Scholz zakituje nowy kurs Němskeje
Berlin (dpa/SN). Zwjazkowy kancler Olaf Scholz (SPD) je wobydlerjam kraja přilubił, zo wšitko čini, zo njeby Němska na wójnje Ruskeje přećiwo Ukrainje wobdźělena była, najebać dowolnosć, zo směła Ukraina němskej brónje na ruskim statnym teritoriju zasadźić. „Smy tole ze zwjazkarjemi dorěčeli“, rjekny Scholz dźensa w swojej knježerstwowej deklaraciji w zwjazkowym sejmje w Berlinje. Minjene dny bě zwjazkowe knježerstwo w prašenju němskich brónjow w Ruskej swój dotalny kurs změniło.
Ludźo móža so na to spušćić, tak Scholz, „zo jedna knježerstwo rozumnje a zo strachi derje wotwažuje“. Jako zwjazkowy kancler „sym měrej a wěstoće Němskeje zawjazany“, wón praji. Zdobom je wón za to zamołwity, „zo njetrjeba žane dźěćo, kotrež so dźensa w Němskej narodźi, ženje wójnu dožiwić. To je mi to najwažniše“, Scholz rjekny.
Ruski prezident Wladimir Putin bě wčera z „asymetriskej wotmołwu“ hrozył, dyrbjała-li Ukraina Rusku ze zapadnymi brónjemi nadběhować.
Štyrjo mortwi při zražce ćahow
Spěšnik a nakładny ćah pola čěskeho Pardubice znjezbožiłoj
Pardubice (dpa/SN). Při zražce połnje wobsadźeneho wosoboweho ćaha z nakładnym ćahom w čěskich Pardubicach su wjacori ludźo žiwjenje přisadźili. Nutřkowny minister Vít Rakušan rěčeše po njezbožu minjenu nóc wo štyrjoch smjertnych woporach a 23 zranjenych. Z nich je 20 snadne zranjenja poćerpjeło.
Tójšto pomocnikow, mjez nimi wohnjowi wobornicy, sanitetarjo a lěkarjo chwatachu k městnu njezboža něhdźe sto kilometrow južnje Prahi. Tam běštej lokomotiwje z dotal njeznateje přičiny frontalnje do so zrazyłoj. Spočatnje njebě jasne, hač je nakładny ćah we wokomiku zražki hižo stał abo hač hišće jědźeše.
Nócny spěšnik priwatneho železniskeho předewzaća Regiojet bě po puću z Prahi do słowakskeho Košice a bě runje hodźinu po puću. W nim bě něhdźe 300 sobujěducych. Předewšěm Ukrainjenjo zwisk po Słowakskej rady wužiwaja, zo bychu swoju domiznu wopytali. Njezranjenych pasažěrow dowjezechu z busami do nuzowych kwartěrow.
Link k praksy parował
To a tamne (06.06.24)
Njewšědna serija wobchadnych njezbožow zaběra policiju w Čěskej. Tam je šofer nakładneho awta na awtodróze D 1 pola Brna do cyłkownje dźewjeć awtow zrazył. Po tym wostaji zawinowar njezbožow swoje awto stejo a ćekny pěši. W susodnej wsy Rebešovice hrabny sej muž cuze awto a zawinowa z nim dalše wobchadne njezbožo. Test policije na drogi bě pozitiwny. Podhladneho dowjezechu do chorownje. Awtodróha bě rumowanja dla dlěši čas zawrjena.
Z awtom maćerje je šěsćlětny hólc w jednej z Augsburgskich pěstowarnjow w Bayerskej do murje prasnył. 38lětna mać bě hólca w pěstowarni wotewzała a w awće zwěsćiła, zo nachribjetnik dźěsća pobrachuje. Jako so skrótka do pěstowarnje wróći, sydny so hólc za wodźidło a wotjědźe. Nichtó so njezrani. Škoda na awće a twarjenju wučinja 10 000 eurow.
Wulka woda poněčim woteběra
Regensburg (dpa/SN). Połoženje wulkeje wody dla w bayerskim Regensburgu wostanje napjate. Wulka woda poněčim woteběra, wostanje pak na wysokim niwowje, zamołwići zdźěleja. Pegel Dunaja pokazowaše dźensa rano šěsć metrow, normalne su tři metry. Tež w Passauwje wulka woda Dunaja spaduje. Tam naměrichu dźensa 8,50 metrow, normalnje je šěsć metrow. Najebać to płaći tam dale najwyši schodźenk warnowanja.
Kandidat AfD z nožom zranjeny
Mannhein (dpa/SN). W Mannheimje je muž wčera wječor kandidata AfD za komunalne wólby z nožom nadběhował a zranił. Policija je skućićela zajała, powěsćernja dpa rozprawja. W běhu dnja chcychu zjawnosć wo nadrobnosćach podawka informować. Po informacijach wokrjesneho zwjazka AfD bě kandidat strony njedaloko Hłowneho torhošća muža lepił, kiž runje wólbne plakaty ze sćežorow torhaše. Na to narěčany, da so skućićel z nožom do politikarja a jeho zrani.
29lětny błyska dla zemrěł
Na francoskim pobrjohu atlantiskeho morja su wčera swjatočnosće k ...
Słowjenska Palestinu připóznawa
Ljubljana (dpa/SN). Něšto dnow po Španiskej, Irskej a Norwegskej je ze Słowjenskej dalši europski kraj Palestinu jako stat připóznał. „Luby palestinski ludo, dźensniši rozsud je poselstwo nadźije a měra. Wěrimy, zo móže jenož rozrisanje dweju statow dołhodobnje měr na Bliskim wuchodźe zaručić. Słowjenska zasadźuje so dale za wěstotu wobeju narodow, Palestinjanow a Israelčanow“, rěka w zdźělence wonkowneho ministerstwa.
Mjeztym tójšto krajow Palestinu jako stat připóznawa. Tole pak njepłaći za wulke zapadne kraje kaž USA, Wulku Britanisku a najwjetši dźěl čłonow EU. Słowjenska je 147. kraj po wšěm swěće, kiž Palestinu jako stat připóznawa. Israel so tomu raznje spjećuje a zasudźuje připóznaće jako „mytowanje terorizma“.
W słowjenskim parlamenće w Ljubljanje běchu dosć kontrowersnje wo njewšědnej diplomatiskej kročeli diskutowali. Liberalna opozicija spytaše, wothłosowanje wo 30 dnjow přestorčić. Frakcija prawicarskeje opozicije wothłosowanje bojkotowaše a žurlu wopušći.
Wulka woda tež w Čěskej
W Liberecu błysk do skupiny ludźi zadyrił – železniski wobchad haćeny
Praha. Opoziciska strona Ano bywšeho ministerskeho prezidenta Andreja Babiša, ma najlěpše wuhlady, wólby do Europskeho parlamenta dobyć. Koalicija SPOLU ze stron KDU ČSL, ODS a Top 09 by sej druhe městno zawěsćiła, wuchadźa z wólbneho naprašowanja woprašowarnje Stem/Mark. Naprašowanja dalšich agenturow su wunjesli podobny wuslědk, po nich stej Ano mjez 26 a 27 procentow hłosow a SPOLU 20 do 22 procentow hłosow docpěłoj. Piraća bychu ze swojej politiku 10 do 12 procentow wobydlerjow přeswědčili a prawicarska strona „Swoboda a direktna demokratija (SPD) ma wosom do 11 procentow podpěraćelow.
