Maja noweho změrca
Dobry financny pozadk zaruča w Rakečanskej gmejnje spomóžne dźěło
Rakecy (JK/SN). Po lětnjej přestawce zetkachu so tež Rakečanscy gmejnscy radźićeljo wčera zaso k porjadnemu posedźenju w awli Pawołskeje šule. Dźakowano zlutniwemu hospodarjenju móže sej gmejna Rakecy lětsa přidatne wudawki dowolić. Hłowna přičina za to bě rozprawa wo stawje lětušeho hospodarskeho plana, kotruž poda nawodnica financneho zarjada gmejny Franziska Pfeiffer. Najebać koronakrizu je gmejna swoje hospodarske nadawki derje zmištrowała, a tak móža pod smužku dobry plus dochody kaž tež likwidne srědki nastupajo registrować. Kónc prěnjeho połlěta su hižo 72 procentow dochodow cyłeho lěta zwoprawdźili, a dochody z wobrotoweho dawka su z 72 procentami tohorunja wyše, hač bě to ke kóncej junija planowane.
Wjace digitalneje techniki
Statna zakładna šula „Lernoase“ w Hamorje a tamniša Swobodna wyša šula hotujetej so digitalnu dobu. Načasna technika ma bórze dotal nałožowane srědki, taflu a krydu, narunać.
Hamor (AK/SN). To potwjerdźištaj šulskaj nawodaj Angela Frenzel (zakładna šula) a Ralph Berthold (wyša šula, hdźež tež serbšćinu podawaja), na póndźelnym posedźenju Hamorskeje gmejnskeje rady. „Dźakowano wobšěrnemu spěchowanju móžemy wšitke rjadownje z digitalnymi taflemi wuhotować. Štyri rjadowniske stwy wotpowědnu techniku hižo maja“, Angela Frenzel rozłožuje. „Beamer, laptopy a tafle přichodnje hižo njezmějemy. Wučerjo z digitalnej techniku hižo dosć wěsće wobchadźeja. Tež dźěći so wjesela.“ Podobnje je to na swobodnej wyšej šuli. Wona je runje tak zastarana kaž statne šule. „Srědki tež nam runohódnje přewostajeja“, praji Ralph Berthold.
W Jaworje (na foće), Swinjarni a Kanecach kładu roły za pitnu wodu ...
Kompjutery šulerjam požčić
Radwor (SN/MkWj). Rada Radworskeje gmejny je wčera wobzamknyła kupić 44 iPadow, zo móhli w šuli digitalnu dalnowučbu přewjesć, kaž dyrbjachu jón za čas zawrjenja koronawirusa dla hižo raz praktikować. Za nakup je sakske kultusowe ministerstwo z wosebiteho fondsa něšto wjace hac 20 000 eurow přewostajiło. Tabletowe kompjutery chcedźa dźěćom ze socialnje słabych swójbow wupožčić, zo njebychu žane njelěpšiny měli.
Na posedźenju rozprawješe předsyda wopłóčkoweho zaměroweho zwjazka Mała Sprjewja Andreas Skomudek wo wobšěrnych wopłóčkowych projektach w cyłkownje 66 wsach, za kotrež je zwjazk zamołwity. Z Józefa Nowakowej je najprjedy raz posledni dróhotwarski objekt w Radworju bórze wotzamknjeny. Tam hotuja so potom na dźěła w nowej bydlenskej štwórći při starej Budyskej dróze. Při zliwku před tydźenjemi je so po słowach Skomudeka wopokazało, zo nowe roły na přikład na Lilijowej do směra na Łupoj derje funguja. Dalše twarske dźěła planuja mjez druhim w Boranecach, hdźež su nowe roły za wotwodźenje dešćoweje wody nuznje trěbne.
Krótkopowěsće (17.09.20)
Nowa direktorka powołana
Zhorjelc. Kulturna stawiznarka dr. Agnieszka Gąsior přewozmje 1. meje 2021 zastojnstwo direktorki Šleskeho muzeja w Zhorjelcu. Jelenjogórska wědomostnica bě dotal mjez druhim sobudźěłaćerka Leibnitzoweho instituta za stawizny a kulturu wuchodneje Europy na Lipšćanskej uniwersiće. Wona naslěduje dr. Markusa Bauera, kiž je instituciju wot jeje załoženja 1999 nawjedował.
Dalše pady w Hornjej Łužicy
Budyšin. Wo třoch nowych natyknjenjach z koronawirusom je Budyski strowotniski zarjad wčera rozprawjał. Po tym je aktualnje 44 wosobow schorjenych, dwě z nich lěkuja w chorowni. Zwěsćenej dalšej infekciji na nětk dohromady 15 wozjewi wčera Zhorjelski wokrjes, jednu wosobu tam stacionarnje zastaruja. W karantenje bě wčera 188 wosobow w Budyskim a 39 w Zhorjelskim wokrjesu.
Přemysłowy dawk sobu najwyši
Kermušny nyšpor jako dźak
Serbska cyrkej na Kamjentnej hasy w Budyšinje bu 1240 jako „Cyrkej našeje lubeje Knjenje na Selowych wikach“ dokumentarisce wobkrućena, mjeztym zo jeje spočatki do 11. lětstotka sahaja. Wot 1985 je wona jako filialny Boži dom tachantskej cyrkwi přirjadowana. Kermušu jako dźeń poswjećenja cyrkwje pak swjećachu minjenu njedźelu po dawnym wašnju.
Hižo někotre lěta wuhotuja w Budyskej Serbskej cyrkwi nimo kermušnych kemšow tež wosebity hudźbny nyšpor, lětsa tohorunja. „Dźakować mamy so Bohu za wšě dary a dobroty. Dźakować chcemy so runje tak wšěm, kotřiž so wo Boži dom staraja a so wo njón starosća“, rjekny tachantski farar, prelat Wito Sćapan. Wosadni so serbsce kaž němsce modlachu a spěwachu.
Srědki za zakładnu šulu a gmejnske dźěle wužiwać
Łaz (AK/SN). Sakska gmejna Łaz chce 70 000 eurow lětušeje pawšale Swobodneho stata Sakska za sylnjenje wjesneho ruma wužiwać zaměrnje za Wulkoždźarowsku Zakładnu šulu „Při Hórnikečanskim jězoru“ a za wjesne dźěle. To su gmejnscy radźićeljo wčera potwjerdźili. 50 000 eurow trjebaja za podruž kontejneroweje připrawy při šuli. Za šulerjow trěbny je narunanski twar, nutřkowneho wobnowjenja šulskeho domu dla. Za 15 wjesnych dźělow chce gmejna 20 000 eurow nałožić. Wobzamknjenje za wužiwanje pawšale bě trěbne, dokelž njeběchu so radźićeljo na swojim posedźenju 14. julija dojednać móhli.
Šulerjo kaž něhdy běrny zběrali
Policija (16.09.20)
Z drogami po puću był
Běła Woda. Policija je póndźelu wječor pozdźe młodeho muža w Běłej Wodźe zadźeržała. Wón bě zastojnikam ducy na Schweigowej hasy napadnył. W titce měješe 19lětny pohłušenskej srědkaj marihuanu a crystal.
Křiž pokradnyli
Budyšin. Paduši su minjeny tydźeń na kěrchowje na Budyskej Lubijskej dróze železny křiž pokradnyli. 50 centimetrow wysoki symbol steješe tam wot 1940tych lět. Policija prosy swědkow wo pomoc.
