Braniborska planuje šule a gymnazije poněčim zaso wotewrěć
Podstupim (dpa/SN). Wotstawk dodźeržeć, wšitko čiste dźeržeć, škit za hubu a nós wužiwać – hladajo na poněčimne wotewrjenje šulow žada sej Zwjazk pedagogow Braniborskeje jasne směrnicy politiki. Zamołwići komunow měli so wo to starać, „zo su hygieniske žadanja wot šulskeho busa přez rjadownisku rumnosć hač k sanitarnym připrawam w šulskim twarjenju wšědnje spjelnjene“, zdźěla zwjazk wučerjow. Za organizaciju wučby wočakuja wučerjo wot kubłanskeho ministerstwa bórzomne směrnicy za šulske zarjady a kubłanišća, zo by jednotne postupowanje zaručene było. Tak chcedźa wědźeć, kotre wosoby su wohrožene, kak a hdźe chcedźa škit za hubu a nós přepodać a z kotrej pomocu móža šule we wosebitej psychologiskej nuzy koronakrizy dla ličić.