Budyšin (SN/bn). „Mam nadawk, wam wječor skazyć.“ Z tymle słowami zahaji Christian Schäfer, koordinator nošerskeho zwjazka trägerverBUNT – syć za demokratiju a wjelorakosć we wokrjesu Budyšin, w kotrymž angažuja so mjez druhim Němski zwjazk dźěłarnistwow, Smochčanske kubłanišćo swj. Bena, wobydlerska iniciatiwa „Wojerecy pomhaja z wutrobu“, Kamjenske zjednoćenstwo za humanitu a tolerancu kaž tež Do­mowina přećiwo prawicarskemu ekstremizmej, wčera nowy rjad Budyskeho towarstwa Kamjentny dom „Rozmołwa w foyeru“. Ze swojim slědowacym přednoškom zjima wón dwě lěće přeslědźenja dynamiki póndźelnišich demonstracijow w sprjewinym měsće. „Spočatnje měrješe so protest přećiwo statnym naprawam za zadźěwanje rozšěrjenju koronapandemije. Ale hižo dwě njedźeli po prěnjej demonstraciji jewjachu so dosć dźiwne chorhoje, symbolizowace na přikład historiske Němske mócnarstwo abo jasnje prawicarskoekstremistisku hornjołužisku „Wanderjugend“ kaž tež napodobnjene banery NSDAP.