Berlin (dpa/SN). Zwjazkowy minister za hospodarstwo Robert Habeck (Zeleni) a jeho kritizowany statny sekretar Patrick Graichen dyrbještaj dźensa na prašenja zapósłancow k personalnej politice ministerstwa wotmołwić. Skazanaj běštaj wobaj w připołdnišich hodźinach na zhromadne posedźenje wuběrkow za hospodarstwo kaž tež škita klimy a energije.
Graichen bě swój čas na wuzwolenju jednaćela zwjazkej słušaceje Němskeje energijoweje agentury (Dena) Michaela Schäfera wobdźěleny, byrnjež tón jeho wěrowanski swědk był. Graichen kaž tež Habeck rěčitaj mjeztym wo zmylku. Proces wuzwolenja nowych přistajenych chcedźa wospjetować. Kritiku zbudźili su tež personalne rozsudy w hospodarskim ministerstwje. Sotra Graichena, wudata na kolegu, statneho sekretara Michaela Kellnera, dźěła runje tak kaž jeje bratr w ekologiskim instituće, slědźenskej instituciji, kotraž dóstawa swoje nadawki wot zwjazkoweho knježerstwa. Ministerstwo twjerdźi, zo njeběštaj Kellner a Graichen na wažnych personalnych rozsudach wobdźělenaj.
