Krótkopowěsće (07.01.21)
Dalše 35 smjertnych padow
Budyšin. Z wčera zwěsćenymi 428 nowymi koronanatyknjenjemi je so incidenca w Budyskim wokrjesu na 440 zwyšiła. Dźesać pacientow w starobje 76 do 88 lět je zemrěło. Aktualnje je 2 508 ludźi inficěrowanych (+326), 138 (+15) z nich w klinice lěkuja. Wokrjes Zhorjelc rozprawješe wčera wo 392 dalšich infekcijach a 25 smjertnych padach w zwisku z koronu. Indicenca tam je 399,64.
CDU zjězd znowa přestorči
Budyšin. Wokrjesny zwjazk CDU Budyšin za sobotu planowany zjězd, na kotrymž chcedźa kandidata za wólby zwjazkoweho sejma nominować, znowa přestorči. To je amtěrowace předsydstwo hromadźe z mandatnymi nošerjemi a předwidźanym kandidatom Rolandom Ermerom wčera rozsudźił, kaž wokrjesny jednaćel CDU Filip Wjerš zdźěli. Přičina je podlěšenje lockdowna.
Seniorojo namołwjeni pisać
Krótkopowěsće (06.01.21)
Natyknjenja zaso přiběraja
Budyšin. Koronanatyknjenja w Budyskim wokrjesu zaso přiběraja. Wokrjesny strowotniski zarjad informowaše wčera wo dalšich 269 padach, nimale 4,5 króć telko kaž póndźelu. Sydom pacientow w starobje 80 do 99 lět je zemrěło. Incidenca bě wčera 418. 202 nowoinficěrowaneju, jědnaće smjertnych padow w zwisku z koronu a incidencu 372,34 mějachu w Zhorjelskim wokrjesu.
Platforma znowa njepřistupna
Drježdźany. „Techniske problemy“ su po informacijach sakskeho ministerstwa za kultus přičina mylenjow na kubłanskej platformje LernSax. Wčera njebě strona docyła přistupna a njehodźeše so hač do dźensnišeho připołdnja běžnje wužiwać. LernSax je wosebje tuchwilu wot doma wuknjacym wažna platforma, na a z kotrejž wšědnje přerěznje 80 000 šulerjow dźěła.
Wo Europje jako domiznje
Krótkopowěsće (05.01.21)
Wosom smjertnych padow
Budyšin. W Budyskim wokrjesu su wčera 60 nowych koronanatyknjenjow zwěsćili. Ličba smjertnych padow rozrosće wo wosom na 329. Wot 2 053 (-22) schorjenych lěkuja 115 w klinice (+14). Zhorjelski wokrjes informowaše wčera wo dźewjeć nowych infekcijach. Tamniša incidenca wučinješe 368,78, w Budyskim wokrjesu 401,3.
Za předsydku SŠT
Chrósćicy. Katharina Jurkowa, rěčnica regiona župy Kamjenc „Michał Hórnik“, kandiduje za předsydku Serbskeho šulskeho towarstwa. Wosom požadarjow za nowe předsydstwo, z kotrychž staj dwaj z Delnjeje Łužicy, je so na to dojednało. Na naprašowanje našeho wječornika Jurkowa zdobom wobkrući, zo je Załožba za serbski lud přizwoliła financować dźěłowe městno hłownohamtskeho jednaćela SŠT.
Snadnuški postup sezony dla
Budyšin. W decembrje 2020 bě we wuchodnej Sakskej 18 135 bjezdźěłnych, to je 379 resp. 2,1 procent wjace hač w nowembrje. Kaž Budyska wotnožka agentury za dźěło dźensa wozjewi, jedna so wo snadnuški postup sezony dla. Posrědkowarjam agentury je 4 598 socialneho zawěsćenja winowatostnych dźěłowych městnow k dispoziciji. To je 252 mjenje hač w decembrje.
Krótkopowěsće (04.01.21)
Staw w pokładni zwěsćić
Drježdźany. Sakska ma po słowach ministerskeho prezidenta Michaela Kretschmera (CDU) po koronapandemiji staw w pokładni zwěsćić. Hdyž su z najhóršeho won, měli sej kóšty wobhladać, rjekny premier Kretschmer powěsćerni dpa w Drježdźanach. Za Zwjazk a kraje dźe wo priority a doby, w kotrychž dołh wróćo płaća, zo njeměli přichodne generacije za to rukować.
CDU najbóle dowěrjeja
Lipsk. Sakscy wolerjo stronje CDU dale najbóle dowěrjeja. Po rozprawje w dźensnišim wudaću Leipziger Volkszeitung by wona při wólbach krajneho sejma 34 procentow docpěła. Jako druha najsylniša slěduje AfD ze 26 procentami. Lěwica by na jědnaće procentow přišła, Zeleni na dźesać a SPD na 7,7. FDP by z pjeć procentami znowa do krajneho sejma zaćahnyła. Knježerstwowa koalicija CDU, SPD a Zelenych by wjetšinu z 51 procentami zakitowała.
Sakscy Zeleni z rekordom čłonow
Krótkopowěsće (30.12.20)
Ličby dale na wysokim niwowje
Budyšin/Zhorjelc. Ličba pozitiwnje na koronawirus testowanych wostawa we Hornjej Łužicy dale wysoka. W Budyskim wokrjesu zličichu wčera 219 nowych natyknjenjow, 28 ludźi je zemrěło. Sydomdnjowska incidenca na 100 000 wobydlerjow wučinja 431. W Zhorjelskim wokrjesu zličichu 193 nowych natyknjenjow, 16 ludźi je zemrěło. Sydomdnjowska incidenca wučinja tam 404.
Najebać pandemiju spokojom
Ochranow. Dobry internetny wustup wobradźi manufakturje Ochranowske hwězdy najebać koronapandemiju dosć dobry wotbytk. Kaž delnjoserbski rozhłós rozprawja, je zawod njehladajcy wupadnjenych adwentych wikow z předanju znatych hwězdow spokojom. W nowembrje su woprawdźity nawal w onlineshopje dožiwili. Hewak wobdźěla so kóždolětnje na 40 wikach.
Kemše w katedrali budu
Krótkopowěsće (29.12.20)
Infekcije dale přiběraja
Budyšin. Ličba na koronawirus schorjenych w Budyskim wokrjesu je so wčera wo 58 na dohromady 2 181 inficěrowanych zwyšiła. Jedyn pacient je zemrěł, 339 ludźi je so wustrowiło. Incidenca je snadnje woteběrała, na 100 000 wobydlerjow je so 450,66 natyknyło. Zhorjelski wokrjes, hdźež su wčera šćěpić započeli, informuje wo dohromady 4 741 infekcijach (+ 54), incidenca wučinja tam 426,5.
Statnik namołwja k solidariće
Budyšin. Předsyda Domowiny Dawid Statnik w na Youtube-kanalu třěšneho zwjazka přistupnej hodownej narěči k „solidariće z wutrobu a rozumom“ w zwisku z koronapandemiju namołwja. Najpozitiwniši aspekt lěta 2020 je za njeho, zo „njeje to serbske hižo pyšny připlack, ale zakładny kamjeń zhromadneje regionalneje identity“.
Wobrot jasnje stopnjowali
Žitawa. Zhotowjer tunkadłow Fit je nalěto na naprašowanje Sakskeje produkciju desinfekciskich srědkow zahajił. Tele rozšěrjenje sortimenta je předewzaću stopnjowanje lětušeho wobrota wo něhdźe 15 procentow wobradźiło, byrnjež wulki dźěl šaržow spočatnje darmotnje na přikład chorownjam dodawali.
Krótkopowěsće (28.12.20)
Incidenca hód dla woteběrała
Budyšin. Přez hody je ličba na koronawirus schorjenych w Budyskim wokrjesu wot minjeneje srjedy hač do wčerawšeho wo 665 woteběrała. To zwisuje z wobmjezowanymi testami. W samsnej dobje bě 32 smjertnych padow, cyłkownje je to nětko 246. Wčerawša incidenca je 461,37. Zhorjelski wokrjes informuje wo 774 zwěsćenych natyknjenjach wot 23. decembra. Incidenca bě wčera 408,35.
Spěchowanske srědki do Wojerec
Drježdźany/Wojerecy. Wojerowski klinikum łužiskeje jězoriny je tele dny spěchowanske srědki we wobjimje 100 000 eurow dóstał. Pjenjezy podpěruja studiju wuwjedźomnosće za projekt „Virtual Smart Hospital Wojerecy“. Tajki móže wažny twarski kamušk za naslědne strukturne wuwiće za město Wojerecy a za dalewuwiće Łužicy na region wočerstwjenja a strowoty być, rěka ze sakskeho ministerstwa za regionalne wuwiće.
Wuspěšne lěto za twornju Fit
Krótkopowěsće (23.12.20)
Dale na wysokim niwowje
Budyšin. Wysoki niwow nowonatyknjenjow z koronawisusom do hód njepopušći. W Budyskim wokrjesu zwěsćichu wčera 278 dalšich padow, dźesać pacientow w starobje 71 do 98 lět je zemrěło. Schorjenych je 2 796 (-51), z nich w klinice 154 (-4) lěkuja. Wokrjes Zhorjelc rozprawješe wčera wo 249 nowoinfekcijach a dalšich sydom smjertnych padach. Tamniša incidenca je 644,97, Budyska 658,3.
Hodowne hudźbne widejo
New York. „Christmas Time is Here“ je titul noweho hudźbneho wideja Caroliny Eyckec. Spěw z lěta 1965, kotryž staj Vince Guaraldi a Lee Mendelson za wosebite telewizijne wusyłanje „A Charlie Brown Christmas“ skomponowałoj, je serbska hudźbnica za teremin a hłós aranžowała. Přidatnje je tež karaoke-wersiju na swojim Youtube-kanalu wozjewiła.
Za wotewzaće njewotewrjeć
Budyšin. Wobchody njesmědźa wotewrjeć, zo bychu tam kupcy do toho online skazane twory wotewzali. Tomu přizwolić je Sakske wyše zarjadniske sudnistwo Budyšin wčera wotpokazało. W chwatnym jednanju sudnicy rozsudźichu, zo je jenož wobchodam a wikam wšědneje potrjeby a zakładneho zastaranja dowolene wotewrjeć.
Krótkopowěsće (22.12.20)
Incidenca dale nad 600
Budyšin. Po kóncu tydźenja zwěsćichu w Budyskim wokrjesu wčera 90 dalšich koronainfekcijow, šěsć pacientow je wumrěło. Aktualnje schorjenych je 2 847 (-237), w klinikach lěkuja 158 (+5). Wo dźewjeć nowonatyknjenjach a 19 dalšich smjertnych padach informowaše póndźelu Zhorjelski wokrjes. Incidenca wučinja tam 634,68, w Budyskim wokrjesu 664.
Přiwozmu wopomnišćo w Swóńcy
Drježdźany. Załožba sakskich wopomnišćow prócuje so wo nošerstwo wopomnišća na česć woporow eutanazije w Swóńcy (Großschweidnitz), kaž je to jeje załožbowa rada minjeny pjatk wobzamknyła. Sakske knježerstwo ma krokej hišće přihłosować. Hromadźe z wopomnišćom Pirna-Sonnenstein nasta tak w mjenowanej załožbje fachowy zwjazk za přeslědźenje nacionalsocialistiskeje eutanazije a k wopominanju jeje woporow.
Akt přećiwo serbskej kulturje
Krótkopowěsće (21.12.20)
Z najwyšej pokutu pochłostany
Magdeburg. W procesu prawicarskoteroroweho nadpada w Halle nad Solawu dla je wyše krajne sudnistwo Naumburg wusud dźensa na krajnym sudnistwje w Magdeburgu wozjewiło. Wobskorženy Stephan Balliet je zasudźeny k jastwu na čas žiwjenja, čemuž přizamknje so wěstotna jatba. Nimo toho bě Naumburgske wyše sudnistwo wosebitu ćežkosć winy zwěsćiło.
Wšitke łoža wobsadźene
Budyšin. W Budyskim wokrjesu zwěsćichu wot pjatka hač do wčerawšeho 839 nowonatyknjenjow z koronawirusom. Dalšich 36 wosobow je zemrěło. W chorownjach wokrjesa je wot njedźele wšitke 40 łožow na intensiwnych stacijach z koronapacientami wobsadźenych. Krajnoradny zarjad je pjatk wjacore dźěłowe městna wobmjezowane na dobu pandemije wupisał, zo móhli kontakty lěpje sćěhować.
Sportowcy lěta 2020
