Kamjenc (SN/mwe). Nowy jednaćel chorownjow maltezow w Kamjencu a Zhorjelcu je wotsrjedź nowembra Sven Heise. Kaž w nowinskim wozjewjenju katolskeje pomocneje organizacije w Kölnje rěka, „wjedźe Heise towaršnosć do přichoda a ma managementowu zamołwitosć za wobě chorowni. Wón přewozmje w Kamjenskej chorowni swj. Jana runočasnje překupsku direkciju a nawodnistwo stejnišća.“ W Zhorjelskej chorowni swj. Carolusa wostanjetej tutej funkciji dale w dotalnych rukach.

Najebać to, zo je něhdźe 350 sobudźěłaćerjow hojernje w Lessingowym měsće předawanskich planow maltezow dla tuchwilu trochu napjatych, so wšitcy dale dospołnje na swoje dźěło w medicinskim wobłuku, ale tež zwonka njeho koncentruja. K tomu słušeja poskitki za pacientow a wobydlerjow w adwenće.

Wojerecy (SN). Porodna stacija Wojerowskeho klinikuma łužiskeje jězoriny zhladuje wćipnje na kónc lěta. Chibazo narodźi so tam hižo wokoło hód 600. dźěćo? Hižo srjedź oktobra móžachu baby a dźěćacy lěkarjo 500. porod w chorowni registrować. „Póńdźe-li tak dale, móhło tu 600. dźěćko hišće do hód na swět přińć“, wjeseli so nawjedowaca baba w klinice Sabine Waschulewski.

1 800 projektow w regionje

Budyšin (SN). Podźěl 18lětnych w Sakskej, tež w Hornjej Łužicy, kotřiž su wot chudoby wohroženi, wučinja něhdźe 15,4 procenty. Podźěl 18- do 25lětnych je samo na 31,5 procentow rozrostł. To je za wobdźělnikow akcije „genialsocial-lokalne“ z přičinu jim pomhać. Wšako su sej předewzali, nimo mjezynarodneje podpěry w Africe abo Srjedźnej Americe tež tudyšim potrěbnym pod pažu přimać. Tuž chcedźa 30 procentow z cyłkownych dochodow lětušeje akcije za něhdźe 1 800 w regionje projektow wužiwać.

Wopity kradnył a z awtom jěł

Njeswačidło. Wutoru wječor je w Njeswačidle muž z terena firmy płunowe bleše spakosćił. Kedźbliwy wobydler to widźeše a zawoła policiju. W Čelchowje móžachu zastojnicy paducha krótko na to zajeć. W jeho awće namakachu šěsć prózdnych płunowych blešow. Alkoho­lowy test wunjese, zo měješe 44lětny 2,14 promilow alkohola w kreji.

Strukturny koncept za hospodarske plany 2020 do 2023 wobzamknjeny

Trjebin (AK/SN). Gmejna Trjebin hotuje so na ćežke financne časy. Reagowała je wčera gmejnska rada na to ze strukturnym konceptom hospodarskich planow za lěta 2020 do 2023. Wjetšina gmejnskich radźićelow je na wurjadnym posedźenju strukturnemu konceptej přihło­sowała.

Komornica Carmen Petrick koncept rozłoži. Zakładny dawk B za wobtwarjenje kaž wobtwarjomne ležownosće postupi klětu ze 412,5 na 427,5 procentnych dypkow. Popłatki za šulsku jědź tohorunja zwyša. To bě gmejnska rada hižo 6. nowembra wobzamknyła. Tak lutuje komuna wob lěto něhdźe 4 200 eurow. „Smy tež w zarjadnistwje a z wjesnjanostu za móžnosćemi lutowanja pytali“, Petrick wuswětli. „Potencial widźimy w personalnych kóštach dźělnje přistajenych z mało dźěłowym časom a we wotrjedźe hórnistwa. Te městna wotpadnu. Njedóstawamy za to žane financne srědki wjac.“