Krótkopowěsće (30.09.21)
Dźeń a wjace infekcijow
Budyšin. Incidenca w Budyskim wokrjesu je po RKI dźensa na 70,1 stupała. 42 nowonatyknjenjow z koronawirusom je tamniši strowotny zarjad wčera zwěsćił. Za Zhorjelski wokrjes podachu dźensa po RKI incidencu 54,7. Tam su wčera 45 nowych infekcijow registrowali, štyri z toho z delta-wariantu wirusa.
Mjenje bjezdźěłnych
Budyšin. W septembrje je wolóženje dźěłowych wikow we wuchodnej Sakskej pokročowało. Tak je tu aktualnje 17 074 bjezdźěłnych, 437 resp. 2,5 procentow mjenje hač w awgusće, kaž Budyska wotnožka Zwjazkoweje agentury za dźěło dźensa informuje. Kwota bjezdźěłnosće je na 6,2 procentaj spadnyła, to je 0,4 mjenje hač měsac do toho. Bjezdźěłnosć bliži so pomału niwowej do koronapandemije, piše předsydka jednaćelstwa Budyskeje agentury Kathrin Groschwald.
Jenož mało dešćika
Krótkopowěsće (29.09.21)
Incidenca snadnušce stupała
Budyšin. Incidenca po Roberta Kochowym instituće je dźensa w Budyskim wokrjesu 55,4 a w Zhorjelskim 47,1. Wobě hódnoće ležitej nad incidencu Sakskeje 45,3. Wokrjes Budyšin rozprawješe wčera wo 32 natyknjenjach z koronawirusom. Wot 330 schorjenych lěkuja tam dźewjeć w chorowni. Zhorjelski wokrjes rozprawješe wčera wo 42 infekcijach, 15 pacientow tam w klinice zastaruja.
Namjety za swětowe herbstwo
Drježdźany. Železniski cyhelowy móst přez dolinu rěki Göltzsch we Vogtlandskim wokrjesu a Mišnjanski pórclin chce Sakska jako nowej kandidataj za Swětowe kulturne herbstwo UNESCO konferency kulturnych ministrow přizjewić. Kabinet je tomu wčera přihłosował. Na kandidatnej lisćinje steja dale zahrodkowe město a ansambl festiwalneho domu w Hellerauwje kaž tež architekturny ansambl při Viji Regia w Zhorjelcu.
Hudźić w prózdninach
Krótkopowěsće (28.09.21)
Incidenca zaso trochu niša
Budyšin. W Budyskim wokrjesu su wčera wo 74 natyknjenjach z koronawirusom rozprawjeli. Ličba wobjimuje zdobom pady wot kónca tydźenja. Incidenca tu je po Roberta Kochowym instituće dźensa z 54,5 trochu niša, a we wokrjesu Zhorjelc je 32,7. Tam informowachu wčera wo 20 infekcijach w minjenych třoch dnjach. Aktualna sydomdnjowska incidenca hospitalizacije w Sakskej je 0,96.
Nowy spěw wozjewili
Budyšin. Skupina Astronawt je sobotu nowy spěw z mjenom „Hory módre“ wozjewiła. Lil Handrij je rap za štučki napisał. Dohromady je na produkciji jědnaće hudźbnikow sobu skutkowało. Nimo toho wustupi skupina Astronawt sobotu w telewizijnej show „Das große Deutschland-Quiz“. Wusyłanje je w mediatece ZDF přistupne.
Za prózdne bydlenja pokućić?
Krótkopowěsće (27.09.21)
Nětko rjadowanje 3G płaći
Budyšin. W mnohich wobłukach płaći wot wčerawšeho w Budyskim wokrjesu rjadowanje 3G. Poskitki smědźa jenož testowani, wustrowjeni abo šćěpjeni wužiwać. Nimo toho wobsteji winowatosć zwěsćenja kontaktow. We wokrjesu bě hač do pjatka pjeć dnjow za sobu kritiska hódnota 35 překročena. Drobne wikowanje je z toho wuwzate. Roberta Kochowy institut je dźensa za Budyski wokrjes incidencu 60,1 a za Zhorjelski 36,7 podał.
Nowa čłonka w předsydstwje
Budyšin. Čłonojo Serbskeho młodźinskeho towarstwa Pawk su sobotu na hłownej wólbnej zhromadźiznje w Budyšinje Luizu Winarjec za nowu čłonku do předsydstwa wuzwolili. Jakuba Wowčerja wobkrućichu jako předsydu. Po wosom lětach w předsydstwje, z toho štyri jako předsydka, rozžohnowachu Francisku Grajcarekec z gremija. Towarstwu přisłuša tuchwilu 17 młodostnych.
Praha – najrjeńše město
Krótkopowěsće (24.09.21)
Ministerka pola Delnjoserbow
Choćebuz. Braniborska kulturna ministerka Anja Schüle (SPD) je dźensa Domowinsku župu Delnja Łužica wopytała. W Choćebuskim Serbskim domje rozmołwješe so wona z předsydu Domowiny Dawidom Statnikom, z městopředsydu dr. Harmutom Leipnerom a z jednaćelom třěšneho zwjazka w Delnjej Łužicy Marcusom Końcarjom.
Z incidencu hospitalizacije
Budyšin. Wot dźensnišeho płaći w Sakskej nowe škitne postajenje korony dla. Nowe měritko za posudźowanje połoženja je sydomdnjowska incidenca hospitalizacije, kotraž je po RKI dźensa w Sakskej 0,89. Wčera informowachu w Budyskim wokrjesu wo 19 natyknjenjach z koronawirusom. Incidenca je tu po RKI dźensa z 48,7 štwórty dźeń za sobu nad hódnotu 35, za wokrjes Zhorjelc je RKI 29,5 podał. Tam bě wčera 16 infekcijow.
Zhromadne prócowanja
Krótkopowěsće (23.09.21)
Wjetša ličba natyknjenjow
Budyšin. Ličba natyknjenjow z koronawirusom w Budyskim wokrjesu dale přiběra. Krajnoradny zarjad je wčera wo 57 informował. Runje tak stupa tu incidenca, po RKI wučinja wona dźensa 46,6 a je tuž třeći dźeń za sobu nad hódnotu 35. Za wokrjes Zhorjelc poda RKI dźensa incidencu 26,3. Tam rozprawjachu wčera wo 25 infekcijach.
Serbski sejm Michel přijał
Njebjelčicy. Tudyša direktna kandidatka SPD za wólby zwjazkoweho sejma Kathrin Michel je dźensa Njebjelčicy wopytała. Z wjesnjanostu Tomašom Čornakom (CDU) rozhladowaše so wona po wsy a poby w pěstowarni. Po tym su ju čłonojo Serbskeho sejma wo idejach za kulturnu a kubłansku awtonomiju a wožiwjenju serbskeje kultury, rěče a identity informowali.
Pjenjezy za přemysło
Krótkopowěsće (22.09.21)
Zaso smjertny pad
Budyšin. W Budyskim wokrjesu rozprawjachu wčera wo 15 natyknjenjach z koronawirusom a wo jednym smjertnym padźe. Wot 229 schorjenych lěkuja sydom w chorowni. Incidenca tu po RKI je dźensa ze 40,9 třeći dźeń za sobu wyša hač 35. Za Zhorjelski wokrjes podawa RKI incidencu 20,4. Tež tam informowachu wčera wo 15 nowoinfekcijach.
Dźeń wotewrjenych duri njebudźe
Budyšin. Němsko-Serbske ludowe dźiwadło je lětuši dźeń wotewrjenych duri wotprajiło. Kaž w nowinskej zdźělence domu rěka, „tuchwilne połoženje tajke zarjadowanje njedowola. Wěstotne wotstawki njehodźa so za jewišćom, w magacinach a na chódbach dodźeržeć. Ćežkeje wutroby smy so tuž rozsudźili 3. oktobra planowane zarjadowanje wupadnyć dać.“
Doba zapodaća so kónči
Krótkopowěsće (21.09.21)
Incidenca dale nad hódnotu 35
Budyšin. Budyski wokrjes je wčera wo 44 natyknjenjach z koronawirusom wot minjeneho pjatka informował. Incidenca je drje tu dźensa po Roberta Kochowym instituće ze 37,2 niša hač wčera, ale znowa nad prohowej hódnotu 35. Za wokrjes Zhorjelc poda RKI dźensa incidencu 20. Wot zašłeho pjatka bě tam 14 dalšich infekcijow, kaž z krajnoradneho zarjada zdźělichu.
Brězan wobkrućeny
Čorny Chołmc. Pětr Brězan wostanje předsyda towarstwa Serbski kulturny turizm. Čłonojo su jeho wčera w Čornochołmčanskim Krabatowym młynje w zastojnstwje wobkrućili. Městopředsydka je Stephanie Bierholdtec. Nowemu předsydstwu přisłušeja dale Helena Wjacsławkowa, Hana Budarjowa, Cornelia Schnippa, Milena Stockowa, Dorothea Tschöke a Babette Zenkerowa.
Njedowolena registracija
Krótkopowěsće (20.09.21)
Hódnota 35 překročena
Budyšin. Z incidencu 45,0 po Roberta Kochowym instituće je Budyski wokrjes dźensa kritisku hódnotu 35 překročił. Wostanje-li to pjeć dnjow za sobu, nabudu dalše škitne naprawy płaćiwosće. Minjeny pjatk bě tu 25 nowych natyknjenjow z koronawirusom. W Zhorjelskim wokrjesu rozprawjachu wo šěsć infekcijach. Incidenca po RKI je tu dźensa 21,6.
Wuspěšna bilanca festiwala
Bart. 2. hornjołužiski komornohudźbny festiwal je so minjeny pjatk w Bartskej cyrkwi wuspěšnje zakónčił. Wot 10. do 17. septembra móžachu na dźewjeć zarjadowanjach dohromady wosom stow wopytowarjow witać. 45 wuměłcow ze 14 krajow hudźeše na sydom koncertnych městnach we wjesnych cyrkwjach a hrodach. Štyri wodźenja po tworni klawěrow C. Bechstein we Wodowych Hendrichecach a kulturnopolitiska podijowa diskusija su program skulojćili.
Móža sportowu halu wobnowić
Krótkopowěsće (17.09.21)
Wuběrk europeady wuradźował
Wojerecy. Wuběrk za přihoty koparskeje europeady je wčera we Wojerecach wuradźował. Po wozjewjenju jeje klětušeho termina na kongresu FUEN je planowanska doba zaso jasna. Tež nowy trenar balokoparjow z Delnjeje Łužicy Sven Ballack (SN informowachu) so wčera předstaji. Nimo planowanja treninga a zetkanjow hrajerjow serbskeho mustwa rozjimachu wužadanja wuskich hrajnych planow w braniborskich a sakskich ligach.
Incidency snadnje stupałoj
Budyšin. Snadnje zwyšenu incidencu 32,5 je Roberta Kochowy institut dźensa za Budyski wokrjes podał. Wčera informowachu tu wo 15 natyknjenjach z koronawirusom. Ze 171 schorjenych su štyri dale w chorowni. Wo 15 infekcijach rozprawja tež wokrjes Zhorjelc, hdźež po RKI incidenca 22,4 wučinja.
Hotuja so na 147. schadźowanku
