Čitajće w nowym rozhledźe (31.03.23)
Z wobrazom „Swětłu napřećo“ Maria Ošiki, kotryž k tomu wabi sej časopis do rukow wzać, zahaji so aktualne wudaće Rozhlada. W nim wozjewi so přinošk „Korla Awgust Kocor – Wěrnosć a realita“ Měrka Šołty, kotryž je nastał na zakładźe přednoška lońšeho wědomostneho sympozija Maćicy Serbskeje składnostnje jubilejneho lěta 150. posmjertnin Handrija Zejlerja a 200. narodnin Korle Awgusta Kocora. W nim pokazuje awtor jónu wuznam bywšeho Ketličanskeho wučerja a kantora, kak je so do jeho twórbow zasahnyło a kak so jeho skutkowanje zdźěla hač do dźensnišeho chětro zwjeršnje a wopak hódnoći. Karoline Schneider pak zaběra so z kawrijowymi mušlemi, kajkež na konjacych gratach křižerjow wuhladamy. Wona wobswětluje, po kotrych pućach su so w zažnym srjedźowěku do Europy dóstali, jich wužiwanje, funkciju a woznam.
Wotrow we wosebitej wustajeńcy
„Tučne předwjeselo“
Skupina DeyziDoxs chce haperlejku comeback na jewišću swjećić
We wobłuku koncerta pod hesłom „Flächenbrand im Hinterland“ 1. apryla w Budyskim Kamjentnym domje chce skupina DeyziDoxs po dołhej přestawce comeback na jewišću swjećić. Karsten Richter je so ze spěwarjom ćělesa Danielom Bětnarjom rozmołwjał.
Danielo, kajki da je aktualny status DeyziDoxsow? Wšako bě w minjenej dekadźe njesměrnje ćicho wokoło Was. Wustupy wotměwaće mjeztym lědma hdy – a generelnje zda so serbska metalowa kowarnja, wothladajo wot Nukstock openaira, skerje nic wjace telko energije přetrjebać. Ma to wšitko něšto z klimowej krizu činić?
Hudźbne a kulinariske chłóšćenki z Pólskeje
Budyšin (SN/bn). Wot lěta 2005 wuhotujetej Serbski ludowy ansambl a Smochčanske kubłanišćo swj. Bena kóždolětnje „Hudźbny swjedźeń Smochćicy“. Na wječorach, kiž su tematisce na wěsty wuzwoleny kraj wusměrjene, předstaja orchester, chór a balet SLA twórby reprezentatiwnych komponistow woneho kraja. Zdobom zhonja wopytowarjo zajimawostki dokoławokoło tworjenja tychle wuměłcow.
Wjerški swjedźenja pak su „jeničce za tónle swjedźeń stworjene choreografije kaž tež spěwni solisća. Kulinarisce zapleńča so hosćo wot šefoweho kucharja kubłanišća, kotryž na woběmaj wječorkomaj za wony kraj typiske menije poskićuje. So stajnje prěni kónc tydźenja w juliju wotměwacy hudźbny swjedźeń zabjerje z tym krute městno we łužiskim kulturnym lěću a je pola mnohich hosći tež dla swojeho wulkotneho flaira na něhdyšej hrabinskej ležownosći Smochćicy jara woblubowany“, w nowinarskej zdźělence SLA rěka.
Smjerdźečanska rejwanska skupina přebywaše minjeny kónc tydźenja ...
Susodow na jewišću widźeć
Impresije dźiwadłoweje hry Bratrowstwa, z kotrejž budu lětsa po puću
Sulšecy (SN/MkWj). Na serbskich wjesnych žurlach předstaja lětsa nazymu nowu inscenaciju „Tónkróć něšto z niwowom“. Wo premjerje SN póndźelu rozprawjachu. Dźiwadłowa skupina Kulowskeho Bratrowstwa je swój najnowši kruch minjenu njedźelu na žurli Sulšečanskeho kulturneho domu předstajiła. Wopytowarjo w połnje wobsadźenej žurli dožiwichu wjeselohru w třoch jednanjach z mnohimi hrajerskimi a komediantiskimi wjerškami. Předłohu hry z pjera Andreasa Hecka je Rolf Hrjehor zeserbšćił. Róčnica 125 lět załoženja Bratrowstwa je dobra přičina, publikum z nowej hru zawjeselić. W komediji dźe wo dźiwadłowu skupinu, kotraž zwučuje. Ta bě sej při tutej składnosći „tónkróć pak něšto z niwowom“ nadźěłać chcyła, a tohodla je to tež titul dźiwadłoweje inscenacije. Do tajkeje hry wězo njedorozumjenja słušeja, nic naposledk dosć šmjatkow. So wě, zo dyrbi wšo swój dobry kónc měć, hewak njeby komedija była.
Za dźiwadłowym dorostom pytali
Dźěło z lajkami wjeselo wobradźa
Dołhi čas běchu Serbja Křesćanej Schröterej jeno znaći z literatury. Mjeztym z nimi jara wusko hromadźe dźěła a samo trochu serbsce rěči. Minjenu njedźelu je z dźiwadłowej skupinu Kulowskeho Bratrowstwa samo inscenaciju wuspěšnje k premierje wjedł.
Dny wuměłskeho rjemjesła
Budyšin (SN/MiP). Město Budyšin přeprošuje wšitkich wuměłskich rjemjeslnikow a designerow regiona, so k 10. europskim dnjam wuměłskeho rjemjesła (ETAK) přizjewić. Tute wotměja so lětsa wot 31. měrca hač do 2. apryla. Cil zarjadowanja je, zajimcam po cyłej Němskej twórby a produkty kaž tež dźěłarnje a ateljeje regionalnych kreatiwnych tworićelow předstajić. Jako multiplikatorojo su kulturne a zjawne zarjadnišća, kubłanišća kaž tež towarstwa a zwjazki sobu zapřijate. Tute su městnosće dźěłarnjow abo ateljejow, wustajeja wuměłstwowe rjemjeslniske wutwory, zarjaduja dźěłarnički, wodźenja a přednoški abo poskićuja wozjewjenje w interneće.
Kóždy wuměłski rjemjeslnik abo designer, kotryž chce so na ETAK wobdźělić, móže so pod: www.kunsthandwerkstage.de darmotnje registrować. Tu móže podać, hač chce so live w swojej dźěłarni abo wirtuelnje z internetnym wobchodom abo druhim digitalnym formatom prezentować. Přez interaktiwnu kartu namakaja wopytowarjo pod tutej adresu wšitkich regionalnych wustajerjow jara spěšnje.
Hudźbne slědźenje, intensiwne dźěło
Pod hesłom „LAB F“ je Serbski ludowy ansambl wot minjeneho pjatka do wčerawšeho druhu dźěłarničku tradicionalneje serbskeje ludoweje hudźby wuhotował. Prěni raz wotmě paralelnje tohorunja třidnjowski workshop „LAB C“ za nawod hudźbnych ćělesow.
