Policija (16.12.19)
Do awta so zadobyli
Mały Wjelkow. Njeznaći su so pjatk w nocy do Renaulta zadobyli, kotryž bě na priwatnej ležownosći w Małym Wjelkowje wotstajeny. Kaž policija zdźěla, rozbichu paduši wokno awta, spakosćichu z njeho kapu, w kotrejž běchu tež móšnja, nawigaciski nastroj a kapsna lampa. Hódnotu rubizny trochuja zastojnicy na něhdźe tysac eurow, wěcna škoda wučinja 250 eurow.
1,8 promilow naměrili
Brěznja. Sobotu něhdźe wo połnocy je policija w Brězni chětro wopiteho wodźerja Toyoty zwěsćiła. Přewjedźeny test wunjese, zo měješe 50lětny 1,8 promilow alkohola w kreji. Wón dyrbješe tuž ze zastojnikami sobu, zo bychu jemu krej za dalši test wotewzali. Jězbnu dowolnosć mužej nablaku sćazachu. Nimo toho přepytuja přećiwo njemu wopiłstwa we wobchadźe dla.
Rejwarjo nuznje pytani
Budyšin (SN). Kamjentny dom w Budyšinje chce nowe lěto tež nowy rjad z rejwanskimi a hudźbnymi dźěłarničkami zahajić. Kaž jeho wjednistwo zdźěla, chcedźa pod hesłom „Artopolis“ Budyšin jako město rejwanja wuhotować. „Organizujemy zhromadnje z Korzymskej skupinu TanzART, z Jelenjogórskim kulturnym centrumom a profesionalnymi nawodami dźěłarničkow zetkanja zajimowanych młodostnych, němskich kaž pólskich“, pisa sobudźěłaćer Budyskeho Kamjentneho domu Michael Lippold. Zdobom wón na to skedźbnja, zo měrja so na młodostnych wot 14 lět. Započeć chcedźa z „wulkim zahajenjom“ kónc tydźenja 10. do 12. januara. Ma to być zazběh napjateho a kreatiwneho poł lěta, we wobłuku kotrehož chcedźa ze wšěmi wobdźělnikami inscenaciju „Woči wulkoměsta“ zdźěłać. „Zahajenje ma tomu słužić so rejujo zeznać a so w dźěłarničkach načasna a měšćanska reja a breakdance wukmanić. W februaru slěduja intensiwne workshopy, a tam zestajamy němsko-pólsku inscenaciju. W juniju chcemy ju předstajić.“
Na adwentne spěwanje
Zelena swěca za festiwal
Najebać lětuši minus chcedźa klětu znowa swjećić
Hamor (AK/SN). Na wuchodnym přibrjohu Bjerwałdskeho jězora w gmejnje Hamor přewjedu klětu wot 30. julija do 2. awgusta dalši openair-festiwal „Break the rules“. Jednohłósnje je Hamorska gmejnska rada na swojim minjenym posedźenju wobzamknyła, za to wotzamknyć wužiwanske zrěčenje mjez gmejnu a zarjadowarjom GBG GmbH z Niskeje. Tak sćěhowaše wona poručenje Klětnjanskeje (Klitten) wjesneje rady. Potrjechenych wobsedźerjow płonin pak ma zarjadowar sčasom do přihotow zapřijeć.
Na lětuši prěni festiwal bě něhdźe 6 500 hosći přišło, 5 500 z nich wužiwaše campingownišćo. Cyłkowne kóšty festiwala wučinjachu 745 000 eurow. „Sumu dawno njejsmy z dochodami kryć móhli. To pak běchmy zaplanowali“, rozłoži organizator swjatka a jednaćel firmy GBG Toni Heide. „Festiwal trjeba dołhodobne přihoty. Z nazhonjenjow wěmy, zo trjebaš dwě do tři lěta, prjedy hač čorne ličby pisaš.“
Třeći króć wotměchu minjeny pjatk w starej wowčerni ...
Krótkopowěsće (16.12.19)
Z plusbusom po puću być
Budyšin/Kamjenc. Z nowym jězbnym planom jězdźa w Budyskim wokrjesu tak mjenowane plusbusy. Mjez prěnimi štyrjomi zwiskami je linija 102 Budyšin–Kamjenc. Plusbusy posłužuja zastanišća hodźinsce přeco w samsnej mjeńšinje. Na te wašnje chcedźa wjesny rum lěpje ze srjedźnymi a hornimi centrami zwjazać. Tak jězdźi bus wšědnje nimo njedźele hač do pózdnjeho wječora.
Nimale 4 000 ludźi wupućowało
Kamjenc. Nimale 4 000 wobydlerjow Sakskeje je w minjenym lěće wupućowało, zdźěla krajny statistiski zarjad w Kamjencu. Najwjac ludźi přesydli so do Šwicarskeje, Awstriskeje a USA. Přerězna staroba wupućowacych bě 33 lět, a wjac hač połojca z nich běchu mužojo. Cyłkownje ćehnjechu Saksojo do 127 krajow, najwjetši dźěl pak wosta w Europje.
Kak na „wusydlenje“ zhladuja
Policija (13.12.19)
Katalyzatory z awtow kradnyli
Rakecy/Wojerecy. Katalyzatory su po wšěm zdaću mjez paduchami jara woblubowane. Kaž policija zdźěla, ma so mjeztym z wjacorymi tajkimi padustwami rozestajeć. Mjez druhim su wčera w Rakecach njeznaći hnydom z awtow katalyzatory wutwarili. Škoda wučinja wjac hač 3 000 eurow. Tež we Wojerecach su paduši z Hondy katalyzator wurězali.
Kontrowersa w Slepom traje
Gmejnska rada a wjesnjanosta wo dalšim postupowanju njepřezjednaj
Slepo (AK/SN). Kontrowersa nastupajo přichod stareho twarskeho zawoda w Slepom dale traje. To wujewi njedawne wuradźowanje tamnišeje gmejnskeje rady, kotraž wobzamkny po dołhej a horcej diskusiji z dźewjeć přihłosowanjemi a třomi přećiwnymi hłosami zakładny rozsud. Po nim gmejnska rada próstwu podpisacych towarstwow přizwoli. Te chcedźa docpěć, zo gmejna tepjenje, zachodne durje, nabóčne durje kaž tež wokno stareho gmejnskeho domu na tamnišim starym twarskim dworje ponowi. Za to smědźa, tak we wobzamknjenju rěka, hač do 12 000 eurow ze srědkow za wjes Slepo z krajneje pawšale Swobodneho stata Sakskeje k spěchowanju wjesneho ruma wužiwać.
