Z wudaća: srjeda, 18 apryla 2018

Nócny spěwar je susodam w badensko-württembergskim Lörrachu dny dołho spar rubił, doniž njeje policija přijěła. Ludźo běchu zastojnikow wołali, dokelž 29lětny stajnje zaso w nócnych hodźinach swoje arije zanošowaše. Policisća na to pola spěwarja klinkachu a jemu do swědomja rěčachu. 29lětny hnydom přilubi, zo swoje nócne spěwanje přichodnje wostaji a dźěše spać.

Žónske koleso z motorom trawusyčawy wudospołnił je 37lětny w mecklenburgskim Groß Teetzlebenje. Policisća jeho zadźeržachu, jako runje nimo smaleše. „Tak je z kolesa motorizowane jězdźidło nastało, za kotrež nima muž ani jězbnu ani wužiwansku dowolnosć“, policija piše. Kolesowarjej dalejězbu zakazachu. Test zastojnikow měrješe spěšnoć 52 km/h. Kreatiwny muž dóstanje nětko skóržbu jězdźenja bjez dowolnosće dla.

Damaskus (dpa/SN). Fachowcy za chemiske brónje su dźensa w syriskim měsća Duma njedaloko stolicy Damaskusa za slědami pozdatneho nadpada z chemiskimi brónjemi pytać započeli. Dźewjeć mjezynarodnych specialistow Organizacije za zakaz chemiskich brónjow ­běchu wčera do Dumy dojěli. Spočatnje přepytowachu zhromadnje ze sobudźěłaćerjemi UNO wěstotne połoženje w měsće. Specialisća maja pruwować, hač bu tam dnja 7. apryla jědojty płun přećiwo ciwilnej ludnosći zasadźeny. Zapadne kraje su přeswědčene, zo je syriske knježerstwo za nadpad z jědojtym płunom zamołwite. USA, Wulka Britaniska a Francoska su mjeztym objekty w Syriskej z raketami nadpadnyli, byrnjež dotal dopokazy za to njepředleželi.

Podstupim (dpa/SN). Přistajeni zjawneje słužby Zwjazka a komunow dóstanu hač do měrca 2020 cyłkownje 7,5 procentow wjace mzdy. Na to su so dźěłarnistwa ­a dźěłodawarjo po tři dny trajacych jednanjach dźensa rano w Podstupimje dojednali. Nowe tarifowe zrěčenje płaći wróćo sahajo wot 1. měrca 30 měsacow. Přistajeni z niskej mzdu dóstanu jónkrótnu přiražku 250 eurow.

Cyłkowny paket woznamjenja za komuny přidatne wudawki 7,5 miliardow eurow, za Zwjazk 2,2 miliardźe. Po informacijach jednaćela Zwjazka, nutřkowneho ministra Horsta Seehofera (CSU) chcedźa tarifowe dojednanje tež pola zastojnikow nałožować.

Wostrowc hotuje so na koncert neonacijow a zdobom na měrowy swjedźeń

Zhorjelc (AK/SN). Planowany koncert prawicarjow přichodny kónc tydźenja a runočasnje planowany pisany měrowy swjedźeń wšelakich wobydlerskich a politiskich skupin we Wostrowcu stej Zhorjelskej policajskej direkciji wulke wužadanje. Tole je rěčnik direkcije na wčerawšej nowinarskej konferency w Zhorjelcu hišće raz potwjerdźił. Policija budźe z wjacorymi stotkami zastojnikow ze wšeje Němskeje prezentna, zo njeby k zražkam mjez prawicarjemi a přećiwnymi demonstrantami dóšło. Wočakuja wjace hač tysac wobdźělnikow z prawicarskeje sceny Němskeje kaž z cyłeje ­Čěskeje a Pólskeje. Prawicarjo chcedźa so pjatk zhromadźić, zo móhli sobotu koncert přewjesć. Policija prosy wo zrozumjenje za wobšěrne wěstotne naprawy. Při tym chcedźa zastojnicy tež z woby­dlerjemi do rozmołwy přińć.

Často so wo tym rěči, kak wažna je runje we wjesnej kónčinje fungowaca infrastruktura. Ale ludźom zmóžnić, zo móža we wsy nakupować, pjekarjej a rěznikej hić a sej snano samo hišće kwětki wobstarać, je wšo druhe hač samozrozumliwe. Do toho wobłuka słuša tež póšta. Něhdy mějachu w kóždej wjetšej wsy wobchod, kiž je tež tele posłužby poskićał. Wšědnje drje tam něšto wobstarać nimaš. Ale chceš-li pakćik wotedać, je rjenje, hdyž za to daloko jěć njetrjebaš. Bjez dźiwa, zo běchu w Njeswačidle přesłapjeni, jako tam optikarski wobchod z póštu zawrě, po tym, zo wón jenož dwě lěće wobsteješe. Ćim bóle so nětko wjesela, zo su so Budarjecy zmužili, tajkile róžk w swojim wobchodźe na terenje BHG zarjadować. Tež to je mały dźěl žiwjenskeje kwality wobydlerjow. Byrnjež to po zdaću maličkosć była, sej ludźo tajki angažement jara chwala. Marian Wjeńka

Praha (ČŽ/K/SN). Před dobrym tydźenjom hišće kónc nadźije na knježerstwowu koaliciju ANO-ČSSD a po zwrěšćenych jednanjach durje zaprasnjene, nadobo samsneje wěcy dla nowy pospyt. Po prošenju šła je, chcyjo nochcyjo, ANO, njedocpěwši žanych postupow z konstelaciju KAČM a SPD, namjetowanej wot prezidenta Miloša Zemana. Socialdemokraća su dialogej wo měrje přihłosować móhli, nadźijejo so, zapowědźene nutřkowne ministerstwo tola hišće dóstać.

Budyšin (CS/SN). Tradicionelne čitanje „Łužiske literarne dopołdnjo“ Němsko-Serbskeho ludoweho dźiwadła je so minjenu sobotu wuwzaćnje jako wječorne zarjadowanje wotměło. Z hosćom rjada bě žurnalist a spisowaćel Hans-Jörg Schmidt. Wot lěta 1990 je wón korespondent wjacorych němskich medijow w Praze – tež za Serbske Nowiny je wottam rozprawjał – a awtor mnohich knihow, kotrež Čěsku wobswětluja.

Z pomocu tak mjenowaneho hromakoweho pawka sej ratarske předewzaće na Horach pola Wojerec plahowanje a žně hromaka wolóža. Z tejle mašinu móža trěbnu foliju na hromakowych hrjadkach jednorišo zběhnyć a zaso skłasć. Za to staj tele dny Volker Wukasch a jeho kolega metalowe wobłuki připrawiłoj, na kotrychž folija leži. Foto: Ulrike Herzger

Woblubowane koncertnišćo na Kamjenskej Pastwinej horje njeje hižo najmłódše. Tam chcedźa nětko wuměnjenja za wuměłcow polěpšić, čehoždla změja tam twarnišćo.

Gmejnska rada Slepo staja dalše wuhibki za swój šulski kompleks

Slepo (AK/SN). Přichodny němsko-serbski šulski kompleks w Slepom ma wobsahowje kaž barbnje derje wothłosowane wonkowne a sportowe připrawy dóstać. K tomu wuznachu so radźićeljo Slepjanskeje gmejnskeje rady na swojim zašłym posedźenju. Jednohłósnje woni po intensiwnej diskusiji konceptej přihłosowachu. Zestajił bě jón inženjerski běrow Bauconzept Planungsgesellschaft mbH z Lichtensteina pola Šwikawy. Předwidźane su mjez druhim parkowanišća, kolesowe stejaki z třěšku, a přijězdy. K tomu słuša tež metalowa stela při zachodźe z dwurěčnym pomjenowanjom kubłanišća „Deutsch-sorbischer Schulkomplex. Serbsko-němski šulski kompleks“. Na njej ma tež serbska lipa widźomna być.

Robustne a wobstajne napřećo wjedru maja ławki na šulskim dworje być. „Sćěhujemy tak poručenja techniskeho wuběrka“, rozłoži inženjer za hladanje kra­jiny Robert Günther. Na sportowym arealu pod hołym njebjom nastanjetej kopanišćo z kumštnym trawnikom a běžnja z kumštnym pokładźenjom.