Wo serbskich samozrozumliwosćach
Kěrlušeza dujerjow
Budyšin (SN). Serbski komponist Jan Cyž je zběrku dohromady 101 serbskeho kěrluša zestajał a za dujerske kwartety wobdźěłał. W nadawku Załožby za serbski lud stej partiturje nětko w dwěmaj wersijomaj wušłoj: jedna za dwě trompeće, tenorowy róh a tubu; tamna za dwě trompeće a dwě pozawnje.
Nimo toho je wušoł notowy material za kóždy jednotliwy instrument. Jan Cyž, kiž bě hižo před 18 lětami na nastork wosebje němskich hudźbnikow dujerskich ćělesow z tymle dźěłom započał, wěnuje zběrku swojimaj staršimaj. W Cyžec staršiskim domje w Časecach je so stajnje wjele hudźiło. Nan Beno Cyž, swój čas załožer a muzikant znateje dujerskeje kapały Credis, hraješe na saksofonje. Tež synaj Joachim a Jan běštaj hižo wot zažneho dźěćatstwa zahoritaj dujerjej. Zhromadnje wustupowachu jako swójbna kapała w zestawje trubka, klawěr, basowa gitara a saksofon na kwasach, na zawodnych swjedźenjach, kaž na domchowance prodrustwow, a k dalšim tehdy zwučenym składnosćam.
Pawlina Krawcowa
Załožba za serbski lud a župa Delnja Łužica stej zmóžniłoj, zo ...
Dźěćacy chór gymnazija zapřijaty
Po horcych septemberskich dnjach bliži so nětko nazyma a tak tež čas nazymskich koncertow. Nimo dweju, kotrejž běštej hižo w aprylu a juniju we Worklecach a Radworju, čaka na přećelow chóroweho spěwanja wot 8. oktobra hač do 15. nowembra dohromady dwanaće koncertow w Hornjej a Delnjej Łužicy.
Budyšin (SN/CoR). Nazymske koncerty słušeja k tym projektam, kotrež Załožba za serbski lud w swojej zamołwitosći přewjeduje – a tu wotběži wšitko po přećach ludźi. Zo tomu tak bě, je a tež wostanje, wo to stara so hižo wjele lět Marija Swierczekowa jako hłowna organizatorka. ,,Spytam to zarjadować, štož sej Domowinska skupina, wjesne towarstwo abo tež jednotliwcy na městnje přeja“, praji Chelnjanka. Druhdy to wězo tak lochko njeje. „W Chrósćicach chcedźa ludźo hižo dawno muski chór Delany słyšeć. Přihotowany bě koncert za 16. oktober. Dirigent Handrij Henčl, zdobom tenor w chórje Serbskeho ludoweho ansambla, je pak powołansce po puću. Dokelž njemóža Delenjo bjez dirigenta wustupić, dyrbjachmy nowy termin namakać, a to budźe nětko 30. oktober“, organizatorka rozłožuje.
Wo geografijina mjezach
Łódź/Budyšin (Łu/SN). Kóžde druhe lěto organizuje Łódźska uniwersita mjezynarodnu konferencu, kotraž wěnuje so politiskej geografiji „ludam na mjezach“. Wčera bě 40 wědomostnikow ze Słowjenskeje, z Ukrainy, Madźarskeje, Italskeje, Francoskeje a Pólskeje z hosćom Maćicy Serbskeje w Budyšinje. Prof. dr. Dietrich Šołta porěča jim na temu „Germania Slavica wčera a dźensa“, po tym zo bě jich Jurij Łušćanski, předsyda Maćicy, w Serbskim domje witał. Ekskursija wjedźeše hosći po starym měsće Budyšina, k pomnikej Cyrila a Metoda a do klóštra Marijineje hwězdy w Pančicach-Kukowje, hdźež jim farar Gerat Wornar wěcywustojnje rozprawješe. Na wosebite přeće pozastachu tež při Chróšćanskej šuli „Jurij Chěžka“, dokelž wědźachu wo spjećowanju přećiwo zawrjenju serbskeho kubłanišća před 15 lětami.
Wědomostnicy ze šěsć krajow schadźuja so we wsy Złotniki Lubańskie blisko mjezy, hdźež so z ekskursiju dale zaběraja, kaž prof. Krystian Heffner z Opolskeje uniwersity zwurazni.
Serbska drasta wustajena
Móžny spočatk pohłubšenja mjezsobnych stykow
Pohladaš-li na internetnu stronu Krajneje wědomostneje knihownje Liberec, napadnje ći hnydom foto z klankowym ćahom, předstajacym katolski serbski kwas. Wustajeńca wo katolskej narodnej drasće bu 8. septembra w přitomnosćei čěskich a serbskich hosći swjatočnje wotewrjena a je hač do kónca měsaca přistupna. Wona je zhromadny projekt měšćanskeho zarjadnistwa uniwersitneho města a Domowiny. Dokelž lěta 2000 wotewrjeny, architektonisce jara zajimawy dom na Rumjancevovej jenož centralnje njeleži, ale je zdobom wažne zetkanišćo kulturnje a wědomostnje zajimowanych wobydlerjow, bě wotwidźeć, zo nańdźe reprezentatiwna přehladka na galeriji nad hłownej čitarnju wjele zajimcow.
Hnujace stawizny našeje domizny
Časopis Łužiski almanach wěnuje so w lětušim wosebitym wudaću ćežkemu nowozapočatkej po Druhej swětowej wójnje we Łužicy. Cordula Ratajczakowa je so z wudawaćelom dr. Dieterom Rostowskim rozmołwjała.
Čehodla zaběraće so z powójnskimi lětami?
