Praha (ČŽ/K/SN). Něhdyši předsyda lěta 2017 nastateho hibanja Milion chvilek Mikuláš Minař je Towarstwo Pro ČR załožił. Z jeho skutkowanjom wotmysli wón Čěsku „změnić k lěpšemu“. Jeho korporacija ma tuž zaměr „wutworić swobodny, sprawny a wěsty kraj“. Takle zwuraznja to zało­ženski dokument, kiž je Minař w zjawnym registru publikował. Spočatk oktobra bě ekspředsyda Milion chvilek wo­zjewił, zo klětu z nowym politiskim projektom do wólbow sejma zasahnje a zo chce je zhromadnje z nětčišej opo­ziciju dobyć. Z nadawkom towarstwa po wudawanju Minařa bywa, zhromadźić a podpěrować ludźi kaž tež iniciatiwy, kiž su zwólniwe, za Pro ČR zdokonjeć wšo štož je w jich mocach. „Sonimy wo kraju z kwalitnymi politikarjemi a aktiwnymi wobydlerjemi, sonimy wo rozkćěwacym, swobodnym, zamołwitym, sprawnym a wěstym kraju, sonimy wo kraju, w ko­trymž na nikoho njezabudu. Wěrimy: Jeli zo so w tutym prócowanju wo změnu našeho kraja zjednoća ludźo, kotřiž to runje tak widźa, zrodźi so towaršnostna móc, kiž změni Čěsku republiku k lěpšemu“, wěšći załoženski dokument přichod.