Namołwja k měrniwosći
Drježdźany (dpa/SN). Do jutřišeho cyłoeuropskeho akciskeho dnja antiislamskeho hibanja Pegida a jeho přećiwnikow je Drježdźanski policajski prezident Dieter Kroll wšitkich wobdźělenych k měrniwosći namołwjał. Hladajo na dźesaćitysacy wočakowanych demonstrantow dyrbjał sej kóždy wědomy być, zo je połoženje přewšo njewěste, rjekny Kroll wčera w sakskej stolicy. Wón apelowaše na wobě stronje, sej swobodu demonstrowanja wažić a ju přećiwo tym zakitować, kotřiž na demonstracije jězdźa, zo bychu namóc wukonjeli. „Měnju lěwicarskich kaž prawicarskich ekstremistow, kotřiž do swojich namócnych fantazijow měrniwych demonstrantow jako schow zakalkuluja“, wón rjekny.
We wobłuku europskeho akciskeho dnja „Twjerdźizna Europa“ planuje Pegida jutře, sobotu, w Drježdźanach wulkodemonstraciju. Policija wočakuje za Pegidu 15 000 wobdźělnikow a 10 000 přećiwnych demonstrantow. Tež w druhich europskich metropolach, kaž we Waršawje a Praze, chcedźa demonstrować.
To a tamne (05.02.16)
Slepa dowěra nawigaciskemu nastrojej je šoferej 40 tonow ćežkeho nakładneho awta tójšto mjerzanja wunjesła. Njedaloko sewjerorynsko-westfalskeho Hagena wón po wuskej lěsnej šćežce błudźeše, doniž tčacy njewosta. Při tym sej tež hišće dieselowy tank roztorha. Poprawom wšak chcyše do cyle hinašeho Hagena, kaž wón policistam rjekny. Z toho pak tak spěšnje ničo njebudźe: awto skóncowane, diesel w lěsnej pódźe, chłostanka a zličbowanka za rumowanje awta – to budźe drohe.
Čas je wotběžał: W Kaliforniskej njeje hrajer lota swoje dobyće 63 milionow dolarow wotewzał. To je najwjetše njewotewzate dobyće w stawiznach loterije zwjazkoweho stata USA, kaž sćelak NBC rozprawja. Pjenjezy maja so nětko na dobro šulow w kraju wužiwać. Los bu 8. awgusta 2015 kupjeny. Wčera wječor bě čas 180 dnjow čakanja na dobyćerja nimo.
Łužica (05.02.16)
Planuja poradźowanski centrum
Zhorjelc (dpa/ch/SN). W Zhorjelskim Senckenbergskim muzeju za přirodowědu nastanje cyłozwjazkowe dokumentaciske a poradźowanske stejnišćo za wjelka. Nowy centrum ma zamołwite krajne zarjady přichodnje kołowokoło wjelka poradźować, kaž zwjazkowe wobswětowe ministerstwo piše. Planowane je, zo so tam tež daty wo wjelkach po cyłej Němskej zběraja a wuhódnoća. Wo tym bě hižo Sächsische Zeitung rozprawjała. Wědomostnicy w měsće nad Nysu dóstanu potajkim nadawk, kóždežkuli wustupowanje wjelkow registrować. Přichodnu srjedu chce wobswětowe ministerstwo projekt w Berlinje předstajić. Wjelki su so po swojim wutupjenju před 150 lětami před něhdźe połdra lětdźesatkom zaso we Łužicy zadomjeć započeli a so nětko po cyłej Němskej rozšěrjeja.
Plan wudospołnjeny
Sankcije złahodnić
W prócowanju po polěpšenje poměra Němskeje k Ruskej před pozadkom wójny w Syriskej a krizy ćěkancow je wopyt Horsta Seehofera w Moskwje prěni krok do noweho směra.
Moskwa (dpa/K/SN). Bayerski ministerski prezident Horst Seehofer je składnostnje swojeho wopyta Moskwy za to wustupował, „w přewidnym času“ złaho- dnić sankcije přećiwo Ruskej. Činić měli to „z wjacorymi kročelemi abo z jednej kročelu“, rjekny nawodny politikar CSU krótko do swojeho wotlěta.
Steinmeier w Riadźe Syriskeje dla jednał
Sejm nadpady na žurnalistow zasudźa
Drježdźany (SN/MkWj). Sakski krajny sejm nadpady na žurnalistow raznje zasudźa. Na wčerawšej debaće su zastupnicy wšitkich frakcijow hanjenja, wohrožowanja a namóc přećiwo zastupnikam medijow wotpokazali. „Hranica je dawno překročena“, rjekny zapósłanča Lěwicy Kerstin Köditz. Skućićeljo z namocu jenož njehroža, ale ju mjeztym dawno hižo nałožuja – z pjasćemi, kamjenjemi, popjerjowym sprayjom abo pyrotechniku. Köditz naliči w tym zwisku za lěto 2015 cyłkownje 26 padow, hdźež buchu žurna- lisća nadběhowani. Třećina z toho sta so po jeje informacijach na demonstracijach antiislamskeho a přećiwo wukrajnikam měrjaceho so hibanja Pegida a jeho wotnožkow. „Hladajo na swobodu medijow je Sakska na niwow wuwićoweho kraja spadnyła“, Köditz zwurazni, dawajo knježerstwu sobuwinu. Wšako bě wone tele wuwiće přepozdźe spóznało.
Krućiše rjadowanja
Za wjace pomocy
To a tamne (04.02.16)
Wjace hač 10 000 eurow je sobudźěłaćer Erfurtskeho měšćanskeho zawoda namakał, jako wurumowaše kontejner za spěrawe wotpadki. „Pjenjezy słušeja staršemu porikej. Mandźelskaj běštaj stary čapor z bydlenja wurumować dałoj, dokelž ćehnjetaj k dźěćom do druheho města“, zdźěli wčera policija. Wobaj staj staršej hač 80 lět a„staj pjenjezy prawdźepodobnje zabyłoj“. 28lětnemu namakaćerjej přisteji nětko myto třoch procentow.
Ani dwě lěće stara holčka je a ma hižo njewšědnu wutrajnosć: 23 měsacow stara Kiara Belle Kit je w płuwarni w Malajziji nimale dwěsćě metrow płuwała a tak narodny rekord w swojej starobnej skupinje nastajiła. Holčka trjebaše za čaru 25 mjeńšin a 38 sekundow. Dotalny rekord bě 30 měsacow stara holca lěta 2003 nastajiła. Wona pak je tehdy jenož połsta metrow płuwajo zmištrowała.
Łužica (04.02.16)
Hišće swobodne městna
Grodk (ch/SN). W braniborskim měsće Grodku budu w nowym šulskim połlěće a wot přichodneje póndźele na hudźbnej a wuměłstwowej šuli wokrjesa Sprjewja-Nysa hišće někotre městna swobodne, předewšěm w předmjetach violoncello, klarineta a saksofon. Za dźěći je najlěpša staroba, wukubłanje zahajić, pjeć lět. Wězo smědźa tež dorosćeni swoje snano hižo kusk zasypane kmanosće z pomocu hudźbnych pedagogow wožiwić. Přeco póndźelu w 16 hodź. a štwórtk w 15.30 hodź. poskićeja stajnje 45 mjeńšin trajace probowe šulske hodźiny. Tež zajimcy za reje w starobje wosom do dźesać lět smědźa so póndźelu w 17.15 hodź. w hudźbnej šuli do rejwanskeje skupiny integrować dać.
Přejězdny wobchad zawrjeny
