To a tamne (20.06.24)
Skóncowany helikopter wuchowanskeje słužby je wčera awtodróhu A2 pola Castropa-Rauxela w Sewjerorynsko-Westfalskej wjacore hodźiny blokował. Mašina bě po wobchadnym njezbožu popołdnju na awtodróze přizemiła. Techniski defekt pak wotlětej helikoptera zadźěwaše. Hakle po tym, zo běchu přiwołani specialisća škodu porjedźili, móžeše mašina wječor zaso wotlećeć.
Z oranžowej barbu popryskali su klimowi aktiwisća swětoznaty kamjentny monument Stonehenge we Wulkej Britaniskej. Skupina Just Stop Oil je widejo wozjewiła, na kotrymž so dwě wosobje kamjentnemu kruhej bližitej a barbu na njón pryskatej. Demonstranća žadaja sej wot britiskeho knježerstwa pisomne přilubjenje, zo wot lěta 2030 žane fosilne paliwa wjace njewužiwa. Britiski premier Sunak mjenowaše aktiwistow „wandalow“.
Malu Dreyer wotstupi
Mainz (dpa/SN) Ministerska prezidentka Porynsko-Pfalcy, Malu Dreyer, swoje zastojnstwo złoži. W běhu dnja chcyše wona swój wotstup w frakciji SPD krajneho sejma wozjewić. Móžny naslědnik móhł dotalny minister za dźěło Alexander Schweitzer (SPD) być. Dreyer je wot lěta 2013 ministerska prezidentka Porynsko-Pfalcy a nawjeduje koaliciju SPD, Zelenych a FDP. Wona bědźi so hižo něšto lět ze strowotniskimi problemami.
Zelenskyj chwali nowe prawidła
Kijew (dpa/SN). Ukrainski prezident Wolodymyr Zelenskyj je zasadźenje zapadnych bróni na teritoriju Ruskeje jako eficientne chwalił. Zničenje ruskich zepěranišćow a rampow njedaloko mjezy je jara wažne, rjekny Zelenskyj w swojim widejowym poselstwje. „To funguje, runje tak, kaž smy to wočakowali.“ Zapadne kraje běchu po ruskich nadpadach na Charkiw zakaz zasadźenja bróni na ruskim statnym teritoriju zdźěla zběhnyli.
Reforma wustawy schwalena
Z předešćnikami spytaja so muslimscy putnicy w sawdi-arabskim ...
Israel wójnske plany schwalił
Tel Aviv (dpa/SN). Israelske wójsko je plany generalneho staba za ofensiwu w Libanonje schwaliło a tak starosće nastupajo móžnu eskalaciju konflikta z Iranej přichilenej milicu Hisbollah přiwótřiło. Wysoko rjadni komanderojo su při wuradźowanju „operatiwne plany ofensiwy w Libanonje“ dowolili, wójsko zdźěla. Direktor za komunikaciju narodneje wěstotneje rady USA, John Kirby, w tym zwisku potwjerdźi, zo USA dalšu eskalaciju konflikta w regionje nochcedźa.
Israelski wonkowny minister Israel Katz rjekny: „We wobšěrnej wójnje Hisbolluh zničimy a Libanon porazymy. Stejimy před rozsudom, prawidła přećiwo Hisbollah a Libanonej změnić.“ Do toho bě Hisbollah wobrazy strategisce wažnych objektow w Israelu wozjewiła, kotrež bě wona pječa z trutami natočiła.
Putin na wopyće w Pjöngjangu
Wuradźuja wo azylowej politice
Podstupim (dpa/SN). Nutřkowni ministrojo zwjazkowych krajow zetkaja so dźensa wječor w Podstupimje, zo bychu wo azylowej a migraciskej politice kaž tež wo strachach ekstremizma wuradźowali. Na tři dny trajace zetkanje wočakuja tež zwjazkowu ministerku za nutřkowne naležnosće Nancy Faeser (SPD). Braniborska konferencu nutřkownych ministrow Němskeje tuchwilu nawjeduje.
Po smjertnych nadpadach wukrajnych skućićelow z nožemi chcedźa nutřkowni ministrojo mjez druhim wo wotsunjenju wulce kriminelnych wukrajnikow do Afghanistana a Syriskeje wuradźować. Nimo toho póńdźe wo wobmjezowanje njeregularneje migracije do Němskeje. Tam je předewšěm nutřkowna ministerka Faeser wužadana.
Zastupnicy organizacijow na dobro ćěkancow chcedźa jutře, štwórtk, před krajnym sejmom Braniborskeje w Podstupimje přećiwo přiwótřenju migraciskeje politiki protestować. „Ćeknjeni trjebaja škit – žanu rasistisku šćuwańcu“, w namołwje organizatorow rěka.
Pavel z wjerškom spokojom
Marek Krawc rozprawja wo aktualnje rozjimanych temach w Čěskej
Praha. Čěski prezident Petr Pavel je spokojom z wuslědkami měroweho wjerška, kotryž wotmě so minjeny kónc tydźenja dla wójny Ukrainje. Wodźacy politikar bě po nawróće ze Šwicarskeje mjezynarodne zetkanje jara pozitiwnje zhódnoćił a je přeswědčeny, zo je wšitke wočakowanja spjelniło. Pavel je měnjenja, zo kraje, kotrež njepodpisachu zhromadnu deklaraciju, přećiwo njej njejsu. Rozsudźace budźe, hač wobdźěla so wažne kraje kaž China na dalšich měrowych jednanjach, zdźěli čěska hłowa stata. 80 krajow bě kónc tydźenja w zhromadnej deklaraciji podšmórnyło, zo je teritorialna integrita Ukrainy zakład za měrowe jednanja z Ruskej a zo dyrbja so wot ruskich wojakow zawlečene ukrainske dźěći nawróćić do domizny. Tež Čěska bě zhromadny dokument podpisała.
Dźěći swět wobohaća
Trjebamy dorost za naše serbske institucije kaž tež za předewzaća ze serbskimi mějićelemi. Sej dźěći a młodostnych zdobyć je tuž dźeń a wažnišo. Puće k tomu su přewšo wšelake. Jedyn z nich – a tón mam za trochu njewšědny – je, zo dźěći a młodostni jenož wo projektach njesonja, ale tajke planuja a je tež přewjeduja. Tajki přikład běše wčera zakónčenje cyłodnjowskich poskitkow TeamTekst w Chrósćicach. Ze swojej hru „Błudna šula“ su šulerjo sebje samych inscenowali a zwuraznili, zo je derje, hdyž so dorosćeni přez pryzle dźěći směja. To přisporja wuwiću.
Raduju so na tym, zo chcedźa čłonojo Chróšćanskeho TeamTeksta dale pisać. Namjet Josefiny běše kónctydźenska dźěłarnička Serbskich Nowin a Stanij chce mi wo pčołkach powědać. Mam krutu dowěru, zo wostanje jim zhromadny projekt „Błudna šula“ w dobrym pomjatku. Snadź zrodźa z fantazije ideje za projekty, kotrež na kóncu swět dźěći a tež tón dorosćenych wobohaća. Milenka Rječcyna
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (19.06.24)
Rój pčołkow w Stuttgartskim koparskim stadionje je – krótko do hry němskeje wubranki přećiwo Madźarskej – njeměr zbudźił. Fachowcy wohnjoweje wobory dyrbjachu pčołki popadnyć, kotrež při digitalnej wabjenskej sćěnje hnězdźachu. Wohnjowi wobornicy wzachu rój sobu, po tym zo běchu dźěl wabjenskeje sćěny wottwarili. W meji běchu pčołki hižo raz do koparskeje hry podobne zasadźenje wobornikow w Stuttgarće zawinowali.
Jasne dobyće němskeje koparskeje wubranki dźensa přećiwo Madźarskej je mórska lawica Sissi w Lipšćanskim zwěrjencu wěsćiła. Sissi dyrbješe so rozsudźić, do kotreho sudobja wona bul ćisnje, do madźarskeho abo do němskeho. „Bjez wahanja“ lawica bul do němskeho bowa transportowaše. Němska hraje dźensa wječor. Prěnju hru přećiwo Šotiskej bě wona „njerozsudnje“ wěsćiła.
