Policija (17.03.17)
Pjenjezy kradnyli
Nuknica. Njeluby wopyt mějachu spočatk tydźenja w Nuknicy. Kaž nowinski rěčnik Zhorjelskeje policajskeje direkcije zdźěli, su so tam njeznaći wutoru w běhu dnja do bydlenskeho domu burskeho statoka zadobyli. Při tym mějachu sej skućićeljo poměrnje lochko, dokelž njeběchu durje zamknjene. Z běrowoweje rumnosće pokradnychu listowej wobalce. W kóždej z njeju bě štyricyfrowa suma pjenjez, kaž w policajskim reporće dale rěka. Kriminalisća pad přepytuja.
Policija (16.03.17)
Paduch drasty lepjeny
Kamjenc. Z tym drje 28lětny paduch zawčerawšim dopołdnja w Kamjencu ličił njebě. Na Klóšterskej hasy hrabny sej wón před modowym wobchodom wjacore dźěle drasty a so w bliskim domje zhubi. Tam wón etikety z płaćiznu wotstroni. W tym wokomiku staj jeho ciwilnaj policistaj Kamjenskeho rewěra, kotrajž běštaj njeskutk wobkedźbowałoj, překwapiłoj a młodeho muža zaještaj. Sobudźěłaćerjo modoweho wobchoda scyła hišće pytnyli njeběchu, zo bě so drasta w hódnoće 200 eurow zhubiła.
Policija (15.03.17)
Rekord spěšnosće nastajiła
Nowe Błohašecy. Ze swojim wosobowym awtom typa VW je młoda žona wčera w Nowych Błohašecach dotalny negatiwny rekord w lětušej statistice spěšnosće w Budyskim wokrjesu nastajiła. Na statnej dróze S 111 błysknychu ju při wobchadnej kontroli ze 124 km/h, a to při dowolenych 50 km/h. Hrěšnica dyrbi nětko 680 eurow pokuty płaćić, tři měsacy nóžkować a dóstanje nimo toho dwaj dypkaj w Flensburgu.
Policija (14.03.17)
Awto so wupaliło
Połčnica. Njelubu překwapjenku dožiwi žona wčera rano w Połčnicy. Jako chcyše ze swojim awtom na dźěło jěć, dyrbješe wustróžana zwěsćić, zo bě jeje jězdźidło dospołnje wupalene. Bjez toho zo bychu wobydlerjo z jeje bydlenskeho doma abo ze susodnych domow abo pěšcy to pytnyli, bě w nocy w Citroënje z dotal njeznateje přičiny woheń wudyrił. Při tym so wosobowe awto dospołnje zniči. Móžno, zo zwisuje tónle pad z tym, zo bě so žona hakle njedawno wot swojeho 48lětneho žiwjenskeho partnera dźěliła. Kaž policija informuje, tčeše za woknotrějakom awta někajka powěsć muža. Što je w njej dokładnje stało, znate njeje. Policija nětko podhlada zapalerstwa dla přepytuje.
Policija (13.03.17)
Hač chcedźa rjedźić?
Wojerecy. Swojoraznu a skerje njezwučenu rubiznu wupytachu sej paduši, kotřiž běchu so w času wot pjatka popołdnja hač do soboty ranja do wjaceswójbneho domu we Wojerecach zadobyli. Z jedneje z pincow pokradnychu tři bleše płokanskeho srědka kaž tež blešu rjedźenskeho srědka za nuzniki w cyłkownej hódnoće 15 eurow. Hač trjebaja je za nalětnje rjedźenje, bohužel znate njeje.
Policija (10.03.17)
Hólčkej žiwjenje wuchowali
Brětnja/Michałki. Dźakowano swojemu angažowanemu a wobhladniwemu jednanju su zawčerawšim wjacore žony při jězoru w Brětni/Michałkach blisko Wojerec třilětneho hólca před smjerću wuchowali. Tón bě něhdźe w 15.30 hodź. na bliskim hrajkanišću dohladej swojeje maćerje twochnył. Mać hnydom za nim pytaše a wuhlada jeho, kak bjez pohiba na wodźe jězora płuwa. Jeje wołanje je wjacore žony w bliskosći na njezbožo skedźbniło. Wone skočichu do wody, wućahnychu dźěćo z wody a započachu je reaniměrować, doniž přiwołany nuzowy lěkar njepřijědźe. Wuchowanski helikopter dowjeze třilětneho do specialneje kliniki. Po informacijach policije hólčk hižo w žiwjenskim straše njeje. Policija dźakuje so žonam za jich kuražowane jednanje, z kotrymž su dźěsću žiwjenje wuchowali.
Policija (09.03.17)
Žonje žiwjenje wuchowali
Kamjenc. 31lětnej žonje w Kamjencu su policisća zawčerawšim po wšěm zdaću žiwjenje wuchowali. Wona bě hladarnju w měsće wopušćiła a bě w psychisce napjatym połoženju. Policisća za njej blisko dwórnišća pytachu a namakachu ju při zachodźe do tunla, hdźež steješe na kolijach a čakaše na bližacy so ćah. Zastojnicy lokomotiwnika warnowachu a sćahnychu žonu z kolijow. Bjez tajkeho wobhladniweho jednanja by najskerje k tragiskemu njezbožu dóšło, kaž w policajskej rozprawje rěka.
Policija (08.03.17)
Wolij woheń zamiškrił
Pomorcy. Wohnjowych wobornikow, wuchowansku słužbu a policiju su zawčerawšim wječor do Pomorc wołali. W kuchni 77lětneje žony paleše so hornc z horcym wolijom. Jako rentnarka wobradu wuhlada, wupřestrěwachu so płomjenja hižo na kuchinske kamory. Dobrowólne wohnjowe wobory z Pomorc, Bukec, Kubšic a Błócan přijědźechu z dźesać jězdźidłami a wjace hač 60 wobornikami, kotřiž móžachu hóršemu zadźěwać. Žonu a jeje dwě lěće staršeho mandźelskeho dowjezechu do chorownje. Wěcna škoda w potrjechenym bydlenju a w tym poschod niže wučinja dohromady 25 000 eurow.
Diesel kradnyli
Kamjenc. We wulkim stilu su njeznaći minjeny kónc tydźenja w Kamjencu diesel kradnyli. Na twarnišću na Sewjernej hasy wotklumpachu z třoch twarskich mašinow wjace hač tysac litrow ćěriwa a načinichu tak 1 200 eurow škody. Kaž policija zdźěli, su twarscy dźěłaćerjo paducham njeskutk chětro wolóžili. Wěka tankow twarskich mašinow drje běchu začinjene, nic pak zamknjene.
Policija (07.03.17)
Tójšto cigaretow namakali
Horni Wujězd. 400 pakćikow cigaretow su policisća wčera rano we wosobowym awće na awtodróze A 4 namakali. W Litawskej přizjewjeny Peugeot, kotryž bě do směra na Drježdźany po puću, kontrolowachu zastojnicy na parkowanišću w Hornim Wujězdźe. Podhladneju w starobje 33 a 36 lět zajachu. Dawkowa škoda wučinja něhdźe 15 000 eurow.
Policija (06.03.17)
Kolesowar padnył a zemrěł
Roholń. Tragiski wukónc měješe kolesowanska jězba 75lětneho muža sobotu popołdnju blisko Wojerec. Wón bě něhdźe w 16.30 hodź. na kolesowanskim puću podłu statneje dróhi S 108 z Wojerec do směra na Roholń we Łazowskej gmejnje po puću. Hišće do wsy wón z dotal njeznateje přičiny a po wšěm zdaću bjez wobdźělenja dalšich wosobow ze swojim trekingowym kolesom padny a so na hłowje ćežko zrani. Byrnjež ludźo zastali a trěbne prěnje pomocne naprawy zawjedli, muž hišće na městnje njezboža zemrě. Wobchadna njezbožowa słužba policije pad přepytuje.
