Policija (27.10.16)
Z wopačnym busom sobu jěł
Kamjenc. Jako pomocnik we wšitkich žiwjenskich połoženjach wopokazachu so wčera rano policisća w Kamjencu. Wołał bě jich wodźer busa měšćanskeje linije, dokelž sedźeše w jeho jězdźidle dźěćo, kotrež bě po wšěm zdaću do wopačneho busa zalězło. Wobsadka policajskeho awta informowaše mać sydomlětneho a dowjeze hólčeca na to do jeho zakładneje šule. Wón bě čisło busa zaměnił a tak do wopačneho směra jěł. Při tym zhubi orientaciju w měsće. Kak je so wón čuł, jako z policajskim awtom do šule přijědźe, bohužel znate njeje.
Policija (26.10.16)
Awto radšo zamkać
Kamjenc. Po tym zo bě nakupowała, połoži 79lětna žona zawčerawšim w Kamjencu swoju ručnu tobołku do awta. Jězdźidło pak wona njezamkny, dokelž chcyše jenož nakupowanski wozyčk wotstajić. Tule lochkomyslnosć rentnarki bě po wšěm zdaću paduch wobkedźbował. Přetož jako so wona wokomiki pozdźišo k awtu wróći, bě ručna tobołka fuk. Na te wašnje zhubi žona tež swoje wupokazy, wosobinske papjery a něšto stow eurow. Policija tuž radźi swoje awto radšo stajnje zamkać, wšojedne hač steji wone na priwatnej ležownosći, na puću před domom abo na parkowanišću.
Policija (25.10.16)
W hribach so zabłudźił
Běła Woda. Pytanje za 59lětnym mužom je so zawčerawšim pola Běłeje Wody zbožownje skónčiło. Wón bě sobotu swoju bydlensku skupinu w hladarni wopušćił a chcyše w lěsu wokoło Brusnika hriby pytać, při čimž so zabłudźi. Dohromady bě 18 wuchowanskich psow a wjace hač 50 policistow zasadźenych.
Policija (24.10.16)
Parkowanje wjele pjenjez płaćiło
Wojerecy. Tójšto škody načini sobotu připołdnju 80lětna wodźerka Hyundaija, jako chcyše na Wojerowskej Stormowej parkowanišćo wopušćić. Dokelž po wšěm zdaću přejara na płun stłóči, zajědźe jeje awto přez łuku a zasta hakle při sćěnje bydlenskeho domu, hdźež prasny do balkona. Škoda na jězdźidle, na sćěnje kaž tež na balkonje wučinja něhdźe 10 000 eurow. Šoferka so na zbožo njezrani.
Policija (21.10.16)
Štrus jenož kołp był
Ćisk. K njewšědnemu zasadźenju wołachu policiju wčera rano w Ćisku. Tam přizjewichu so sobudźěłaćerjo zawoda na Industrijnej hasy a měnjachu, zo běchu tam štrusa wuhladali. Jako wobsadka policajskeho awta přijědźe, wukopa so pozdatny afriski ptak jako młody kołp, kiž bě tam po wšěm zdaću mylnje přizemił. Někajki strach znajmjeńša z tohole ptaka njewuchadźeše.
Policija (20.10.16)
Do bagra a kontejnera
Hodźij. Wjele prócy nałožowali su njeznaći, jako so w nocy na wutoru při statnej dróze S 111 mjez Hodźijom a Třomi Hwězdami do kontejnera zadobychu, kotryž twarska firma jako skład wužiwa. Paduši wotamknychu najprjedy durje bagra, kiž běchu twarscy dźěłaćerjo jako zadźěwk před kontejner wotstajili. Po tym zo běchu z ćežkej mašinu nabok jěli, łamachu so do kontejnera. Z njeho wzachu dlěši milinowód a wšelki grat. Hódnotu rubizny njemóžeše Zhorjelska policajska direkcija hišće podać. Wěcna škoda na bagru a na kontejneru pak wučinja něhdźe 2 500 eurow. Kriminalna policija nětko tónle pad přepytuje a spyta paduchow wuslědźić.
Policija (19.10.16)
Přehłuboko do škleńcy hladał
Poršicy. Při kontroli wosoboweho awta typa Honda policisća w nocy na wutoru w Poršicach zwěsćichu, zo měješe jeho šofer 2,26 promilow alkohola w kreji. Na to woni 43lětnemu zakazachu dale jěć a sej jeho jězbnu dowolnosć hnydom wobchowachu.
Policija (18.10.16)
Při wohenju so zraniłoj
Wóspork. Skóncowany elektriski domjacy nastroj bě po wšěm zdaću na tym wina, zo je zawčerawšim rano we Wósporku woheń w jednoswójbnym domje wudyrił. Kaž policija zdźěli, so płomjenja po bydlenskej stwě rozpřestrěwachu. Při tym so dwě wosobje snadnje zraništej. Wobornicy z Wósporka, Malećic, Hrodźišća a Nosaćic woheń zhašachu. Wěcna škoda wučinja něhdźe 8 000 eurow.
Paduchow lepili
Budyšin. Podhladneju paduchow metala su w nocy na njedźelu při Budyskim Koporniku lepili. Swědk wobkedźbowaše, kak chcyštaj so mužej w starobje 26 a 35 lět do firmy zadobyć, w kotrejž běchu wšelake družiny metala składowane. Swědk informowaše policiju, tak zo móžachu zastojnicy zakročić. Policija pad dale přepytuje.
Policija (17.10.16)
Na třělnišću zachadźeli
Komorow. Hakle po jednym tydźenju su minjenu sobotu zwěsćili, zo běchu so njeznaći na terenje třělnišća w Komorowje pola Klukša do tamnišeje towarstwoweje baraki zadobyli. Kaž policija zdźěli, pobrachuja tam nětko nuzowy milinowy agregat, kara a něhdźe 200 metrow milinowoda w cyłkownej hódnoće 2 000 eurow. Přiwołany kriminalny technikar namaka tójšto slědow, dokelž běchu skućićeljo baraku runjewon zapusćili. Z tysac eurami bě tuž tež wěcna škoda chětro wobšěrna.
Policija (14.10.16)
Štyri kolesa pokradnyli
Njedźichow. W Njedźichowje su so nje- znaći wčera na Otto Buchwitzowej do wjaceswójbneho domu zadobyli. Přez zachodne durje, kotrež nałamachu, podachu so skućićeljo do pincy, zwotkel znajmjeńša štyri kolesa pokradnychu. Wysokosć škody wučinja po prěnim trochowanju policije něhdźe 750 eurow.
Awto zamknjene njebyło
Wojerecy. Lochko mějachu so paduši srjedu popołdnju we Wojerecach na Thomasa Müntzerowej. Dokelž njebě tam wotstajene awto zamknjene, štož njeznaći wuskušichu, móžachu z njeho bjez wulkich napinanjow tošku z dokumentami a móšnju sobu wzać. Wěcna škoda wučinja něhdźe 150 eurow. Wjetša škoda za škodowaneho pak je, zo dyrbi nowe swójske dokumety wobstarać.
