Swinjacej mrětwje na kóždy pad zadźěwać
Zhorjelc (AK/SN). Wot wuchodneje Pólskeje na zapad rozpřestrěwacu so afrisku swinjacu mrětwu chcedźa na kóždy pad zadźeržeć. Za to planuje Zhorjelski wokrjes najwšelakoriše naprawy. „Najnowše pady mrětwy mějachmy jenož hišće dźesać kilometrow před braniborskej krajnej mjezu a dwanaće kilometrow před Sakskej. Rěčimy tu wo mrětwje mjez dźiwimi swinjemi, kotraž so poněčim bliži“, praji dr. Ralph Schönfelder, hamtski skótny lěkar a nawoda zarjada za dohladowanje žiwidłow/weterinarneho zarjada, na nowinarskej rozmołwje.
Krótkopowěsće (18.05.20)
Hladanska słužba potrjechena
Budyšin/Zhorjelc. Ličba z koronawirusom natyknjenych je přez kónc tydźenja w Budyskim wokrjesu wo dźewjeć na 457 přiběrała. W ambulantnej hladanskej słužbje w Kinsporku kaž tež w Halštrowskej hladarni su infekciju zwěsćili a dalšich ludźi testowali. Dalša wosoba je zemrěła. Wokrjes Budyšin registruje dotal 14 smjertnych padow w zwisku z pandemiju. W Zhorjelskim wokrjesu je dale 268 infekcijow. Tam je dotal 22 wosobow wirusa dla zemrěło.
Na prašenja wotmołwjał
Budyšin. Sakski ministerski prezident Michael Kretschmer (CDU) je minjeny pjatk w Budyskim hosćencu „Alter Bierhof“ na prašenja hosćencarjow sprjewineho města wotmołwić spytał. Zarjadowanje bě tež přez internetnu syć Facebook sćěhujomny. Wosebje připosłucharjo su składnosć wužiwali a ministerskemu prezidentej kritiske prašenja stajeli.
Normalizuja bliskowobchad
Za zmylkami pytać
Policija (15.05.20)
Proša wobydlerjow wo pomoc
Kamjenc. Hnydom 26 pakćikow parfima je njeznaty z wobchoda na Kamjenskim torhošću spakosćił. Kupča bě wobkedźbowała, kak sej paduch twory w cyłkownej hódnoće 900 eurow do zakow tyka. Byrnjež awtomatiski alarm wobchoda zaskočił, móžeše něhdźe 1,80 metrow wulki muž ćeknyć. Policija nětko wobydlerjow wo pomoc prosy. Štóž je něšto widźał abo ma informacije k padej, njech to Kamjenskej policiji zdźěli.
Gmejna ma inkluziski nadawk
W tučasnej koronapandemiji prawu městnosć za posedźenja gmejnskeje rady namakać njeje lochko, tež za Worklečanskeho wjesnjanostu Franca Bruska (CDU) nic.
Worklecy (JK/SN). Jědźernja Worklečanskeje šule je jenička móžnosć, kotraž žadanjam wotpowěduje. Tam wšak wjesnjanosta poprawom mikrofon z wótřerěčakom trjeba, zo bychu jeho wšitcy słyšeli. Najebać to su posedźenja wunošne.
Poprawom su wobzamknjenja wo twarskich próstwach wobydlerjow rutina a spěšnje schwalene. Wčera pak su radźićeljo wo twarskej próstwje w Smječkecach trochu dlěje wuradźowali. Wobydler chce něhdyše znate a woblubowane zetkawanišćo „Schil so“ na bydlenski dom přetwarić. Najprjedy pak chce je zwottorhać. Někotři radźićeljo mějachu wobmyslenja, zo so potom twarjenje zhubi, kotrež je z mnohimi stawiznami a anekdotami zwjazane. To pak je wjesny chronist wobkedźbował, a zhromadnje z twarskim knjezom budźetaj wšitko dokumentować.
Budyske nalěćo wirtuelnje
Budyšin (CS/SN). Tučny swjedźenski paket bě wjelelětny organizator Budyskich měšćanskich swjedźenjow Andreas Hennig tež za lětuše Budyske nalěćo spřihotował. Měješe to takrjec jeho rozžohnowanski dar być, wšako so na wuměnk poda. Mjeztym pak je jeho program jenož hišće makulatura. Koronakrizy dla dźě so swjatk kaž zwučene njewotměje.
Hennig a jeho sobuwojowarjo pak nochcedźa swjatkowny kónc tydźenja bjez kultury w sprjewinym měsće wostać. A tak přińdźechu na tele dny w mnohich wobłukach wupruwowanu formu livestreaminga. Byrnjež drje kóždy lóšt njeměł poskićenja jeno před kompjuterom sćěhować, je to přiwšěm móžnosć, wuměłcow a přihladowarjow hromadu wjesć. Zdobom je to hudźbnikam znajmjeńša mała přiležnosć, swoje straty dochodow trochu wurunać.
Doma, doma rjenje je
Serbske Nowiny namołwjeja swojich čitarjow, pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće nam na . K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Pětr Šołta z Budyšina je nam satiru podał:
„Nano, kelko je 4 340 dźělene přez 35?“
„To su twoje domjace nadawki, nic moje!! Lič sam!“
„Sym žno, ja přińdu na 116 ...“
„Njehódaj, lič!!“
„Ale Tina mi přeco něšto do włosow tyka ...“
„Gor nic.“
„Tina, přestań a mysli na swój plakat wo kolesu.“
„Činju tola. Kak rěkaja špejchi serbsce, nano?“
„Hladaj do słownika!“
„Hdźe tón je? Móžeš mi jón přinjesć?“
„Ně, sym w kupjeli, Tim je zaso raz do cholowow činił.“
„Ach, tohodla je jow tak smjerdźało ...“
„Je tón tajki nakakany na mojim łožu sedźał?“
„Njewěm, lič ty swoje nadawki!“
„A hdźe je tón słownik?“
„Što wěm ja, to su twoje šulske wěcy. To dyrbiš ty wědźeć ...“
„Ooowww ...“
„Tina je moju knihu začiniła!“
„TINA!“
Krótkopowěsće (15.05.20)
Dźěći dale wosebje potrjechene
Budyšin/Zhorjelc. Ličba z koronawirusom natyknjenych je w Budyskim wokrjesu wo dalšich dźewjeć na 448 přiběrała. Wulki dźěl nowoinficěrowanych su dźěći, kotrež su so zwjetša doma pola swójbnych natyknyli. Dohromady je 115 wosobow schorjenych, z nich 19 w chorowni. 320 ludźi je so wustrowiło. W Zhorjelskim wokrjesu wosta ličba inficěrowanych z 268 dale konstantna. Tuchwilu je tu 25 schorjenych, jednoho lěkuja w klinice. 221 ludźi je zaso strowych.
Wo lěsu mnozy mało wědźa
Drježdźany. Dźěło hajnikow a lěsnikow je njezbytne za zachowanje lěsa a tuž hódne za cyłu towaršnosć. To wujewi reprezentatiwne naprašowanje wo lěsu a lěsnistwje w Sakskej, kotrež je wičnoslědźenski institut hopp w nadawku zarjada Sachsenforst přewjedł. Mnozy ludźo pak wo funkciji lěsa a jeho wobhospodarjenju wjele njewědźa.
Hudźbne lěćo wupadnje
Zahrodny festiwal njebudźe
Policija (14.05.20)
Wopity paduch popadnjeny
Budyšin. Twory w hódnoće nimale 500 eurow, mjez nimi wjacore elektriske graty, je paduch předwčerawšim w kupnicy na Drježdźanskej dróze w Budyšinje spakosćić chcył. Jako jeho sobudźěłaćer narěča a zadźerža, spyta 37lětny ćeknyć a wobaraše so, při čimž jeho lochko zrani. Najebać to muž skućićela dźeržeše, doniž policija njepřijědźe a jeho sobu njewza. Přewjedźeny alkoholowy test wunjese 1,74 promilow. Kaž policija zdźěli, běchu 37lětneho hakle njedawno z jastwa pušćili. Wčera su jeho hnydom zaso jatbowemu sudnikej předstajili.
