Žitawa/Choćebuz (DY/SN). Swobodne Radio Zett ze Žitawy wusyła njedźelu 5. a 12. měrca, stajnje w 16 hodź. dalšej hodźince serbskeje literatury. W srjedźišću přichodneju čitanjow (w interneće pod www.radio-zett.org) steja tónkróć delnjoserbske awtorki a awtorojo a jich lite­rarne tworjenje. Tak so w prěnim měrcowskim woknu 5. měrca słowa jimaja młoda poetka Jill-Francis Ketlicojc a młody poet Maks Bagańc kaž tež hižo nazhonita basnjerka Lenka a znaty spěwotwórc Bernd Pittkunings.

W druhim wusyłanju 12. měrca po­dataj młoda awtorka Justyna Michniuk, pisaca tohorunja prozu, a njesprócniwy tekstar pěsnjow najwšelakorišeje družiny Werner Měškank dohlad do swojeho pisanja. Při tym skedźbnitaj tež na njeboh Alfreda Měškanka a jeho wobšěrne přebasnjenja słowjanskeje literatury do delnjoserbšćiny. Za wobě hodźince su akterojo čitanjow hudźbu wupytali, kotraž jim wosobinsce na wutrobje leži. Serbske a mjezynarodne štučki wobrubja runje tak čitanja kaž krótke bjesady ze sobuskutkowacymi.