Rom (dpa/SN). Dale a wjace ludźi na swěće dyrbi wójnow kaž tež hospodarskich a klimowych krizow dla zdźěla bolostnje hłód tradać. Na wšě 258 milionow dorosćenych a dźěći po wšěm swěće bě loni wot akutneho hłodu abo samo wot humanitarnych hłodowych katastrofow potrjechenych, z posudka mjezynarodnych organizacijow wuchadźa. Wone zličichu 65 milionow hłód tradacych wjace hač hišće lěta 2021 (193 milionow) a nimale dwójce telko kaž w lěće do koronapandemije 2019 (135 milionow).

Alarmowace ličby su njedawno Europska unija, organizacija UNO za zežiwjenje a ratarstwo FAO kaž tež swětowy zežiwjenski program UNO wozjewili. Wšitke tři organizacije běchu lěta 2016 globalnu syć přećiwo krizam zežiwjenja załožili.

„Wjace hač štwórć miliardy ludźi je dźensa z akutnym hłodom konfrontowanych, někotři su krótko do zahłódnjenja“, piše generalny sekretar UNO António Guterres w předsłowje rozprawy. „To je njewodajomne.“ Rein Paulsen, direktor FAO za nuzowe pady, widźi „wulke starosće zbudźacy scenarij. Hłód wohroža žiwjenje a zakład eksistency mnohich.“