Młodźinske dźěło Domowiny je wjace hač jenož woblubowane ludowe nałožki pěstować. To su sej čłonojo předsydstwa župy Delnja Łužica na wšelakich přikładach znowa wuwědomili.

Choćebuz (SN/at). Dźěło z młodźinu steješe w srjedźišću posedźenja předsydstwa župy Delnja Łužica wčera w Choćebuzu. Z namjetom běše so gremij hižo lětsa w januarje zaběrał. Tehdy běchu sej přezjedni, wo problemach diskusiju dale wjesć. Tomu wčera tak bě a młodźinski koordinator Tobias Unger rozprawješe wo dźěławosći młodźinskich skupin pod třěchu Domowiny w Delnjej Łužicy.

Přiběracy njedostatk je župny młodźinski koordinator nastupajo pěstowanje ludoweho nałožka jutrowneho wohenja zwěsćił, kaž župan dr. Pětš Šurman na naprašowanje našeho wječornika zdźěli. Na někotrych wsach za nałožk žane zjawne płoniny wjace njezměja. Na přikład su w Turjeju (Tauer) w prjedawšich lětach husto areale prodrustwa wužiwali. Te nětko zwjetša priwatnikam słušeja, Tobias Unger rozprawješe. Podobnje je połoženje w Pśiłuku (Preilack). „Bjez płoniny pak je přewšo ćežko tradiciju dale wjesć“, rjekny župan.

„Wažne je młodostnym rum za ideje poskićeć, zo by serbska rěč dale žiwa była a kultura so dale wuwiwała“, praji nowy předsyda serbskeho młodźinskeho towarstwa Pawk – Lukaš Pěčak. 23lětny naslěduje Jakuba Wowčerja, kotryž je towarstwo štyri lěta nawjedował. „Za mnje je tuta funkcija wulka česć a zdobom nowe wužadanje“, Radworčan wuzběhny. Wužadanjow a zarjadowanjow je tójšto w přichodźe. Tak wuzběhny Serb sam w tutym zwisku: „Hižo klětu w nalěću wuhotujemy MENS seminar w Budyšinje a tak přeprošujemy sebi młodostnych tamnych europskich mjeńšinow do Łužicy. Zdobom čaka na nas wjeršk 30lětneho wobstaća PAWKa.“ Lukaš Pěčak bydli tuchwilu w Lipsku a dźěła wot lětušeho při tamnišim lětanišću jako zastojnik cła. W swojim wólnym času honi Lukaš zahoriće za swoje domjace mustwo ST 1922 Radwor za bulom. Nimo toho wón rady kolesuje, pućuje w Alpach a lubuje sej nowe kultury wotkrywać. Runje z tuteje přičiny wobradźa jemu skutkowanje pola PAWKa wulke wjeselo, wšako móže so přez towarstwo „z druhimi mjeńšinami Europy zeznajomić a mjez sobu zwjazować.

Rěč wo němskej mjeńšinje žana njebě. To prezident Parlamenta Němskorěčneho zhromadźenstwa Belgiskeje scyła rady słyšał njeje. Wosebje historiske wuwiće z Němskej mjezowaceje kónčiny je identitu wutworiło, kotraž poćahuje so jasnje na kraj Belgisku. To drje bě za mnohich wobdźělenych wuprawy do wuchodneje Belgiskeje a Brüssela nowosć. Štož su ludźi na zakładźe tutoho wuznaća k swojemu krajej a z tym k swojemu zdźědźenemu sydlenskemu rumej docpěli, prosće přeswědči. Hdyž w rozmołwje słyšiš, zo čuja so wobydlerjo w teritoriju Němskorěčneho zhromadźenstwa jako Porynčenjo z tam znatymi nałožkami kaž je to na přikład karnewal, so wospjet dźiwaš. Korjenja ludźi wuchodnje a zapadnje mjezy su drje jenake, jich identita wšak je stajnje na statnu přisłušnosć wjazana. Tuta jasna identita domiznu twori a je zakład politiskeho jednanja. Wuspěšneho, dokelž tamniša ličba wobydlerjow je so wot 60 000 na mjeztym 77 000 zwyšiła. Axel Arlt

Brüssel (SN/at). Federalistiska unija europskich narodnosćow (FUEN) bě składnostnje Europskeho dnja rěčow wčera swjatočne zarjadowanje w Domje stawiznow Europy w Brüsselu wuhotowała. Domej přepodachu zastupjerjo FUEN zdobom słowniki w mjeńšinowych rěčach (SN informowachu). Domowinu zastupowaše předsyda Dawid Statnik. „Smy za delnjoserbšćinu zapodali słowničk delnjoserbskich pomjenowanjow městow a wsow“, rjekny wón před pozadkom sudniskich jednanjow wo sydlenski rum Serbow w Delnjej Łužicy. Dale přepodaty Słownik hornjoserbskich předmjenow mjenowaše Statnik „znamjo, zo smy po lěta trajacym prócowanju skónčnje docpěli, zo budu žónsko-specifiske kóncowki swójbnych mjenow móžne, tak kaž sej to naša maćeršćina kaza.“