Nowy festiwal z mjezynarodnymi hudźbnikami a serbskej prapremjeru

Budyšin (SN/bn). Stejo mjeńšiny dołho aplawdowacy publikum; wučerpani, ale hnući instrumentalisća; naročny, brilantnje interpretowany program: Premjera festiwala „Klasika w zymje“ je so ze zažnym wjerškom komorneje hudźby stała. Po „třoch njesměrnje intensiwnych dnjach“, kaž huslerka Franziska Pietsch, iniciatorka a nawodnica festiwala, po zakónčenju wčera na žurli Budyskeho Serbskeho muzeja rjekny, je so jej, jeje mustwu a towarstwu Klassikkunst zešlachćiło, štož bě minjeny pjatk na samsnym městnje cyłkownje něhdźe 160 hosćom přilubiła, mjenujcy „zanurić so do kuzła hudźby a tak dušam swobodu spožčić“.