawje lokalizowali a dźěłaja na tym problem rozrisać. Pitna woda je w Němskej najlěpje pruwowane zežiwidło.
Kosowo chce do EU
Krótkopowěsće (19.12.22)
Bajka „Dyrkotawka“ serbsce
Budyšin. ARD-produkcija „Dyrkotawka“, bu wčera w Budyskim kinje prěni raz w serbskej rěči swójbam předstajena. Film bu hakle minjene tydźenje w Lipšćanskim studiju do serbšćiny w nadawku MDR synchronizowany. Móžeće sej bajku wot dźensnišeho sem w ARD-mediatece wobhladać.
Initiatiwa Domowiny
Budyšin. Chorhoje němskeho mócnarstwa do stawizniskeje knihi zaměnić – tutón poskitk chce Domowina na dźensnišej Budyskej póndźelnišej demonstraciji wobdźělnikam činić. Z tym chce wědomje přećiwo zapřisahanskim předstawam rozšěrjeć. Akciju, kotraž dyrbi so dale pokročować, zarjaduje Domowina w kooperaciji ze syću za demokratiju a mnohotnosć „tvBUNT“.
Personalne rozšěrjenje
Wojerecy. Stejnišćo rentoweje zawěsćernje Knappschaft Bahn-See we Wojerecach klětu wot pjeć na 40 dźěłowych městnow wutwarja. Zwjazkowe ministerstwo za dźěło je minjeny pjatk wotpowědne spěchowanske připrajenje sakskemu ministrej za dźěło Martinej Duligej (SPD) dało. Naprawa je wobstatk zasydlenja dźěłowych městnow w brunicowych regionach.
Krótkopowěsće (16.12.22)
Kubłanska jězba do Berlina
Budyšin. Wjace hač 30 Serbow z Hornjeje a srjedźneje Łužicy přebywaše hač do wčerawšeho dwaj dnjej na kubłanskej jězbje w Berlinje, mjez nimi tež městopředsyda Domowiny, Marko Hančik. Přeprosyła běše zapósłanča zwjazkoweho sejma Kathrin Michel (SPD) z Kamjenca. Skupina sćěhowaše debatu w parlamenće, rozmołwješe so ze zapósłanču a wopytaše pomnik za w nacionalsocializmje zamordowanych Sintow a Romow.
Berlinski akwarij so puknył
Berlin. Znata Berlinska turistiska atrakcija, wulko-akwarij „Sealife“ w bliskosći Berlinskeje tachantskeje cyrkwje, je so dźensa rano puknył. Hoberska akwaristiska konstrukcija – 16 metrow wysoka a 1 000 kubiknych metrow wody z 1500 rybami wobjimaca – je nětko z wulkeho dźěla zničena. Tež wjacore sta hosći pódlanskeho hotela su potrjecheni.
LEAG podpěra Łužiske tafle
Krótkopowěsće (15.12.22)
Debata wo etaće
Drježdźany. Sakski krajny sejm je dźensa štyridnjowske wuradźowanja wo dwójnym etaće swobodneho stata 2023/2024 zahajił. Tón chcedźa zapósłanče a zapósłancy w rekordnym cyłkownym wobjimje wjace hač 49 miliardow eurow přichodny wutoru popołdnju schwalić. Dźensa, jutře, póndźelu a wutoru budźa wo budgetach jednotliwych ministerstwow k debatować.
Incidenca na podobnym niwowje
Drježdźany. Oficialna incidenca korony dla w Sakskej je na podobnym niwowje kaž tydźenja. Ličba přizjewjenych nowonatyknjenjow na 100 000 wobydlerjow w běhu sydom dnjow wučinješe po Roberta Kochowym instituće dźensa 179,1. Minjeny štwórtk běše tale hódnota 175,8, před dwěmaj tydźenjomaj 201,9. Incidenca po cyłym Zwjazku je aktualnje 239,6.
Wukubłaja ukrainskich wojakow
Krótkopowěsće (14.12.22)
Dekada kontaktneho běrowa
Praha. Sakska statna ministerka za justicu, demokratiju, Europu a runostajenje Katja Meier (Zeleni) je wčera jubilejny swjedźeń składnostnje 10lětneho wobstaća kontaktneho běrowa Swobodneho stata Sakskeje w Praze zahajiła. „Běrow je so z wažnym instrumentom europskeje politiki swobodneho stata stał – za politiku a za wšo, štož ludźi w Sakskej a Čěskej zwjazuje“, ministerka zjima.
Miliony za „digitalnu kliniku“
Choćebuz. Carla Thiemowy klinikum w Choćebuzu ma přichodnje jako „wodźaca digitalna chorownja“ strowotniske zarjadnišća regiona zwjazać. Za to je dohromady 85 milionow eurow z fondsa za strukturnu změnu we Łužicy k dispoziciji. Za „natwar digitalneho fundamenta“ pyta klinikum za něhdźe 50 IT-fachowcami, mjez druhim za projektowy management a analyzu datow.
Słowo lěta: Dźensa hišće!
Krótkopowěsće (13.12.22)
Žadyn centralny dom za asyl
Budyšin. Sejmik Budyskeho wokrjesa je wčera planowany nowy kwartěr za požadarjow azyla we Wojerecach wotpokazał. Krajnoradny zarjad chcyše w Kinajchće twarjenje za zhromadny přebytk najimać. Namjet njeje trěbnu wjetšinu hłosow dóstał. Do toho běchu so wokrjesni radźićeljo a radźićelki z namjetom přewšo kontrowersnje rozestajili.
Spektakl na nócnym njebju
Wotrow. „Geminidy“, po wšěm zdaću zbytki rozpadaneho małoplaneta Phaeton, wobradźeja wobdźiwarjam nócneho firmamenta tele dny najsylniši prud hwězdźinow lěta. Dźensa a jutře hodźa so hižo po chowanju słónca hač do 60 meteoritow na hodźinu wobkedźbować. Wjeršk pruda z něhdźe 150 hwězdźinami na hodźinu pak wostanje tudyšim přećelam astronomije zakryty, wšako wotměje so jutře popołdnju.
Mjenje młodych žlokarjow
Krótkopowěsće (12.12.22)
Wikowarjo z optimizmom
Lipsk/Drježdźany. Wikowanski zwjazk Sakskeje hlada po třećej adwentnej njedźeli optimistisce na dochody wobchodow do hód. Kaž jednaćel Gunter Engelmann-Merkel praješe, tež wjedro dobremu wobrotej dopomha: „Wjele ludźi zymske drasty nakupuje.“ Najebać inflaciju widźa někotři wobchodnicy podobnu situaciju kaž do pandemije.
Z prominentnymi awtorami
Drježdźany. Dom Ukrainy w Drježdźanach přichodny štwórtk, 15. decembra, prominentnych awtorow z kraja wot wójny potrjecheneho předstaja. Nimo Sofije Andruchowyč wočakuja Andrija Ljubku a Romana Malynowskyja na čitanje a rozmołwu, kaž zetkawanski centrum dźensa informowaše. 1982 rodźena Andruchowyč je znata z lěta 2016 wozjewjenym romanom „Der Papierjunge“.
„Čěski“ móst w Sakskej
