W rozmołwje druheho zeznali
Budyšin (CS/SN). W rjedźe Budyskich rozmołwow dźěše zawčerawšim w Kamjentnym domje wo to, zhonić kak so ćěkancy w sprjewinym měsće čuja, što su dožiwili a što sej přeja. Kaž moderator Christian Schramm rjekny, chcedźa so woni rady z Budyšanami rozmołwjeć. Jenož při mjezsobnym zetkanju, hdyž so jako čłowjek a susod zbližiš, móže jedyn wot druheho něšto zhonić.
Zo bychu tajke rozmołwy zmóžnili, wutworichu cyłkownje dźesać rozmołwnych kołow, w kotrychž tu bydlacy wukrajnicy domoródnych zetkaja. Do toho rozprawještaj před wšitkimi něhdźe sto wopytowarjemi zarjadowanja Khalid Butt a Samira Doudak wo swojich nazhonjenjach. Khalid Butt je mnohim Budyšanam znaty jako mějićel indiskopakistanskeho hosćenca Shalimar. Pakistančan bydli hižo 27 lět w Němskej, z toho 17 lět w Budyšinje. W tym času je wón tolerancu a zhromadne žiwjenje z tu bydlacymi ludźimi nawuknył. Jeho nazhonjenje je, zo je jenož čłowjek wažny, nic pak nabožina a pochad.
Tež serbske zapřahi namołwjene
Ramnow (BZ/SN). Lětuša Ramnowska hrodowa kołojězba konjacych zapřahow wotměje so 5. junija mjeztym 19. raz. Na něhdźe 30 kilometrow dołhej čarje změja wobdźělnicy wuhlad na powabnu Hornjołužisku pahórčinu.
Start a cil budźetej při Ramnowskim hrodźe, najrjeńšej krajnej baroknej připrawje Sakskeje. Kołojězba startuje dopołdnja w dźewjećich. Do cila přijědu zapřahi něhdźe w 14 hodź. K zabawje budu podłu čary stacije z překwapjenkami spřihotowane. Při baroknym hrodźe čakaja na wopytowarjow bohaty program a najwšelakoriše kulinariske poskitki. Młodźinski klub a dobrowólna wohnjowa wobora planujetaj nimo dźiwadłoweje hry tež program za dźěći.
Kołojězba nima w prěnim rjedźe charakter wubědźowanja, skerje steji wjeselo w srjedźišću. Wšitke wobdźělene zapřahi budu w dwěmaj kategorijomaj posudźowane. Fachowa jury spožči jim dypki. Nimo toho maja přihladowarjo tři najspodobniše zapřahi hódnoćić. Dobyćerjow chcedźa něhdźe w 15 hodźin mytować.
Zlutniwosć je kaznja časa
Delanscy radźićeljo so z hospodarskim planom 2016 zaběrali
Róžant (JK/SN). Gmejna Ralbicy-Róžant njebudźe a njemóže trěbne powjetšenje abo rozšěrjenje Ralbičanskeje pěstowarnje w přichodnych lětach zwoprawdźić. Swójski podźěl něhdźe 1,5 milionow eurow njemóhła gmejna ani při spěchowanju cyłeho předewzaća zwjesć. To praji wjesnjanosta Hubertus Ryćer (CDU) na wčerawšim posedźenju gmejnskeje rady na naprašowanje ze stron staršiskeje rady pěstowarnje. Přiwšěm zaruča gmejna funkcionalitu a porjad w přebywanišću w Ralbicach kaž tež w Smjerdźacej. Takle zdźěli to gmejna nošerjej Serbskemu šulskemu towarstwu a staršiskej radźe.
Z wjele wutrajnosću konserwěruja Johann Minack a Josi Altmann pod ...
Za šulu wšitke móžnosće pruwować
Někotružkuli diskusiju Łazowskeje gmejnskeje rady je minjene lěta Steffen Mühl nastorčił. „Ja temy jenož na wědomje njebjeru, ale so za jich zmysłom prašam“, měni 47lětny, kiž je za Swobodnych wolerjow Hórnikečanskeho jězora wot lěta 2009 čłon Łazowskeje gmejnskeje rady a Wulkoždźarowskeje wjesneje rady. 24. apryla kandiduje wón za zastojnstwo Łazowskeho wjesnjanosty.
Rodźeny Wojerowčan bydli wot lěta 2001 we Wulkich Ždźarach, hdźež přisłuša předsydstwu domizniskeho towarstwa. W tehdyšej Šibojskej brunicowej jamje je wón powołanje mechanikarja nawuknył a pozdźišo w Choćebuzu twarstwo studował. Dźensa dźěła wón w Grodkowskim předewzaću a wěnuje so saněrowanju starych wobćežmow.
Jako wjesnjanosta chcył wón wobydlerjam přeco blisko być. Přidatne poćežowanje ludźi z popłatkami za dróhotwar, wopłóčki a chódniki měło so jara dokładnje pruwować. Dobre rozrisanje chce Steffen Mühl za Běłochołmčansku šulu nadeńć. Za nju měli so wšitke warianty dokładnje pruwować. Předstajić móhł sej wón běrowowy abo lěkarski centrum.
Krótkopowěsće (19.04.16)
Bamž: Ćěkancy su nam dar
Rom. Bamž Franciskus je ludźi po wšěm swěće namołwjał, so z dóńtom ćěkancow njewotnamakać, ale jich jako wobohaćenje wobhladować. „Přečasto maja was ludźo za přidatnu ćežu. Nawopak! Wy sće nam dar“ rjekny bamž dźensa w Romje składnostnje 35lětneho wobstaća jezuitskeho doma ćěkancow.
Nowy abiturny předmjet
Schwerin. Mecklenburgsko-předpomorski minister za kubłanje, Mathias Brodkorb (SPD) chce, zo stanje so nižoněmčina z předmjetom za maturu. Wot 7. lětnika móhli sej šulerjo nižoněmčinu jako druhu cuzu rěč přiswojić a na wu-zwolenych gymnazijach hač do matury wuknyć. Za to chce Brodkorb wotpowědne wučbnicy wuwiwać dać.
Pišćele za Praski hród
Praha. Pišćele w katedrali swjateho Víta na Praskim hrodźe njejsu kmane, cyły rum łódźe ze zynkom wupjelnić. Wotpomhać měł natwar noweho mócnišeho instrumenta z 10 000 pišćelowymi pišćałkami. Trěbnych 2,6 mio. eurow chcyło Praske arcybiskopstwo tež z pomocu zběrki zhromadźić. Idealnje móhli nowe pišćele k 100. róčnicy załoženja Čěskosłowakskeje w lěće 2018 hotowe być.
Sezonu z wuspěchom zakónčili
Bywši wučer swójbne stawizny napisał
W Slepjanskich kónčinach je Harry Friška, pochadźacy z Trjebina, znata wosoba. Skutkowaše wjele lět na tamnišej šuli jako wučer němčiny, serbšćiny, zemjepisa kaž tež jako zastupowacy direktor.
Zeznach jeho w septembru 1960 na serbskim pedagogiskim instituće w Budyšinje. Wón přińdźeše z produkcije a měješe do studija přihotowanske lěto za sobu. Ja mějach maturu a dwě lěće dźěła za sobu a podach so tohorunja na studij wučerstwa do Budyšina. Połoženje tehdy njebě wjele hinaše hač dźensa, hdyž znowa wučerjo pobrachuja. Bě to sylny semester z mnohimi pozdźišo wuspěšnymi wučerjemi, kiž aktiwnje na dobro serbstwa skutkowachu. Dokelž běchmoj dobraj přećelej mi Harry často powědaše, zo chce jónu swójbne stawizny napisać. Hižo před lětami dóstach k narodninam mału knižku – prěni pospyt jeho nětčišeje knihi. Harry Friška mjenuje ju „Stawizny swójby ze Struga-prowincy“. Smy při zetkanjach husto wo tym rěčeli a ja jeho k pisanju pohonjowach.
Dale po puću předchadnika
1. junija nastupi Alexander Fischer (CDU) swoje zastojnstwo jako nowy wjesnjanosta gmejny Dobruša-Huska. Při tym njetrjeba ani swoje dźěłowe městno změnić. Dobrych pjeć lět je Dobrušan w gmejnskim zarjadnistwje hižo wěcywobdźěłar za twarstwo a ležownosće. Zo su jemu wobydlerjo při prěnich wólbach runje tak dowěru wuprajili kaž při druhich, jeho wulce zwjesela. Dokelž je Alexander Fischer ze swojej domiznu wusko zwjazany, ma wón za wulke zbožo, zo su jeho po studiju krajinoweje architektury a po někotrych lětach jako wědomostny sobudźěłaćer Drježdźanskeje techniskeje uniwersity a po skutkowanju jako poradźowar krajneho kuratorija za wjesny rum w ródnej gmejnje trjebali.
Wulki narok 41lětneho je, zo wobydlerjo w gmejnje wostanu a zo nowi sem přićahnu. Po jeho měnjenju su wuměnjenja za to dobre. Tohodla chce wón po puću swojeho předchadnika Michaela Schulzy dale kročić. Jedyn z wažnych nadawkow budźe nowe twarske ležownosće wotkryć. Hušćanska sportownja, kotraž dyrbi so energetisce saněrować, steji runje tak na programje.
Policija (19.04.16)
Bus so zawróćić chcył
Bukecy. Njewšědny wuskutk měješe wobchadne njezbožo wčera mjez Bukecami a Trjebjeńcu. Tam bě wosobowe awto wotboka do nakładneho awta zajěło. W rynku čakacych jězdźidłow chcyše so bus na dróze zawróćić, suny pak so ze zadnej wósku do přirowa. Jeno z ćežkej techniku móžachu jón wućahnyć.
