Wuspěšny sinfonisko-koncertowy debit Georgiosa Balatsinosa

Swój prěni sinfoniski koncert tuteje sezony wuhotowa Serbski ludowy ansambl štwórtk, 25. róžownika, w Němsko-serbskim ludowym dźiwadle w Budyšinje. Mjeztym je Georgios Balatsinos, w grjekskej stolicy Athen narodźeny a přede­wšěm w Němskej wukubłany a skutkowacy dirigent, kiž wukonja wot spočatka sezony 2022/2023 zastojnstwo šefdirigenta w serbskej kulturnej instituciji, tu wězo cyły rjad dirigatow přewzał, ale prěni raz steješe rjadny sinfoniski koncert na programje. Nowy šef orchestra je wšak renoměrowany fachowc swojeho předmjeta, tola běše napjatosć dosć wulka, što poskići so na tutym wječoru w Budyskim dźiwadle. A hlej, překwapjenka běše so poradźiła. Nimo wu­znamneje kompozicije sławneho němsko-židowskeho sinfonikarja Gustav Mahlera (1866–1911) a sinfoniskeje twórby něhdyšeho sobuzałožerja SLA a jeho prěnjeho chóroweho nawody Helmuta Fryče (1907–1944) poskići so kompozicija delnjołužiskeho komponista dr. Kurta Karnauke (1866–1944), kotraž wuwoła jako překwapjaca wurywanka wosebitu skedźbnosć.

Filmowy festiwal Nysa (NFF) wopřijima lěto wob lěto dźeń a wjetši podźěl temow, kotrež so ze žiwjenjom, myslenjom a začućom Serbow zaběraja. Při tym njehraja jeničce žiwjenske wašnje, tradicije a kultura rólu, ale tež rěč. A ta jewješe so we wšitkich třoch paskach, kotrež prezentowachu w sekciji „Regionalia“, na cyle swojorazne wašnje. Do rjadu słušeja produkcije, kotrež su w třikrajowym róžku nastali. Někotre su filmowcy, pochadźacy z regiona, nawjerćeli. Kónc zašłeho lěta bu nimale 30 namjetow zapodatych, a tuž bě jury rozsud ćežki, „kotre z produkcijow we wobłuku NFF předstajimy“, rjekny Patrick Weissig, čłon komisije za wuběr filmow. Mjez poskitkami běchu přewažnje krótke abo srjedźnje dołhe filmy. Naposledk pokazachu w rjedźe „Regionalia“ dźesać paskow, mjez druhim w Běłej Wodźe předstajeny „Mühlrose – ein Sonntag auf dem Mond“ z protagonistku Edit Pjenkowej kaž tež na festiwalu wuznamjenjenu čěsko-pólsku produkciju Piotra Jasińskeho „Wšitko w porjadku, běrny w rynkach“.

Pućowaca wustajeńca Serbskeho instituta „Swoboda kiwa! Serbja a mjeńšinowe prašenje po 1918“ je wotnětka hač do 8. awgusta w Kamjenskej Haninej cyrkwi přistupna. Postrowne słowa na wčerawšej wernisaži sposrědkowaštaj tamniši měšćanosta Roland Dantz (Swobodni wolerjo, naprawo) a wjednica Lessingoweho muzeja dr. Sylke Kaufmann. Stawiznar dr. Friedrich Pollack poda zawod do přehladki, kotruž bě zhromadnje z dr. Janu Piňosovej zestajał. Wo hudźbne wobrubjenje postara so organist Jan Brězan. Dotal bě wustajeńca hižo z hosćom w Budyskim Kamjentnym domje a w Choćebuskim Serbskim muzeju (SN rozprawjachu). Foto: Johannes Schwabe

Budyšin (SN/MiR). Nimale 5 000 zajimcow je sej we wobłuku lětušeho 20. filmoweho festiwala Nysa wot 23. do 28. meje wjace hač sto filmow w 23 hrajnišćach w Němskej, Pólskej a Čěskej wobhladało. W rjedźe „Regionalia“ běchu zašły pjatk w Budyskim Kamjentnym domje filmy pod hesłom „Serbske zwuki“ widźeć. Wjace hač 60 wopytowarjow su sej produkcije „Křižerki“, „Fragmenty“ kaž tež „Wěra“ ze serije „Kak klinči domizna?“ wobhladali. Po tym staj Paulina Liznarjec a Šćěpan Friedel na huslach a gitarje ze serbskimi štučkami ludźi překwapiłoj. Sobotu wječor přijachu najlěpši filmowcy w Zhorjelcu myta. Za najlěpši hrajny film, němskorěčnu produkciju „Alaska“, je Max Gleschinski skulpturu Nysowska ryba a pjenježne myto 10 000 eurow Sakskeho ministerstwa za wědomosć, kulturu a turizm přijał. Pólski přinošk Łukasza Kowalskeho „Lombard“ je kampanja „So geht sächsisch“ z 5 000 eurami za najlěpši dokumentarny film wuznamjeniła. Z wida publikuma je čěsko-pólska produkcija Piotra Jasińskeho „Wšitko w porjadku, běrny w rynkach“ była najlěpša. Myto za nju su Sakske Nowiny spožčili.