Z wudaća: štwórtk, 07 decembera 2017

Lubij/Budyšin (SN/at). Sakska CDU woli na zjězdźe sobotu w Lubiju noweho krajneho předsydu. Jako dotalny je ministerski prezident Stanisław Tilich Michaela Kretschmera ze Zhorjelca jako swojeho naslědnika namjetował. Po tuchwilnym stawje njeje dalša kandidatura znata.

„Dźe wo nowozapočatk w Sakskej“, potwjerdźi delegatka Petra Kockert z Kulowa swoje wočakowanja na zjězd. K tomu je krajne předsydstwo CDU namjet „Z wěstotu za Saksku“ zapodało, kotryž formuluje w dwanaće wotrězkach nadawki přichoda wot nutřkowneje wěstoty přez digitalizaciju hač k lěkarskemu zastaranju. Bywša Kamjenska krajna radźićelka nadźija so sprawneje diskusije.

Z krajnym zjězdom CDU sobotu w Lubiju chcedźa sakscy křesćanscy demokraća noweho krajneho předsydu wuzwolić a puć runać za změnu na čole sakskeho knježerstwa. Zajimawša hač tónle personalny rozsud pak budźe snano diskusija wo wodźacym namjeće krajneho předsydstwa „Z wěstotu za Saksku“. Po sobustawskich zhromadźiznach we wokrjesnych zwjazkach skići Lubijski zjězd platformu za to, njespokojacy wuslědk wólbow zwjazkoweho sejma w Sakskej z wida krajneje CDU analyzować a při tym nadźijomnje swójske zmylki přiznać. Wězo wotbłyšćuje wodźacy namjet konserwatiwny rukopis kruteho stata. Ale runje temy kaž wohnjowa wobora, spušćomne medicinske zastaranje a zastaranje w nuzowym padźe we wšěch kónčinach kraja abo socialna wěstota za kóždeho pokazuja na to, zo je powólbna­ sylna kritika bazy tudyšeje CDU swojeho adresata našła. Napjatosć tuž přiběra.­ Axel Arlt

Drježdźany (SN/at). Frakcija CDU w Sakskim krajnym sejmje ma časowje na pjeć lět wobmjezowanu móžnosć – nowym połnje dźěłacym wučerjam status zastojnika spožčić – za jednu naprawu, zo by powołanje wučerja w Sakskej zaso na atraktiwiće nabyło a swobodny stat nu­znje trěbnych pedagogow přistajić móhł. Kaž we wobzamknjenju frakcije na wčerawšim wosebitym wuradźowanju wo namjeće kultusoweho ministra Franka Haubitza (njestronjan) rěka, „wuznawa so frakcija k wotewrjenej diskusiji wo najlěpšim rozrisanju“.

K tomu dale słuša, wobstejacy tarifowy system wukmanjeć, zo njebychu tamnych pedagogow wróćo stajili. Frakcija CDU namołwi sakske knježerstwo, předpołožić hač do 31. januara 2018 praw­nisce a wobsahowje wothłosowany namjet, wo kotrymž móžetej knježerstwowej frakciji doskónčnje wuradźować a wothłosować.

Kultusowy minister Haubitz je rozsud frakcije CDU witał. Frakcija Lěwicy w sakskim sejmje wučerjow-zastojnikow dale wotpokazuje, bojo so grawěrowacych nowych njesprawnosćow.

Konferenca wo transformaciji Łužicy „po wuhlo“ nowe perspektiwy zmóžniła

Choćebuz (dku/SN). Braniborska techniska uniwersita Choćebuz-Zły Komorow (BTU), Załožba Rosy Luxemburg a Serbski institut běchu minjenu sobotu na konferencu wo transformaciji Łužicy „po wuhlu“ přeprosyli. Bě to hižo pjata na uniwersiće, rozestajaca so z aktualnymi towaršnostnymi temami a perspektiwami za Serbow rozestaješe.

Praha (dpa/SN). Nowy čěski ministerski prezident je dwělomny miliardar Andrej Babiš. Prezident Miloš Zeman je załožerja populistiskeje protestneje strony ANO wčera z ceremoniju na Hradčanach spřisahał. Po tym je Babiš iniciatiwu nastupajo migracisku politiku Europskeje unije připowědźił. Na čěskim „ně“ k rozdźělowanju ćěkancow po Europje chce wón wobstać.

63lětny Babiš chce mjeńšinowy kabinet wutworić. „Naše knježerstwo změje lěpšinu, zo je team a přećiwo korupciji wojuje“, rjekny rodźeny Słowak. Wote­wrjene je, kak chce sej dowěru zapósłancow zdobyć. Wobkedźbowarjo maja za móžne, zo komunistiska KSČM a prawicarskoradikalna SPD mjeńšinowe knježerstwo tolerujetej.

Nastupajo tolerowanje chce Babiš po swójskich słowach hišće do hód ze wšěmi frakcijemi rěčeć. Etablěrowane strony kaž konserwatiwni wobydlerscy demokraća (ODS) podpěru hłownje wotpokazuja, dokelž njejsu wumjetowanja policije Babišej subwenciskeho zjebanja dla z blida. Přepytowarjo su wo to prosyli, imunitu noweho premiera zběhnyć.

Słowjanska wzajomnosć w podobje zwiskow mjez Čechami, Serbami we Łužicy a Polakami w Šleskej bywaše we wšelkich časach zašłeho połdra lěttysaca njerědko haćena a stajnje zaso wobnowjena, měješe pak tež hač do njedawneje nětčišosće bjezkonturny raz. Wuzběhowanje swojoraznosće naroda w přitomnosći a dźiwajo na přichad migrantow móže so wobhladować jako wobaranje přećiwo straće tradicijow a za zachowanje europskeje a demokratiskeje zmyslenosće.

Před měsacom je wichor w Smjerdźacej škody zawostajił, tak zo běchu někotre statoki tři dny bjez miliny. Spočatk tydźenja buchu­ wobydlerjo znowa pruwowani, dokelž dyrbjachu bjez wody wuńć. Mjez Radlubinowej a Łučnym pućom bě so asbestowa roła z časa NDR puknyła. Ze swojej techniku sobudźełaćerjo EWAG městno namakachu a wuporjedźichu. Foto: Alfons Handrik

Ralbicy (SN/MWj). Zymske tydźenje a měsacy su tradicionelnje čas, hdyž we łužiskich lěsach hońtwy přewjeduja. Tajku mějachu minjenu sobotu w Ralbicach. W běhu dweju hodźin móžachu tam jednu sornu a sydom dźiwich swini třělić. Zamołwity Měrćin Krawc so hajnikam a přihonjerjam za dobru disciplinu dźakowaše. Runočasnje tež w Konjecach hońtwu přewjedźechu. Tam běchu sorna, dańk a pjeć dźiwich swini wuslědk hajnikow.

Zo móhła so struktura hornjołužiskich lěsow wot ryzy chójnoweho na měšany lěs přetworić, je trěbne, wobstatk dźiwiny regulować, zo by so škodam na štomikach zadźěwało, rjekny sobudźěłaćer hornjołužiskeho lěsnistwoweho wobwoda Cyril Šołta. Dokelž je to z wjele dźěłom hajnikow zwjazane, poskićuja nětko tež hajnikam bjez swójskeho rewěra dowolnosć, so na hońtwje w statnym lěsu aktiwnje wobdźěleć. Rewěry statneho lěsa su we wokolinje Běłeje Wody, Łaza, Njedźichowa a Wojerec. Zajimcy měli so najpozdźišo šěsć tydźenjow do zahajenja hońtwjerskeho lěta, potajkim 1. apryla 2018 w hornjołužiskim lěsnistwowym wobwodźe pod telefonowym čisłom 03591/216 109 přizjewić.

7.12.2017 – 13.12.2017 Budyski fil­mowy palast: Burg Schreckenstein: wšědnje 14:45 (nimo pó) | nj 12:30 Star Wars Double: srj 21:00 Mord im Orient Express: wšědnje 20:00 (nimo srj) | srj 19:30 | pj, so a srj 22:30 Paddington 2: wšědnje 14:30 (nimo pó) a 17:00 (nimo pó) | nj 12:15 Hexe Lilli rettet Weihnachten: wšědnje 15:00 (nimo pó) | nj 12:00 Coco – Lebendiger als das Leben w 3 D: wšědnje 14:00 (nimo pó) a 17:00 | nj 12:15 Justice League: wšědnje 19:30 (nimo pó a srj) Bad Moms 2: wšědnje 20:00 Fack ju Göhte 3: wšědnje 17:00 a 19:45 | pj a so 22:30 Thor: Tag der Entscheidung: wšědnje 17:15 | pj a so 22:00 Jigsaw: pj a so 22:30

Kino-ekstra: Kedi – Von Katzen und Menschen: pó 17:15 a 20:15

Wojerowski CineMotion: Star Wars Double: srj 21:15 Mord im Orient Express: wšědnje 20:15 | srj 17:15 Bo und der Weihnachtsstern: wšědnje 14:05 a 16:05 | so anj 12:05 Burg Schreckenstein: wšědnje 15:10 Coco – Lebendiger als das Leben w 3 D: wšědnje 19:45 Coco – Lebendiger als das Leben: wšědnje 14:35 a 17:15 | so a nj 12:00 Als der Weihnachts­mann: nj 13:00 Flatliners: wšědnje 19:30 (nimo srj) | srj 18:45 Paddington 2: wšědnje 14:45 a 17:10 | so a nj 12:30 Justice League: pj, so a srj 22:15 Bad Moms 2: wšědnje 18:00 | pj a so 22:20 | srj 22:30 Jigsaw: pj, so a srj 22:40 Hexe Lilli rettet Weihnachten: so 12:45 Thor: Tag der Entscheidung w 3 D: pj a so 22:00 Fack ju Göhte 3: wšědnje 17:20 (nimo srj) a 19:50

Měšćanscy radźićeljo njemóža so na „całtowy knefl“ dojednać

Budyšin (CK/SN). Tak mjenowany „całtowy knefl“ w Budyšinje najprjedy raz njezawjedu. Rozsud wo tym je měšćanska rada wotstorčiła. Hižo wjacore lěta so z tejle temu zaběraja. W oktobru stej frakciji FDP a CDU znowa pospytałoj, na parkowanišćach, za kotrež dyrbi so hewak płaćić, prěnje 30 mjeńšin darmotne parkowanje zmóžnić. Wikowarjo, kupcy, wobydlerjo a hosćo bychu to witali, w namjeće rěkaše. Radźićeljo wo tym nětko diskutowachu. „W Lubiju, Žitawje a dalšich městach całtowy knefl maja. Tón by tež za Budyšin derje był“, praji Mike Hauschild (FDP).