Historiski Kapplerowy młyn w Budyskim Židowje je wjele lět chuduški wupadał. Hrožeše samo so sypnyć. Za historiski twarski kompleks při Młynskej hasy běštej tuž jenož hišće dwě opciji.
Židow (ES/SN). Jedna opcija rěkaše rozpad akceptować a jemu přihladować. Druha móžnosć pak bě nańć za ležownosć priwatneho inwestora. Tajki bu na zbožo namakany. W meji 2018 běchu planowanja za podźělny přetwar a kompletny wutwar na komfortabelny bydlenski doma hotowe. Mjeztym stej dwě lěće intensiwneho dźěła zašłoj. Na brjoze Budyskeje Sprjewje nasta krasne domske ze šěsć bydlenjemi, kotrež su mjez 78 a 147 kwadratnymi metrami wulke. Minjeny štwórtk je Budyski restawrator Uwe Konjen zhromadnje ze swojim synom ponowjenej a wjace hač centnar ćežkej kartuši z pěskowca nad portalomaj připrawił. Dezolatneho stawa kartušow dla dyrbjachu jej zdźěla wudospołnić a kruće přičinić. Zdobom staj restawratoraj podstawkowej kamjenjej a historisce wuznamnej lětoličbje přičiniłoj.
Z mopedom njezbožił
Konjecy. Na dróze mjez Konjecami a Koćinu je póndźelu rano napoł dźewjećich 17lětny mopedist znjezbožił. Młodostny běše ze swojej Simson w křiwicy, kotraž doprawa wjedźe, z dotal njeznateje přičiny na lěwym boku z jězdnje na polo zjěł, so tam walił a so při tym ćežko zranił. Wuchowarjo jeho zastarachu a transportowachu znjezboženeho z helikopterom do chorownje. Na mopedźe nasta škoda 500 eurow. Wobchadna słužba nadrobnosće njezboža nětko přepytuje.
Złote rybički spakosćili
Běła Woda. Wobydlerka Puškinoweje hasy w Běłej Wodźe je wčera rano na swojej ležownosći njeznatych wobkedźbowała, kak spytachu rybički z jeje haćika wułójić. Jako to podhladni pytnychu, so z dwaceći złotymi rybami zminychu. Pjenježna škoda wučinja něhdźe 30 eurow. Kriminalna policija z padom so nětko zaběra a pyta dalšich swědkow.
Do zawoda so zadobyli
Wojerecy (SN). Poprawom měješe so we Wojerowskim zwěrjencu wulki swjedźeń wotměć. Tak pak je leopard San cyle woměrje do swojeje noweje, moderneje připrawy zaćahnył. Dźakowano pjenježnym daram a sponsoringej móžachu tam 200 kwadratnych metrow wulku připrawu twarić. „Boli nas, zo njemóžemy so tuchwilneje situacije dla mnohim darićelam wosobinsce dźakować a jich na wotewrjenje přeprosyć“, praji jednaćel předewzaća ZooKultur Arthur Kusber, „chcemy pak to nachwatać, ručež budźe zaso móžno.“ Póndźelu je chinski leopard San prěni króć do připrawy w chinskim stilu zastupił. Wulke kamjenje skića jemu městno za wuhlad a prózdnjeńcy, hdźež móže wotpočować. Bambus, aziski klon a wšelake trawy dopominaja na chinsku krajinu. Wulka škleńca a čorna syć z wocla zmóžnjatej wopytowarjam wid na wulku kóčku, kaž bychu pódla njeje stali.
Ze srědkami z městotwarskeho spěchowanja Zwjazka a kraja móžachu wot lěta 1993 wobličo Wojerowskeho stareho města wo tójšto polěpšić. Z temu zaběrała je so wčera tamniša měšćanska rada.
Wojerecy (AK/SN). W saněrowanskej kónčinje „Wojerecy – centrum, stare město“ su dohromady 30,3 miliony eurow za projekty saněrowanja, modernizowanja a wobnowjenja nałožili. To je Michael Kroll, teamowy nawoda za planowanje městow a objektow towaršnosće Komunalne wuwiće srjedźna Němska w Drježdźanach, wčera na posedźenju měšćanskeje rady zjimał. Wón komunu wot lěta 2003 při saněrowanju stareho města fachowje přewodźa. „Bytostne zaměry su docpěte, saněrowanje je wotzamknjene“, Kroll podšmórny. Měšćanscy radźićeljo na to jednohłósnje wobzamknychu, z widom na nachilace so spěchowanje wustawki wo postajenju saněrowanskeje kónčiny „Wojerecy – centrum, stare město“ zběhnyć.
Dalšej wosobje zemrěłoj
Budyšin/Zhorjelc. W Budyskim wokrjesu stej dalšej wosobje na koronawirus zemrěłoj. Tak rozrosće ličba smjertnych padow na 19. Dale strowotniski zarjad wčera wozjewi, zo su pola třoch wosobow infekciju zwěsćili. W Zhorjelcu so město toho ničo njezměni, tam žanoho na koronu schorjeneho wjac nimaja.
Pomhaja potrěbnym šulerjam
Drježdźany. Swobodny stat Sakska je dźensa zrěčenju ze Zwjazkom wo 500 milionow eurow wopřijacym programje za hnydomne wuhotowanje šulow přihłosował. Tak ma Sakska 25 milionow eurow k dispoziciji, zo móhła mobilne kompjutery za šulerjow kupić, kotřiž tajke nastroje njewobsedźa. Nošerjo šulow maja kompjutery kupić a potrěbnym za přichodne šulske lěto wupožčić.
Nowe čoło frakcije CDU
Budyšin. Rolf-Alexander Scholze předsyduje nětko frakciji CDU Budyskeje měšćanskeje rady, Matthias Knaak je jeho naměstnik. Jeju su měšćanscy radźićeljo CDU předwčerawšim wuzwolili. Wólby běchu trěbne, dokelž bě dotalny frakciski předsyda Karsten Vogt kónc lěta 2019 mandat złožił a měšćansku radu wopušćił.
Slepo. Ewangelska wosada w Slepom přeproša na koncert ze skupinu Kupazukow z Lipska, kaž zdźěli rěčnik wosady Werner Karg. Koncert wotměje so 29. meje wot 19 hodź. na zahrodźe Slepjanskeho farskeho domu na Měrowej 68. Spěwarjo a hudźbnicy přihotuja program ze starymi serbskimi spěwami, Slepjanskimi rejwanskimi melodije a štučkami ze Šotiskeje, Irskeje a Israela. Při tym hudźa na rědko wužiwanych instrumentach. Zastup je darmotny, pjenježny dar pak witany. Wopytowarjo maja žadane škitne naprawy wobkedźbować.
Online-talk čisło dwaj
Kulow (AK/SN). We Wojerecach a Wjelcej nastawaja tuchwilu wšelake wobłuki slědźenja na polu načasneje digitalneje techniki 5G. Techniska uniwersita Drježdźany přepytowanja wědomostnje přewodźa. Do wutwara teleje techniki je wobydlerska iniciatiwa „Žiwi wostać“ na Kulowskej měšćanskej radźe zańdźenu srjedu warnowała. Radźićeljo pak žanežkuli prašenja njemějachu. Hižo loni w septembrje bě Frank Fitzek, profesor za komunikaciske syće pola Telekom, na Wojerowskej měšćanskej radźe zwěsćił, zo so „slědźenja w zhromadnym dźěle z předewzaćemi kaž Nokia, Claas a Liebherr we wobłukach ratarstwo, twarstwo a bydlenje wotměwaja“. Hižo tehdy bě so wot lěta 2008 wobstejaca wobydlerska iniciatiwa kritisce słowa jimała.
Podhladna wóń
Wojerecy. Njedźelu, krótko do połnocy, je policiji na Wojerowskej Hasy Käthy Niederkirchner Ford ze skóncowanym wobswětlenjom awtoweje znački napadnył. Jako zastojnicy Mondeo zadźeržachu a šofer wokno dele wjerćeše, stupaše z jězdźidła markantna wóń konopje. 38lětny Polak reagowaše pozitiwnje na test drogow. Wón njesmědźeše dale jěć a dyrbi nětko z chłostanjom ličić.