Baćoń (SN/MWj). Wot 13. julija dyrbja so šoferojo­ pola Baćonja a mjez Smjerdźacej a Šunowom na nadróžne twarnišćo a tuž na zawrjenu dróhu a na wokołopuć ­nastajić.

Kaž Budyski krajnoradny zarjad informuje, zawru wot 13. julija hač do 7. awgusta puć wot kromy Baćonja hač ke křižowanišću Liboń/Prawoćicy/Łusč. Tam chcedźa jězdnju z nowej asfaltowej worštu pokryć a kromy puća přiměrić. Wokołopuć powjedźe přez Haslow, ­Prěčecy a statnu dróhu S 100. Tež busy budu tak jězdźić. Wo změnach maja so sobujěducy z wuwěškow informować.

Dospołnje zawrjena budźe wot 13. julija hač do 21. awgusta tohorunja wo­krjesna dróha K 9232 wot Šunowa hač k hłownemu křižowanišću w Smjer­dźacej. Tež tam ma puć nowu asfaltowu worštu dóstać. Po informacijach krajnoradneho zarjada powjedźe wokołopuć wot Smjerdźaceje přez Róžant, Sernjany a Nowoslicy dale do Ralbic a Konjec hač do Šunowa. Busy pojědu tež tu po wokołopuću. Sobujěducy njech tole w mje­nowanym času wobkedźbuja.

Njedawno je Wojerowske měšćanske zarjadnistwo mějićelow domow na Kulowskej dróze w Němcach na gmejnsku žurlu­ přeprosyło. Chcychu jich wo zakładnym wutwarje statneje dróhi S 95 informować.

Zastupjer Drježdźanskeho projektoweho běrowa Bonk a Herrmann, kotrež hižo druhe nadawki we Wojerecach měješe, přednjese předźěłany plan zakładneho wutwara. Tak ma so 1,19 kilometrow puća­ w třoch wotrězkach wutwarić. Prěni wotrězk je wjesny započatk ze směra do Kulowa hač k mostej, druhi budźe wot mosta hač k Wincencowej hrjebi a třeći hač k wotbóčce ke Kummelowemu młynej. Plan chcedźa w oktobru w měšćanskej radźe schwalić. Twarić ma so wot februara­ 2017 hač do junija 2018. Ru­nočasnje z ponowjenjom dróhi nasta­nje­tej potom chódnik a kolesowanski puć. Wopytowarjo informaciskeho zarjadowanja žadachu sej jasnosć wo připłaćenju. K tomu pak nochcychu so měšćanscy zastupjerjo wuprajić. To wězo wobydlerjow njespokoješe, dokelž maja mnozy wulke ležownosće. Měšćanscy zastupjerjo wobydlerjam přilubichu, jich wo dalšich krokach planowanja prawi­dłownje informować. Achim Nowak

K wobchadnemu pospytej w Budyšinje je wothłós přewažnje pozitiwny. Nimo toho wobsteji přeće, wobchad tež na dalšich­ městnach na tele wašnje rjadować­.

Budyšin (CK/SN). Tuchwilny prowizoriski kružny wobchad na Budyskej Schliebenowej ma so jako trajne rozrisanje porjadnje wutwarić, kaž twarski wuběrk měšćanskeje rady poruča. Po spočatnych mnohich kritiskich hłosach, kotrež mějachu kružny wobchad za přestrašny, jón mjeztym přewažnje pozitiwnje hódnoćeja, praji twarski měšćanosta Peter Hesse. Kružny wobchad je wobchadny prud widźomnje polěpšił – hač na rańši powołanski wobchad, hdyž dochadźa wob­staj­nje k dołhim rynkam čakacych jězdźi­dłow. Ale tež hižo do kružneho wobchada dyrbjachu šoferojo na Mosće měra a před nim čakać.

Wustajeńca klankow pola swójby Peto w Nowym Měsće nad Sprjewju je mjeztym zhromadny skutk cyłeje swójby. Štož bě lěta 2009 k zetkanju Nowych Městow jónkrótna ideja dźowki Nicole, swoju zběrku klankow raz zjawnosći pokazać, je mjeztym wjesna atrakcija.

Nowe Město (JoS/SN). Lubowarjo klankow njeměli skomdźić sej přichodne tydźenje do Noweho Města nad Sprjewju dojěć. Pola swójby Peto dožiwja woni njewšědnu přehladku klankow, rozrjadowanu do njeličomnych wobrazow ze znatych a mjenje znatych bajkow. Přihotować započachu ju hižo loni w nowembru, jako rozmyslowachu, kak měła přichodna wustajeńca wupadać, wšako nima kóžde lěto wšitko samsne być. Lětsa su ju hišće raz powjetšili. Pod třěchu pódlanskeho twarjenja nasta dalša rumnosć, kotruž bě přećel Nicole Peto sobu wutwarić pomhał a hdźež je jeje wuj elektriku składł. Z tym pak je wobstejaca twarska substanca wučerpana, přehladku njemóža tuž dale powjetšić.