Z wudaća: štwórtk, 07 decembera 2017

Wjele škody načinili

Wojerecy. Po wšěm zdaću z prózdnymaj rukomaj woteńdźechu paduši, kotřiž běchu­ so w nocy na srjedu do wobchodneho twarjenja we Wojerecach zadobyli. Tam łamachu so do dweju praksow a kenclije, hdźež wšitke kamory a pisanske blida přepytachu. Do dalšeho běrowa so zadobyć pak so jim njeporadźi. Po prěnjej kontroli drje mějićeljo zwěsćichu, zo njeznaći ničo pokradnyli njejsu, za to pak nasta dohromady něhdźe 10 000 eurow wěcneje škody.

Worklecy. Serbska zakładna šula „Michał Hórnik“ přeprošuje wšitkich staršich, dźědow, wowki a dalšich zajimcow na tradicionalny adwentny koncert jutře, pjatk, we 18 hodź. do Worklečanskeje ćěłozwučowarnje. Z wjele lubosću a wosobinskim zasadźenjom su so šulerjo a wučerjo na tónle wjeršk w běhu šulskeho lěta přihotowali. Tuž so organizatorojo bohateho wopyta nadźijeja.

Za adwentničku so přizjewić

Chrósćicy. Lětuša adwentnička wuměnkarkow a wuměnkarjow Chróšćanskeje gmejny wotměje so štwórtk, 14. decembra w 15 hodź. w Chróšćanskej wjacezaměrowej hali. Při kofeju, wosušku a kulturnym programje wjesela so wjesnja­nosta a jeho sobudźěłaćerjo na rjane zhromadne popołdnjo z rentnarjemi. Orga­nizatoriskich přičin dla njech so zajimcy­ hač do 11. decembra na gmejnje (tel. 035796/96 210, email: ) přizjewja.

Planuja jězbu seniorow

Njebjelčicy (aha/SN). Na Lipowym puću njeposrědnje za Njebjelčanskim kěrchowom napadnje na lěwej stronje wulki štyristronski statok z nahladnym wulkim domom. Pjećdźesathektarske Majerec kubło bě druhe najwjetše we wsy a bu před 60 lětami zestatnjene. Po přewróće přeńdźe zamóženje znowa do rukow mjeztym w zapadźe bydlaceho wobsedźerja, kotryž kubło přiwuznym přepoda. Tola Körberec swójba je hižo wobhospodarić njemóžeše a kubło bjez polow předa. Na to so w minjenych 27 lětach wobsedźer dalšej razaj změni.

Gmejnskej radźe a wjesnjanosće Tomašej Čornakej (CDU) je zachowanje burskeje struktury wsy wažne. Wón sobu pomhaše, zo móžeše Julia Wroblewski ze swojimaj staršimaj z Čorneho Chołmca štyristronski statok a k tomu třištwórć hektara pódy kupić. Dalšu pódu by gmejna­ po potrjebje k wotnajenju přewo­stajiła.

Dokumenty digitalizować je wjac hač jenož skenować a fotografować

Digitalizacija błudźi po wšěch medijach. Telewizija, nowiny, rozhłós, najbóle pak načasne medije kaž internet a socialne syće wěnuja so tejle naročnej a wužadacej temje. Tež tak poměrnje suche wědomosće kaž kulturowěda, rěčespyt abo bibliotekarstwo njemóža so digitalizaciji hižo zawrěć. Zakoń časa kaza so z temu čim zašo, ćim lěpje rozestajeć. To su tež wědomostnicy Budyskeho Serbskeho instituta a jeho Choćebuskeje wotnožki spóznali a njewotpowěduja jenož na wědomostnym polu wužadanju digitalizacije.

HZ Łaz/Běły Chołmc

– ST Marijina hwězda 0:1 (0:0)

Zestawa hosći: Matik – Wróbl, Škoda, K. Pakoßnick, R. Hawš, Rab, Kuring, O. Hawš, Peschmann (88. Czapik), Eldor, J. Pakoßnick (79. Winkler)

We Łazu čakaše na chowancow trenarja Erwina Kleinmanna minjenu njedźelu dalši ćežki nadawk přećiwo třećemu tabulki. Njehladajo na to pak chcychu hosćo swoju seriju njeporaženych hrow podlěšić. To so ze snadnym a zasłuženym 1:0 tež poradźi. Spočatnje so wobaj cyłkaj w srjedźnym polu neutralizowa­štej. Potom pak hosćo ceptar přewzachu. W 12. min. bu Jakob Pakoßnick pósłany a suny bul wo centimetry nimo wrotow. Mjeńšinje pozdźišo smkony Ali Eldor bul do łaty. Jónu móžeše so wrotar Dawid Matik wuznamjenić, jako wón třělwu derje wotwobara (40.), dwě mjeńšinje pozdźišo přizemi bul na łaće.

Wokrjesna koparska liga, stafla I

Wachau – Ottendorf-Okrilla 1:1 (1:0)

Malešecy – Huska3:1 (2:0)

1. TSV Połčnica 13 51  :  12 34

2. Concordia Załom 13 29  : 15 32

3. Traktor Malešecy 14 40  : 19 31

4. TSV Wachau 14 32  : 8  30

5. ST Porchow 13 26  : 13 25

6. Horni kraj-Sprjewja II 14 43  : 26 22

7. FV Ottendorf-Okrilla 14 26  : 24 22

8. Arnsdorfske KT 14 25  : 23 21

HZ Wulke Ždźary

– SJ Chrósćicy II 3:4 (1:3)

Zestawa hosći: Matješk – Šiman, Mark, Wowčer, Liznar (89. Klimant), M. Zahrodnik, Bětnar, L. Zahrodnik, Bogusz (84. Šmit), Jakubaš (71. Budar), Dórnik

Po tym zo je sej Chróšćanska koparska rezerwa prěnje dobyće sezony přećiwo mustwu z Nadrózneje Hrabowki wudobyła, chcychu wězo dalše. Poslednje městno w tabulce wopušćić bě zdobom jasny nadawk trenarja Matijasa Dórnika.

Hra minjenu sobotu běše wurunana, wjace šansow wrota docpěć pak mějachu hosćo z Chrósćic. W 24. min. poradźi so Stefanej Liznarjej po dobrej kombinaciji bul k 0:1 přez wrotowu liniju sunyć. Po tym pak wustupowachu Chróšćenjo njekoncentrowani. W 35 min. móžeše so Keck přelochko přećiwo Měrćinej Jakubašej a Michałej Wowčerej přesadźić a wurunać. Hosćo pak so zhrabachu a mějachu dale dobre składnosće. Tak zwyši Matti Bětnar w 41. min. na 1:2 a Jan Bogusz w 44. min. na 1:3.