Waršawa. Mjeztym wosmy króć su 1. měrca w Pólskej „narodny dźeń wopominanja njepowalnych wojakow“ swjećili. Na Waršawskim Naměsće Piłsudskeho zeńdźechu so prezident Andrzej Duda, ministerski prezident Mateusz Morawiecki a zakitowanski minister Mariusz Błaszczak, zo bychu při Rowje njeznateho wojaka wěncy a kwěćele połožili. Nowy swjatk bě njeboh prezident Lech Kaczyński swój čas hišće nastorčił.
Bratislava (SŽ/K/SN). Zatřělenaj nowinar-přepytowar Ján Kuciak a jeho slubjena Martina Kušnírová staj pohrjebanaj. Słowakska je wšak dale rozbudźena a nawodnym politikarjam wětřik mócnje mjezwoči duje, wuchadźacy z naležnych protestow ludnosće a razneje kritiki medijow.
Dokelž běštaj so w meji chcyłoj woženić, su woporaj jako nawoženju a njewjestu pochowali. 28lětny Ján Kuciak namaka posledni wotpočink w ródnej wsy Štiavniku na sewjerozapadźe kraja. Rekwiem swjećił je w přitomnosći wjace hač tysac žarowacych arcybiskop Bratislavy a předsyda Konferency słowakskich biskopow Stanislav Zvolenský. 24lětna přećelka nowinarja, studowana archeologowka Martina Kušnírová, je w swojej ródnej wsy Gregorovcach na wuchodźe Słowakskeje pochowana.
... sym přeswědčena, zo přitrjechja słowa, kotrež Johannej Wolfgangej Goethemu připisuja: „Dwoje měli dźěći wot swojich staršeju dóstać: korjenje a křidła.“
Korjenje pak dźěćo jeničce w swójbje njedóstawa, ale tež w kulturnej towaršnosći, do kotrejež je so narodźiło a w kotrejž wotrostuje: přez rěč, nałožki, pěsnje, stawizny. Jenož tón, kiž je derje zakorjenjeny, móže sebjewědomy, kedźbliwy a wotewrjeny do pluralneje towaršnosće skutkować, změje křidła a stanje so z wobohaćenjom za swoju wokolinu, za swój kraj a za našu Europu.
Wobšěrne mjeńšinowe prawa su znamjo žiweje, fungowaceje demokratije.
Podpisajće tež wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
Pjatk 9.3. 19:30 Literarno-hudźbny program Serbskeho ludoweho ansambla w Budyskej Röhrscheidtowej bašće „Moja archa Horni Hajnk“ z tekstami Jurja Brězana
Sobotu 10. a 11.3.
10:00 24. Wojerowske jutrowne wiki we Łužiskej hali (tohorunja njedźelu wot 10 hodź.)
11:00 Dźeń wotewrjenych duri we wjesnym šulskim domje w Bórku
12:00 Zapust w Nowej Wsy
13:00 Zapust w Radušu
14:00 Debjenje jutrownych jejkow w Dešnjanskim domizniskim muzeju
15:00 Přednošk w Muzeju Budyšin wo 2 500 družinach mjetelčkow
16:00 Kino w Budyskim Serbskim muzeju „Die rote Zora“
19:00 Wječork z irskej folkloru w Hodźijskim towarstwowym domje
19:00 Hłowna zhromadźizna Njeswačanskeho kulturneho a domizniskeho towarstwa na žurli wjesneho hosćenca
Njedźelu 11.3. 10:00 Jutrowne wiki w Drjowku
11:00 Wuměłcy wustupuja w Budyskim Dźiwadle na hrodźe na beneficnym programje za Małowjelkowski sawrierowy park
13:00 Zapust w Turnowje
15:00 8. swójbna schadźowanka w Chróšćanskej „Jednoće“
15:00 Irska hudźba a reje live na žurli Serbskeho ludoweho ansambla w Budyšinje (tež w 19.30 hodź.)
16:00 Předstajenje NSLDź „Ferkel, hunčo a prosetko“ w Budyskim Dźiwadle na hrodźe
njedźelu hornjoserbsce
11:00 Łužica tutón tydźeń, mjez druhim wo sokołskim volleyballowym turněrje
11:20 Pola, wulka woda a melioracija
11:45 Recensija noweje kriminalki „Módre buny“
12:00 Nabožne wusyłanje
(Hans-Friedrich Fischer)
po tym zbožopřeća
delnjoserbsce
12:30 Aktualny magacin, mjez druhim wo hłownej zhromadźiznje župy Delnja Łužica
13:00 20 lět projekt Witaj
13:30 Nabožne wusyłanje
(Dieter Schütt)
po tym zbožopřeća
Po dźěłarni so rozhladować
Pančicy-Kukow. Dźěłarnja za zbrašenych swj. Michała přeproša jutře, 10., a njedźelu, 11. měrca, do swojich rumnosćow w Pančicach-Kukowje. Wot 10 do 18 hodź. su zajimcy do domu witani, zo bychu so tež po hornčerni rozhladowali. Wodźenja su předwidźane.
Předstaja musical za dźěći
Choćebuz. Najnowša inscenacija Choćebuskeho dźěćaceho musicala rěka „Paradoxa und die zerbrochene Zeit“. Dyrdomdej za cyłu swójbu z jednorymi melodijemi a futuristiskimi kostimami pokazaja dźěći a młodostni jutře a njedźelu w 15 hodź. w Choćebuskim konserwatoriju. Dalše předstajenja budu 17. a 18. měrca kaž tež 24. a 25. měrca, tohorunja přeco w 15 hodź. w konserwatoriju.
Na čitanje ze zběrki „Mlóče“
Chrósćicy. Na čitanje z antologije „Mlóče“ wita LND njedźelu, 11. měrca, w 15 hodź. na Chróšćansku faru. Wudawaćelka Ingrid Juršikowa zběrku předstaji. Čitać budu z njeje Andrea Chěžcyna, Monika Dyrlichowa a Pětr Thiemann. Jurij Smoła z Wěteńcy zarjadowanje na akordeonje wobrubi.
Swójbne popołdnjo