24. literarne wubědźowanje LND a Załožby za serbski lud zakónčene

Budyšin (SN/MiR). Njewočakowano wjele młodych awtorow je so lětsa pjera jimało a na mjeztym hižo 24. literarnym wubědźowanju Ludoweho nakładnistwa Domowina (LND) a Załožby za serbski lud wobdźěliło. Wjetšina z nich bě sej pjatk nawječor do Budyskeho hosćenca „Wjelbik“ dojěła. John Petrik, sobudźěłaćer załožby, rjekny: „Za bohate wobdźělenje wšěm wulki dźak! Tym, kotřiž su mjez mytowanymi, a tež tym, kotřiž dźensa žane myto njedóstanu.“ Wón zwěsći, zo bě lětsa 24 młodych pisacych cyłkownje 54 přinoškow zapodało. Najmłódši z nich je dwanaće, najstarši 29 lět. W kóždej kategoriji pjeć mytow spožčichu. Jednaćel LND Syman Pětr Cyž praji: „Tule so rozhladujo, wuhladam přichod serbskeho pismowstwa. Wy maće cyle wosebity dar. Jako nakładnistwo mamy my wažny nadawk, wam při wuwiwanju pomhać a was spěchować.“ Wón a direktor załožby přepodachu 13 přitomnym dobyćerjam, kóždemu wosobinske słowo wěnujo, wopismo a myto.