Wudworski ansambl swjeći swój jubilej
Wudwor (SN/MiR). Serbski folklorny ansambl Wudwor (SFAW) swjeći klětu swój 40. jubilej wobstaća. Potom budźe tomu 42 lět, zo ludowuměłske ćěleso na jewišćach tudy a we wukraju skutkuje a zo w nim młodźi a starši akterojo zhromadnje rejuja, spěwaja a hudźa. „Naš 40. jubilej loni smy korony dla přesunyć dyrbjeli“, wuswětla wjelelětny něhdyši předsyda SFAW Volkmar Šołta. „Nětko pak přihotujemy so na třidnjowski wjeršk.“
Jubilejny swjedźeń budźe wot 15. do 17. julija 2022 na Smolic statoku w Hórkach. Tam wšak su Wudworčenjo hižo jónu wulce swjećili. Na swój klětuši swjedźeń přeprosyć chcedźa sej wšitkich, kiž su z Łužicu a „Wudworčanami“ zwjazani a kotřiž rady serbsku zhromadnosć haja. „Wažne pak nam tež je, zo přijědu na naš mały festiwal naši přećeljo z wukraja“, Šołta rozłožuje. Trajne styki wudźeržuja Wudworčenjo mjez druhim do Rumunskeje a Čěskeje. Tak maja hóstne skupiny runje tak kaž ludowe wuměłstwo pěstowace łužiske cyłki zhromadnje na jewišću stać.
62 projektow zapodali
Budyšin (SN/at). Załožbje za serbski lud předleži dohromady 99 próstwow za projekty, kotrež maja so klětu w prěnim połlěće resp. w běhu cyłeho lěta zeskutkownić. 62 próstwow z toho dósta załožba hač do minjeneho štwórtka, kónca zapodawanskeje doby, kaž w nowinskej zdźělence rěka. Wone požadanja su wusměrjene mjez druhim na wuměłski nawod a probowe lěhwa chórow, rejwanskich skupin, ansamblow a dźiwadłowych skupin. Nimo tajkich kóždolětnych prawidłownych próstwow su dalše kaž nakup serbskeje narodneje drasty za wšelakore towarstwa a dźěćace skupiny. Dóšli su runje tak tajke za nowe hudźbne abo wuměłstwowe projekty.
W załožbowym zarjedźe přihotuja nětko poručenja, z kotrymiž budźe so fachowa rada za projektowe spěchowanje na posedźenju srjedź nowembra zaběrać.
Załožba skedźbnja zdobom na prěni raz wuwołane idejowe wubědźowanje, z kotrymž mytuje wosebje kreatiwne ideje nastupajo wožiwjenje serbskeje rěče a kultury. Tu skónči so doba zapodaća projektow 7. nowembra. Dalše informacije pod
Lawreaća Myta Domowiny 2021
Budyšin (SN). Mjez tójšto namjetami z Delnjeje, srjedźneje a Hornjeje Łužicy su čłonojo mytowanskeho wuběrka Domowiny na swojim posedźenju 14. septembra rozsudźili, koho narodna organizacija lětsa počesći. Wo wuslědkach je referent Domowiny za kulturu a wukraj, Clemens Škoda, wčera informował.
Myto Domowiny spožča lětsa třom zasłužbnym wosobam. Su to Brigita Räßlerowa z Narća, Marija Elikowska-Winklerowa z Choćebuza a Beno Budar z Hornjeho Hajnka. Symana Hejdušku z Budyšina a Jakuba Wowčerja z Radworja počesća z Mytom Domowiny za dorost 2021. Narodne dźěło Weroniki Boswankoweje ze Židźinoho, Jana Bělka z Fredersdorfa, Güntera Zeleńka z Janšojc, Astrid Šramoweje z Gołkojc, Caroly Greinoweje z Wětošowa, Uty Sykora z Rakec, Milana Tureka z Čěskeje republiki a Maritty Schneider z Malešec z Čestnym znamješkom Domowiny připóznaja. Wuznamjenjenske zarjadowanje budźe 8. oktobra.
Wažnišu serbsku rólu Wojerecam
Wojerecy (SN). Město Wojerecy chce naležnosće serbskeho ludu najlěpje do swojich projektow w zwisku ze změnu strukturow zapřijeć. Kak móhli při tym postupować, wo tym je so wyši měšćanosta Torsten Ruban-Zeh (SPD) z předsydu Dawidom Statnikom a dalšimi zastupjerjemi Domowiny wčera w radnicy wuměnił, kaž třěšny zwjazk na to zdźěli.
Wojerowski wyši měšćanosta Domowinje slubi, zo budźe město při wšěch předewzaćach konsekwentnje němsko-serbsku dwurěčnosć nałožować. Zdobom zwurazni zajim komuny, w zwisku z přetwarom Łužiskeje hale tam přichodnje wjace serbskich poskitkow w kulturnym programje prezentować chcyć.
Z wida Torstena Rubana-Zeha změja w měsće krótko- a srjedźodobnje dosć přihódnych a centralnych kapacitow nastupajo rumnosće za nowe serbske dźěłowe městna. Přezjedni běchu sej wón a rozmołwni partnerojo Domowiny, zo maja Wojerecy přichodnje wažnišu rólu za serbske institucije a kulturne serbske žiwjenje we Łužicy hrać. Nawjazujo na wčerawše zetkanje chcedźa dalše konkretne projekty rozjimać.
Dźak a připóznaće Budarjowej
We wobłuku swjatočneho rozžohnowanja wjelelětneje předsydki Serbskeho šulskeho towarstwa (SŠT) Ludmile Budarjoweje 17. septembra w Budyskim Serbskim domje (Serbske Nowiny rozprawjachu) jimachu so tójšto wosobinow zjawneho žiwjenja słowa. Na tym městnje wozjewimy narěč Benedikta Dyrlicha kaž tež list sakskeho statneho ministra za kultus Christiana Piwarza. Nimo toho publikujemy wujimki z dźakneje narěče Ludmile Budarjoweje.
Česćena bywša předsydka Serbskeho šulskeho towarstwa knjeni Ludmila Budarjowa, luba Ludmila!
Česćena nowa předsydka Serbskeho šulskeho towarstwa knjeni Katharina Jurkowa! Waženi přitomni!
Na tajkim dnju rozžohnowanja kaž dźensa zhladuje čłowjek najprjedy jónu dozady, zo by sej wuwědomił wukony, wunoški a zasłužby čłowjeka, z kotrymž so rozžohnuje. A to je Ludmila Budarjowa w swojej funkciji jako dołholětna předsydka lěta 1991 załoženeho Serbskeho šulskeho towarstwa.
K dialogej stajnje zwólniwi
Zaćišće z njedawneje hłowneje wólbneje zhromadźizny župy „Handrij Zejler“
Werner Sroka bě wot swojeho prjedawšeho dźěła jako referent w Domowinskim zarjedźe zwučeny, materialije za hłowne zhromadźizny z kritiskim widom pruwować. Čitajo namjetowany wólbny porjad za hłownu wólbnu zhromadźiznu župy „Handrij Zejler“ před połdra tydźenjom we Wojerecach jemu tam schowana nowosć hnydom do wočow biješe: „Za zastojnstwo župana smětaj so tež dwaj kandidataj jako županaj-dwójnikaj k wólbam stajić. Wolitaj so zasadnje jako dwójka“, rěkaše tam w dypku 5. „Měł na hłosowanskim lisćiku wobeju nakřižować, a što so stanje, hdyž jenož jedne mjeno nakřižuju?“, chcyše wón wědźeć. Wšako njebě jemu dotal znate, kak hłosowanski lisćik wupada. „Hdyž jednu wosobu z duwa nochceš, da žanoho z njeju wolić njemóžeš“, jemu nawoda zhromadźizny Marcel Brauman wotmołwi. Při schwalenju wólbneho porjada so Werner Sroka na to hłosa wzda, wšitcy druzy naćiskej přihłosowachu. Hač župne wustawki tajki krok scyła dowoleja, za tym so w tym wokomiku nichtó prašał njeje.
55 330 hłosow docpěł
Flensburg/Budyšin (SN/at). Wizija strategow Južnoschleswigskeho wolerskeho zwjazka (SSW) je so zwoprawdźiła. Z 55 330 lisćinowymi hłosami je načolny kandidat strony Danow a Frizow Stefan Seidler po njedźelnych wólbach do noweho zwjazkoweho sejma zaćahnył (SN informowachu). Wón je po Hermannje Clausenje (1949–1953) druhi zapósłanc SSW w parlamenće Němskeje.
Mandat SSW w zwjazkowym sejmje mjenowaše předsyda Domowiny Dawid Statnik wčera w rozmołwje z powěsćernju dpa „hłós za wjace mjeńšinoweje politiki w Němskej“. SSW je w swojim wólbnym programje na serbsku tematiku nawjazał, hdźež rěka „Chcemy, zo Zwjazk dźěło Domowiny – Zwjazka Łužiskich Serbow – a Załožby za serbski lud za serbsku rěč a kulturu dale dosahajcy financuje a podpěra“.
Domowina chce kaž dotal ze stronu Danow a Frizow hromadźe dźěłać, zo byštej lobbyjowe dźěło pokročowałoj. Spomóžny instrument za to je Mjeńšinowa rada awtochtonych narodnych mjeńšin při Zwjazkowym ministerstwje nutřkowneho.
Ministerka Schüle pola Domowiny
Choćebuz (SN). Braniborska kulturna ministerka Manja Schüle (SPD) je so minjeny pjatk w Choćebuzu ze zastupnikami Domowiny zetkała (SN informowachu). W rozmołwje informowachu předsyda Domowiny Dawid Statnik, městopředsyda Hartmut Leipner a zastupowacy jednaćel Marcus Końcaŕ ministerku wo dźěle zastupnistwa zajimow braniborskich Serbow. Ministerka Schüle potwjerdźi, zo ma serbsku rěč a kulturu kaž tež tradicije Serbow za njewšědne bohatstwo Braniborskeje kaž tež za dźěl imaterielneho kulturneho herbstwa a za centralny wobstatk identity ludnosće na juhu zwjazkoweho kraja. Wona dźakowaše so Domowinje za jeje prócowanja, tute herbstwo zachować a do přichoda wjesć.
Dawid Statnik na to pokaza, zo je braniborske krajne knježerstwo kruty parter Domowiny. Wopyt ministerki je Statnikej dopokaz, zo je sej krajne knježerstwo swojeje zamołwitosće Serbam napřećo wědome. Zdobom Statnik potwjerdźi, zo su ze stron knježerstwa dalše iniciatiwy a přidatne pjenježne srědki trěbne.
Judit Šołćina naslědnica Marka Kowarja
Budyšin (SN/bn). Judit Šołćina naslěduje Marka Kowarja jako jednaćelka Domowiny. Zwjazkowe předsydstwo třěšneho zwjazka Serbow bě ju minjeny pjatk w tajnym wothłosowanju jednohłósnje wuzwoliło. Dźensa je so Šołćina we wobłuku nowinarskeje konferency w Budyskim Serbskim domje zjawnosći předstajiła. Swoje dźěło nastupi wona 1. januara 2022 a chce ju wotpowědujo wustawkam Domowiny znajmjeńša hač do lěta 2028 wukonjeć. Jeje poboku budźe zastupowacy jednaćel Marcus Końcaŕ, kotrehož zrěčenje za tule funkciju je předsydstwo tohorunja bjez napřećiwneho hłosa wo dalše sydom lět podlěšiło.
Cyž do Rozhłosoweje rady MDR
Bjarnat Cyž zastupuje serbski lud w Rozhłosowej radźe MDR a Werner Sroka je čestnohamtski społnomócnjeny Domowiny za Wendland. Woboje je zwjazkowe předsydstwo wobzamknyło.
Choćebuz (SN/at). Zwjazkowe předsydstwo deleguje bywšeho jednaćela Domowiny Bjarnata Cyža jako zastupjerja serbskeho ludu do Rozhłosoweje rady MDR. To je nowowoleny gremij w njezjawnym dźělu swojeho prěnjeho posedźenja zašły pjatk w internaće Delnjoserbskeho gymnazija w Choćebuzu rozsudźił. W nowinarskej zdźělence Domowiny k tomu rěka, zo „je wón přisłušał gremijej hižo wot 1998 do 2010, doniž so ,serbske městno‘ njezhubiło.“ Nimo Cyža bě so tež wot Zwjazka serbskich wuměłcow namjetowana Cosima Stracke-Nawka požadała. Ju bě zdobom Serbski sejm za tele zastojnstwo faworizował.
