Pjatk 8. a 9.12. Adwentne wiki w klóštrje Marijinej hwězdźe w Pančicach-Kukowje
19:00 Wotewrjenje hodowneje wustajeńcy Budyskeho wuměłstwoweho towarstwa w galeriji Budissin
19:00 Hłowna zhromadźizna Kulowskeho Bratrowstwa na tamnišej žurli swj. Bosćana
Sobotu 9. do 11.12. Teschenske wiki na Wojerowskim staroměšćanskim torhošću
9. a 10.12. Wustajeńca Božich narodkow na žurli swj. Hilžbjety w Šěrachowje
Adwentne wiki w Kulowje
9:00 Mikławšowy halowy koparski turněr w Radworskej „Slaviji“
14:00 Adwentne wiki w Rakecach
14:00 Adwentne wiki a dźeń wotewrjenych duri w Kamjenskim centrumje seniorow Azurit
14:00 Mjezynarodna adwentnička w Budyskim Serbskim domje
14:30 Adwentne popołdnjo w Delnjowujězdźanskej radnicy
15:00 Ruski baletny festiwal Moskwa předstaji balet „Ćernjawka“ na hłownym jewišću Budyskeho NSLDź
17:30 Adwentny koncert w cyrkwi klóštra Marijineje hwězdy
19:00 Předstajenje NSLDź „Hodowna stawizna“ w Pančičansko-Kukowskej zakładnej šuli (ze simultanym přełožkom do němčiny)
19:30 Beneficny koncert skupiny PoŠtyrjoch pola Rynčec w Jaseńcy
Wulka ćěłozwučowanska show
Jednota Kamjenc wuhotuje njedźelu, 10. decembra, w sportowej hali Kamjenskeho Lessingoweho gymnazija dohodownu sportowu show, kotruž pokaza wotrjad ćěłozwučowanje. Započatk je w 14.30 hodź. z kofejpićom. Wot 15 hodź. do 17.30 hodź. tam sportuja.
Mikławšowa kopańca
Tradicionalny Mikławšowy halowy koparski turněr zarjaduje a wuhotuje ST 1922 Radwor jutře wot 9 hodź. w Radworskej „Slaviji“. Zakitowar pokala je cyłk chóra Meja.
Mikławšowy volleyball
Volleyballisća SJ Chrósćicy přewjedu póndźelu, 11. decembra, tradicionalny Mikławšowy volleyballowy turněr. Přeprošene mustwa zetkaja so we 18 hodź., hry započnu so poł hodźiny pozdźišo.
Kónctydźenska kopańca
8.12. 19:00 Budissa Budyšin
– Neugersdorf
9.12. 13:30 Rakečanske ST
– Sokoł Ralbicy/Hórki
(w Kamjencu)
9.12. 13:30 Energija Choćebuz
– TSG Neustrelitz
10.12. 11:30 SJ Chrósćicy II
– FSV Łuty
10.12. 13:00 Biskopicy (žony)
– Viktoria Berlin
10.12. 13:00 ST Marijina hwězda
– Natwar Němske Pazlicy
10.12. 13:30 ST Radwor
– ST Hnašecy-Dobruša
10.12. 13:30 ST Wjelećin
– Módro-běli Kulow
Blidotenis
9.12. 14:00 MSV Budyšin 04 III
– Viktoria Worklecy
9.12. 19:00 ST Horken Ketlicy
– Viktoria Worklecy
Volleyball
Hižo lětdźesatki je z tradiciju, zo přeproša gmejna Ralbicy-Róžant swojich wuměnkarjow na adwentničku do Šunowskeje Fabrikskeje hospody.
Šunow (aha/SN). Něhdźe 150 wuměnkarjow – žony starše hač 60 lět a mužojo starši hač 65 lět – je zawčerawšim na swoju adwentničku do Šunowa přichwatało. Woni sej wulce chwalachu, zo gmejna Ralbicy-Róžant kóžde lěto tak wulkomyslnje na staršu generaciju dźiwa.
83lětny Pawoł Rachel, sobu najstarši serbski hajnik, rjekny, zo jako rentnar přeprošenje na dohodowne zarjadowanje stajnje rady sćěhuje. „Lětuša adwentnička w tak lóštnej atmosferje mje wosebje wokřewja“, wón měnješe. Pódla njeho za blidom sedźeše Monika Hajnkowa jedna z najmłódšich w kruhu seniorow. „Sym prěni raz w tymle kruhu. Mam to za prawe hódnoćenje dźěła staršeje generacije.“
Wjesnjanosta Hubertus Ryćer (CDU) naliči a hódnoćeše najwšelakoriše aktiwity na dobro ludźi we wšěch wjesnych dźělach gmejny. Po jeho słowach je w gmejnje tuchwilu 1 711 wobydlerjow. W minjenych dwanaće měsacach je wosom wosobow zemrěło, w samsnym času so 16 dźěći narodźi.
Bóšicy (JK/SN). Poměrnje spěšnje běchu Bóščanscy radźićeljo zawčerawšim dnjowy porjad swojeho posedźenja wotdźěłali. Spočatnje podaštaj wjesnjanosta Stanij Ryćer (njestronjan) a Liliana Wetzko z Njeswačanskeho gmejnskeho zarjadnistwa rozprawu wo wobdźělenju gmejny na předewzaćach a towarstwach wokrjesa. Tajka rozprawa je kónc lěta trěbna, zo hodźeli so lěpšiny a nadawki gmejny z tajkich stykow posudźować. Wobdźělenje gmejny je so w lěće 2016 pozitiwnje na jeje financy wuskutkowało. Cyłkownje mějachu přidatne dochody 16 000 eurow. Mjez druhim ma komuna podźěl na ENSO a dalšich zastaranskich zawodach Budyskeho wokrjesa.
Chrósćicy. Lěto reformacije k wopomnjeću jeje 500. róčnicy w Němskej drje je oficialnje nimo. Wostawaja pak zajimawe historiske slědźenja, dopóznaća a publikacije. K tym je mjez druhim přinošował za biskopstwo Drježdźany-Mišno z wosebitej knihu a za dwurěčnu Łužicu z kapitlom w knize „Pjeć lětstotkow – Serbja a reformacija“ dr. Jens Buliš. W Chróšćanskej putniskej hospodźe přednošuje wón jutře, 9. hodownika, w 19.45 hodź. wo poměrje Serbow k reformaciji a wo łužiskich historiskich wosebitosćach. Wšitcy zajimcy su přeprošeni.
Wustaja rasowu pjeriznu
Delnja Hórka. Towarstwo plahowarjow rasoweje pjerizny 1878 Budyšin a wokolina přewjedźe jutře a njedźelu wulku přehladku rasoweje pjerizny w Delnjohórčanskej sportowni. Sobotu wot 9 do 17 a njedźelu wot 9 do 16 hodź. budźe něhdźe 400 pjeritych skoćatow w najwšelakorišich rasach a barbach widźeć.
Na adwentne wiki
Rakecy. Na terenje bywšeho Rakečanskeho kubła wotměja so jutře, sobotu, wot 14 hodź. adwentne wiki. Wo kulturne wobrubjenje staraja so mjez druhim zakładna šula, pěstowarnja a žónski chór.
Dnjowe dochody fuk
Wojerecy. Přez pódlanske durje bě so wčera rano njeznaty do Wojerowskeho hosćenca zadobył. Tam hrabny sej na tejce ležacu móšnju z dnjowymi dochodami a so zaso zhubi. 53lětny mějićel hosćenca trochuje škodu na 760 eurow.
Dohodowny a tuž chětro potajnosćiwy čas lěta je zahajeny. Wšudźe su rumpodichowe čapki widźeć, w mnohich městach a wsach wuhotuja nětkole adwentne wiki, hdźež móžemy so za hodownymi darami rozhladować, tu a tam nopašk horceho wina wupić, ale tež ze znatymi a přećelemi pobjesadować.
Na modowej přehladce Štefi Hanušoweje „Són z lódki“, kotruž mnozy spočatk nowembra na Budyskej nakupowanskej nocy Romantica před Serbskim domom dožiwichu, bě jako přewodna hudźba drum 'n' bass słyšeć. 21lětna Sofija Cyžec z Berlina steješe za měšenskim pultom a poskićeše balkanowu beatowu hudźbu, po kotrejž so modele na podesće pohibowachu. To so mnohim přihladowarjam lubješe, serbsku DJane dźě wšědnje njewidźiš. Poprawom scyła nic, dokelž nimo Sofije dotal žana druha w Serbach jako tajka znata njeje. W Berlinje bydlaca a tam studowaca mjenuje so z wuměłskim mjenom Ida Bux. „Někajki wosebity woznam drje to nima, skerje je to připadne mjeno ze znateje internetneje pytanskeje mašiny, kotrež derje klinči“, mi Sofija rozkładuje.
To so dźiwaš, kelko energije w tymle čłowjeku we wysokej starobje hišće tči. Zawčerawšim je serbski komponist Hinc Roj w Klětnjanskim hosćencu „Zum goldenen Tropfen“ 90. narodniny swjećił a gratulacije přiwuznych, přećelow, kolegow-komponistow, wjesnjanow a mnohich dalšich přijał. Wšitcy wupřachu jemu předewšěm strowotu. Ze sylnej wolu a energiju wšak so w Cymplu narodźeny jubilar hižo někotre lěta ćežkej chorosći wobara.
„Mocy dawa mi hudźba. Dyrbju komponować. To je moja nutřkowna ćěr a radosć“, wón rjeknje. A swoju radosć měješe wón tež 3. decembra na koncerće w Kunnersdorfje, na kotrymž zaklinča na jeho česć jeho twórba „Toccata za klawěr op. 15“.