Hłubin duše so dótkał
Adwentny koncert 1. serbskeje kulturneje brigady znowa zahorjenje zbudźił
Wospjet wjeselachu so sobotu do třećeje adwentneje njedźele serbscy a němscy wopytowarjo w połnje wobsadźenej Michałskej cyrkwi w Budyšinje na adwentny koncert, kiž je wšeje česće a chwalby hódny. Cyrkwinski hudźbny direktor Friedemann Böhme zamó ze swojimi chowancami wosom čisłow koncerta tak předstajić, zo drje běchu wšitcy znowa wo wysokej spěwnej kulturje ćělesa, přesahacej powšitkowne naroki na šulski chór, přeswědčeni. Tež wostatni akterojo – dźěćacy chór gymnazija, Fabienne Wjacławkec jako spěwna solistka, kantorka Michałskeje wosady Yuko Ikeda na pišćelach a Gina Hentsch jako přewodźerka na klawěrje – běchu jara derje přihotowani.
Žadyn dźeń njewobžarowała
Borbora Felberowa, nowinska rěčnica Domowiny a wosobinska referentka jeje předsydy, poda so na wuměnk
Wona njebě nihdy přećelka wulkich słowow, a přiwšěm wě słowa wušiknje sadźeć a je samo do narěčow splesć. Ze swojim dźěłom njeje so nihdy hordźiła a móže přiwšěm na něštožkuli zdokonjane zhladować. Borbora Felberowa, nowinska rěčnica Domowiny a wosobinska referentka předsydy Dawida Statnika, so kónc 2019 po 16 lětach w zastojnstwje na wuměnk poda.
Wjele lět w cuzbje
Lěta 1956 w Komorowje pola Rakec jako Borbora Wuhlerjec rodźena wotrosće w serbskim staršiskim domje, chodźeše w Rakecach do šule a maturowaše na Serbskej rozšěrjenej wyšej šuli w Budyšinje. Přizamkny so wolontariat pola tehdyšeje Noweje doby a štyri lěta trajacy studij žurnalistiki, kotryž z diplomom zakónči. 1980 nawróći so do Łužicy a dósta bydlenje w Budyskim Serbskim domje. W redakciji Noweje doby bě štyri lěta wotrjadnica za nutřkownu politiku.
Z rěču wosebity sound tworić
Druhe a publikumowe myto němsko-francosko-pólskeho rockoweho a šansonoweho festiwala towarstwa Polonica je Lena Hauptmannojc lětsa srjedź nowembra w Kölnje dobyła. Wona bě tež hižo loni na delnjoserbskej schadźowance připosłucharjow w jazzowym duwje LeDazzo ze swójskimi kompozicijemi a ze serbskimi spěwami zahoriła.
Ofensiwa w Ardennach aliěrowane wójsko wohrozyła
16. hodownika 1944 zahaji němska Wehrmachta na zapadnej fronće w Ardennach mócnu napřećiwnu ofensiwu přećiwo ameriskemu a jendźelskemu wójsku. Ardenny su horiny na sewjeru wuchodofrancoskeje prowincy Elsaskeje a zapadnje Porynskich šćěpjelowych horin (Rheinisches Schiefergebirge) w Němskej. Wone rozpřestrěwaja so přewažnje w Belgiskej a Luxemburgskej. Po hórskej krajinje ćeče rěka Maas. Na sewjeru su Ardenny 200 do 300 metrow wysoke, na juhu něhdźe 450 metrow. W južnych Wysokich Ardennach je bahnojta krajina z wulkimi lěsami. Wjedro je po wšěch Ardennach jara krute, wosebje pak w zymskim počasu.
Nowy koncept za Łužiski festiwal
Lětsa prěni raz wotměty Łužiski festiwal chcedźa dale přewjedować. Dźěłowa skupina, w kotrejž stej Braniborska a Sakska paritetisce zastupjenej, wobzamkny njedawno dale wjeducy koncept, kotryž je wuměłstwowa přechodna přirada předpołožiła.
Drježdźany (SN/CoR). „Ze srědkow Zwjazka financowany Łužiski festiwal móže so z wažnej kulturnej institucije regiona stać. Za to njeje jenož trjeba akterow z Łužicy zapřijeć. Woni dyrbja tež woprawdźitu składnosć dóstać jón sobu wuhotować. Z wobzamknjenjom kraje přesahowaceje dźěłoweje skupiny je za to zakład połoženy“, podšmórny tele dny w Drježdźanach sakska ministerka za wědomosć a wuměłstwo dr. Eva -Maria Stange.
Hudźbnje po adwenće
Čorny Chołmc (SiR/SN). Čłonojo Čornochołmčanskeho nałožkoweho towarstwa Krabat pod nawodom Larsa Deki běchu njedźelu popołdnju zajimcow do tamnišeje Marineje cyrkwje přeprosyli. Na programje stejachu znate a mjenje znate adwentne a hodowne pěsnje, kotrež njepohnuwachu jenož k připosłuchanju, ale tež k sobuspěwanju. Wjac hač 70 ludźi bě přeprošenje sćěhowało. W cyrkwi su jich dwurěčnje němsce kaž tež serbsce witali. Farar Heinrich Koch wjeseleše so nad tradiciju adwentneho koncerta, z kotrymž spěwarki a spěwarjo chóra hižo wjacore lěta w Marinej cyrkwi hodownu powěsć hudźbnje posrědkuja, zo bychu přitomnych na pokojny čas nastajili.
„Rosujće, njebjesa, na zemju dele ...“
Budyšin (CRM/SN). Z adwentnym hymnusom „Rosujće, njebjesa, na zemju dele, a mróčele zdešćujće Sprawneho!“ zahaji chór 1. serbskeje kulturneje brigady sobotu do 3. adwentneje njedźele swój tradicionalny adwentny koncert pod nawodom cyrkwinskeho hudźbneho direktora Friedemanna Böhme w Budyskej Michałskej cyrkwi. Tónraz přidruži so brigadnikam dźěćacy chór gymnazija pod dirigatom wučerki hudźby Judith Škodźineje. Z wubranymi sadźbami naby program na wotměnje. Dalši zajimawy akcent staji kantorka Michałskeje wosady, Japanjanka Yuko Ikeda, ze swojej dosć swojotnej interpretaciju choraloweju wobdźěłanjow Johanna Sebastiana Bacha a pózdnjoromantiskeho komponista Sigfrida Karga-Elerta kaž tež z Bachowej popularnej „Tocattu a fugu w d-moll“.
Nowy akcent
We woběmaj Łužicomaj za serbstwo skutkował
Měto Pernak je njedźelu, 8. decembra, zemrěł. Zhubimy z nim Serba, kiž je so za swój lud mnohostronsce angažował. A činješe to z bywšeho Zapadneho Berlina, hdźež ze swójbu bydleše.
Wuzběhnyć ma so jeho 13 lět trajace skutkowanje jako předsyda Maśicy Serbskeje. Wón bě załoženje tohole serbskeho wědomostneho towarstwa w Delnjej Łužicy 1993 hłownje sobu nastorčił, kotrež hač do dźensnišeho serbske kulturne žiwjenje wobohaća. Wosebje wažne je jemu při sporym dźěle bě, zo jednory lud na wsach zaso přistup k swojim serbskim korjenjam namaka. Hromadźe z druhimi je wón wosobiny serbskeho kulturneho žiwjenja počesćił a jim tam, hdźež běchu so narodźili abo skutkowali, hódny pomnik stajił. Wuzběhnjenjahódne su pomnik za rěčewědnika Mjertyna Monja w Turnowje kaž tež wopominanskej tafli za molerja Fryca Latku w Nowej Wsy a za awtora prěnich ćišćanych serbskich knihow Albina Mollera w Tšupcu. Za to kaž tež za dalše aktiwity spožči Maćica/Maśica Serbska njeboćičkemu w lěće 2008 čestne čłonstwo. Lěto na to wuznamjenichu jeho z Mytom Ćišinskim.
Dalšej 1,2 milionaj eurow za kulturu
Kulturny konwent kulturneho ruma Hornja Łužica-Delnja Šleska je wčera na swojim lětušim poslednim posedźenju w Zhorjelcu dalše spěchowanje za klětu we wobjimje wjace hač 1,2 milionow eurow wobzamknył.
Zhorjelc (SN/CoR). Centralnej dypkaj na wčerawšim dnjowym porjedźe konwenta stej spěchowanskej lisćinje za kulturne projekty a inwestiwne naprawy institucijow w lěće 2020.
Tak chcedźa sydom institucijam dohromady 530 000 eurow přewostajić. Najwjace pjenjez z tróšku wjace hač 300 000 eurami zaplanuja za centralnej magacinaj Serbskeho muzeja Budyšin a Kamjenskeho Muzeja zapadneje Łužicy. Twarjenje na Budyskej Lubijskej budźe jako skład za wobě instituciji wuhotowany. Serbski ludowy ansambl dóstanje za nowostrukturowanje a wutwar notoweho archiwa něhdźe 50 000 eurow.
