Wospjetne namócnosće pozdatnych lěwicarskich awtonomnych w Lipsku su Sakski krajny sejm wčera pohnuli, we wobłuku aktualneje debaty wo tym rěčeć – a to chětro kontrowersnje.
Drježdźany (SN/MkWj). Sakska chce přećiwo namócnym ekscesam pozdatnych lěwicarskich ekstremistow w Lipsku konsekwentnje zakročić. Tole je nutřkowny minister Drježdźanskim Markus Ulbig (CDU) wčera w krajnym sejmje připowědźił. „Sakska dyrbi na to reagować, a to ze wšěmi srědkami“, rjekny Ulbig, kiž bě jako posledni rěčnik w přewšo emocionalnej debaće před mikrofon stupił. Zdobom warnowaše wón před přehnatymi reakcijemi a před relatiwowanjom njeskutkow. Pozadk diskusije běchu najnowše randale w Lipsku. Tam bě něhdźe sto zdźěla zakuklenych ekstremistow twarjenja a policistow nadběhowało. Wot spočatka lěta su mjeztym sydom tajkich namócnych akcijow zličili. Policija ma skućićelow za lěwicarskich ekstremistow.
Bjezdźěłny? Čehodla njestanješ so to ze zaprajerjom? Nižozemski dźěłowy zarjad płaći bjezdźěłnym wukubłanje na „spirituelneho telefoniskeho poradźowarja“. Sydom bjezdźěłnym su za to dotal wotpowědne pjenjezy wupłaćili, kaž rěčnik zarjada nižozemskemu rozhłosej wobkrući. Priwatne předewzaće zajimcow za něhdźe tysac eurow nawuči, kak maja z kartow čitać abo dóńt čłowjeka w škleńčanej kuli spóznać. Tež reinkarnaciju – wožiwjenje zemrětych – tam poskićeja.
Na wšě 15 wosobow w jednym awće je policija při kontroli w Badensko-Württembergskej zwěsćiła. Dźesać dorosćenych a pjeć dźěći běchu po puću do Španiskeje, zo bychu tam na žnjach pomhali. Zastojnicy policije klučiki awta sćazachu, dokelž běchu 35lětneho šofera a jeho sobujěducych hižo dźeń do toho zadźerželi a jim dalejězbu zakazali.
Předewzaćeljo na wopyće
Čorna Pumpa (SN/ch). Na přeprošenje twarskeho předewzaća ASG Grodk je delegacija egyptowskich předewzaćelow, inwestorow, hospodarskich spěchowarjow a wuwiwarjow projektow industrijnišćo w Čornej Pumpje wopytała. Wosebje zajimowali su so egyptowscy fachowcy za tamniši management. Informacija, zo planuje zwjazkowe knježerstwo bórzomny kónc zmilinjenja brunicy, pak jich chětro zadźiwa. W Egyptowskej wšak planuja wjacore nowe brunicowe milinarnje twarić, trěbny knowhow maja tuchwilu z Indiskeje.
Łužiska Nysa renaturěrowana
Moskwa/Rom (dpa/SN). Po wjeršku G 7 minjeny kónc tydźenja je ruski prezident Wladimir Putin zhromadne dźěło ze skupinu wodźacych hospodarskich krajow wuzamknył. Ruska je najebać to zwólniwa k bilateralnym kontaktam z čłonskimi statami G 7, praji Putin na wopyće w Italskej. Něhdy bě Ruska z gremijom dźěłała a ze swojim alternatiwnym zhladowanjam dźěło G 7 přisporjała. Ukrainskeje krizy dla su Rusku loni z formata G 8 wuzamknyli.
Na zetkanju Putina z bamžom Franciskusom we Vatikanje je swjaty wótc Putina namołwił, aktiwnje so prócować wo měr a dodźeržeć Minšćanske dojednanja. Wažne po słowach bamža je, zo so fatalne humanitarne połoženje ukrainskeje ludnosće najspěšnišo skónči.
Njebjelčicy (MWa/SN). Čłonojo iniciatiwneje skupiny Serbski sejmik su so wčera w Njebjelčicach na doskónčny tekst wo zakonskich prawach Serbow za wutworjenje demokratiskeho parlamenta jako politiskeho zastupnistwa Serbow dojednali. Kaž rěčnik iniciatiwneje skupiny dr. Měrćin Wałda zdźěli, je dosć naćiskow předležało za próstwu wo zakonjedawske jednanje, wutworić ramikowe wuměnjenja za demokratisce legitimowane ludowe zastupnistwo serbskeho ludu. Přinošowali su k tomu mjez druhim rady ekspertow mjezynarodneho prawa a juristow. „Woni potwjerdźeja, zo njetrjebaja Serbja stajnje so zakitujo argumentować, zo su lud a zo maja prawa kaž kóždy druhi narod. Njetrjebaja so tuž demokratiskich wólbow bojeć“, dr. Wałda piše.