Hładke dróhi su dźensa rano tež we Łužicy wjacore njezboža ...
Obdukuja wopory atentata w Němskej
Zhromadne nalěty
Ćišć na kanclerku přiběra
Wjacori zapósłancy frakcije CDU/CSU posrědkuja list Angeli Merkel
Berlin (dpa/SN). W uniji CDU/CSU so politice zwjazkoweje kanclerki Angele Merkel (CDU) ćěkancam napřećo přiběrajcy spjećuja. Přiwšěm nochcedźa kritikarjo z kanclerku wotewrjenu konfrontaciju.
Po informacijach powěsćernje dpa w Berlinje chcedźa wjacori čłonojo frakcije CDU/CSU w zwjazkowym sejmje list podpisać, w kotrymž swoje starosće hladajo na wuwiće migrantskeje krizy zwuraznjeja. Wobsah lista, kotryž ma Merkel spočatk přichodneho tydźenja docpěć, pak nochcedźa wozjewić. Spis je wuslědk zhromadnych rozmyslowanjow čłonow wšelakich dźěłowych skupin frakcije, kaž powěsćernja z internych kruhow zhoni.
Poprawom chcychu sej w lisće žadać, ćěkancow hižo na mjezy Němskeje wotpokazać. Tole je pječa najprjedy raz z blida. Nowina Bild bě rozprawjała, zo chcedźa kritikarjo Merkel wo tajkim žadanju na přichodnym posedźenju frakcije 26. januara wothłosować dać. Pječa 40 z cyłkownje 310 zapósłancow frakcije unije namjet dotal podpěruje.
To a tamne (15.01.16)
Globalne připóznaće za joggingowe cholowy žadaja sej iniciatorojo njewšědneje akcije: 21. januara, na mjezynarodnym dnju joggingowych cholowow, chcedźa tele ležerne wašnje drasćenja wšudźe prezentować. „International sweetpants day“ bě něhdy póstniska myslička štyrjoch šulerjow z awstriskeho Graza. Po jich informacijach so mjeztym statysacy ludźi w 50 krajach k tajkim cholowam wuznawaja. Tak chcedźa 21. januara demonstratiwnje w joggingowych cholowach na dźěło, do hosćenca abo na wosebite cholowowe partyje hić.
Dobreho jandźela pěstona měješe kóń w braniborskim Neubeerenje, jako wčera wosrjedź dróhi do nakładneho awta zrazy. Mjeztym zo so awto tak wobškodźi, zo njemóžeše hižo dale jěć, wosta štyrinohač hač na někotre módre blaki njezranjeny. Škoda na awće: 5 000 eurow.
Łužica (15.01.16)
Dźěło bjez mjezow počesćene
Niska (ch/SN). Gmejnu Vierkirchen njedaloko Niskeje su zhromadnje z čěskej a pólskej gmejnu z Mytom euroregiona wuznamjenili. Wšitke tři komuny dóstachu myto w kategoriji „najlěpše mjezy přesahowace zhromadne dźěło“. Tak organizuja tam na přikład kóždolětne zetkanja a zhromadne pućowanja. Za najlěpšu kooperaciju na kulturnym polu wuznamjenichu Spěchowanske towarstwo kulturneho města Zhorjelca/Zgorzelec a Dom kultury w Zgorzelecu z prěnim mytom, kaž zamołwići zdźěleja. Zamołwići wobeju městow běchu zhromadnu fotowu wustajeńcu „Po puću“ zarjadowali. Nimo toho dósta Hartmut Biele myto za swój angažement, polěpšić mjezy přesahowace styki.
VBH miliony inwestuja
„Njemóžeš w Němskej hižo swoje měnjenje rjec“
Budyšin (RLc/SN). Tule sadu praji pod přikleskom wčera wječor za stajnym blidom frakcije CDU Budyskeje měšćanskeje rady Jens Mirschinka. Wón je prawidłowny hósć na Drježdźanskej demonstraciji Pegidy a zastupowaše ju na podiju na z wjace hač sto ludźimi derje wobsadźenej žurli Budyskeje piwarnje. Ze stron zarjadowarja zdachu so nad tymle wothłosom překwapjeni być, přiwšěm je to nastupajo wobsadźenje podija dźiwnje skutkowało. K tomu so hodźi, zo njemějachu spočatnje žadyn mikrofon. Wobkedźbowar so praša, što su ze zarjadowanjom poprawom docpěć chcyli. To započa so ze statementom Jensa Mirschinki. Nichtó jeho njewotdźerža, swoje měnjenje rjec. Wšako kóždy w tymle kraju samsneho měnjenja kaž Mirschinka njeje. Na tónle rozdźěl móhło, ně, měło so skedźbnić. „Nochcemy pak tu dźensa tematisce dźěłać“, kaž moderator Tobias Schilling (CDU) přeco zaso wuzběhny.
Teror dale howri
Po Istanbulskim sebjemordarskim njeskutku njeje žadyn kónc terorowych atentatow. Dźensa je w Indoneskej a Turkowskej k dalšim nadpadam dóšło.
Jakarta/Ankara (dpa/K/SN). W centrumje indoneskeje stolicy Jakarty su ekstremisća granatu na policajsku staciju třělili, dalši rozbuch bě w bliskej kofejowni. Na to je k mócnej třěleńcy dóšło. Znajmjeńša sydom ludźi žiwjenje přisadźi. Mjez mortwymi su štyrjo atentatnicy. Tamni nadpadnicy su do bliskeho nakupnišća wućeknyli. Prezident Indoneskeje Joko Widodo mjenuje seriju rozbuchow terorowy nadpad. Situacija w kraju pak je pod kontrolu. Indoneska je kraj z najwjetšej muslimskej ludnosću. Něhdźe 90 procentow z 250 milionow wobydlerstwa su muslimojo. Po lěće 2000 ekstremisća přeco zaso atentaty skućeja. Tak zahiny lěta 2002 na wočerstwjenskej kupje Bali přez rozbuch wjace hač 200 ludźi, mjez nimi mnozy turisća.
Politikarjo k skutkam namołwjeni
Sudnistwo wupowědźenje zběhnyło
Drježdźany (SN/MkWj). Dźěłoprawniska zwada mjez něhdyšej wicešefinu biosferoweho rezerwata Hornjołužiska hola a haty a Swobodnym statom Sakskej bě wčera tema na krajnym dźěłowym sudnistwje w Drježdźanach. Skoržiła bě dr. Astrid Mrosko, po tym zo běchu jej loni w septembru hnydomne wupowědźenje přepodali, wumjetujo jej mjez druhim korupciju.
Što bě so stało? Dr. Mrosko, přirodowědnica a wobswětoškitarka, dźěłaše wot lěta 1994 w zarjadnistwje biosferoweho rezerwata w Stróži. Rezerwat je samo wot UNESCO jako škitahódny zastopnjowany.
