Tuchwilna situacija drje to direktnje njepokazuje, ale z pokornosću a dźakownosću dopominam tule na wot FC Energije wuwołany sezonowy zaměr. Wšako je so do zahajenja dyrdomdeja třećeje ligi bjezwuwzaćnje wo tym rěčało a pisało, so chcedźa klasu zdźeržeć. Hladajo na tabulki zašłych lět měješe so 46 dypkow wudobyć. To su přerady hižo do 38. hrajneho dnja docpěć chcyli. Dopomnjenki na lěto 2019 wšak běchu přewšo zrudne. Na poslednim hrajnym dnju dyrbješe FCE z 45 dypkami zestup přiwzać. Dźensa, po 23. hrajnym kole, je so ominozna ličba tutych 45 dypkow hižo docpěta. A to 15 (!) hrajnych dnjow do zakónčenja sezony. Za to słuša wšitkim wobdźělenym najwyše připóznaće a dźak. Ale dokelž maš swjedźenje w prawym času swjećić, rěka to konkretnje, zo móhli přichodnu njedźelu po hrě přećiwo SC Verlej zdźerženje klasy swjećić.