Z wudaća: srjeda, 18 apryla 2018

Zastojnikam so spřećiwjał

Kamjenc. Jězba 41lětneho wopiteho je so zawčerawšim wječor na Kamjenskim policajskim rewěrje skónčiła. Při kontroli zwěsćichu pola njeho 1,74 promilow alkohola w kreji. Jako chcychu zastojnicy jeho do chorownje k přepruwowanju kreje dowjezć, chcyše 34lětny sobujěducy tomu zadźěwać. Na to so tež wopity šofer přikazam policistow spřećiwješe. Tuž jeho sputachu a na policajski rewěr dowjezechu, hdźež smědźeše so wuspać.

Do zakładneje šule pohladnyć

Chrósćicy. Na „Dźeń zakładneje šule“ přeproša jutře, štwórtk, wot 17 do 19 hodź. do Chróšćanskeje zakładneje šule. Po programje w „Jednoće“, móža sej wopytowarjo kubłanišćo wobhladać a dóstanu dohlad do najwšelakorišich cyło­dnjowskich poskitkow.

Hońtwjerske drustwo přeproša

Ralbicy. Wšitkich wobsedźerjow polow, łukow a lěsow wokoło Ralbic přeproša Ralbičanske hońtwjerske drustwo na zhromadźiznu pjatk, 20. apryla, w 19.30 hodź. do tamnišeho sportoweho domu. Nimo wobzamknjenja hospodarskeho plana 2018/2019 póńdźe mjez druhim wo wotnajenje hońtwow. Kaž je hońtwjerske drustwo wobzamknyło, ­wupłaća do zhromadźizny wot 18 hodź. wobsedźerjam ležownosćow wotnajenski pjenjez za dobu 2016/2017.

Jako bu znate, zo optikarski wobchod na terenje BHG w Njeswačidle kónc januara 2018 zawru, njebě ludnosć runjewon zwjeselena. Nimo nawočow a pisanskeje potrjeby bě we wobchodźe mjenujcy tež wotnožka póšty zaměstnjena. Po jeničce dwěmaj lětomaj so młoda wobchodnica rozsudźi, do Rakec přećahnyć. Z tym bě Njeswačidło bjez póšty. Runje w dźensnišim času, hdyž bywa mnóstwo paketow wobstajnje wyše, bě to špatny signal wobydlerjam. Ludźo dźě pakćiki jenož njepřijimuja, ale je často zaso bjezpłatnje wróćo pósćelu.

Ćim bóle so wobydlerjo nětko wjesela, zo je so mandźelska Christiana Budarja, kotryž ma blidarstwo a wobchod za pčołarsku potrjebu na terenje BHG, rozsudźiła, póštowu wotnožku we wobchodźe sobu zaměstnić. Po tym, zo bě so za wažne dźěło wukubłać dała, posłužuje Beata Budarjowa nětko kupcow wšědnje popołdnju wot 14 do 17 hodź. a sobotu wot 9 do 11 hodź.

Dwěsćě lět łužiskich stawiznow w špihelu swětoweje politiki

Stawizny regiona, haj samo stawizny swójby wotbłyšćuja stajnje tež stawizny swěta. Spočatk měrca dožiwi kruch „Łužiske kwartěry abo Rus w pincy“ swoju prapremjeru na hłownym jewišću Němsko-Serbskeho ludoweho dźiwadła. Inscenacija saha wot Napoleoniskich wójnow hač do přitomnosće. Koło wosobow, kotrež hru njese, je přehladne. Wona wuńdźe z dźewjeć hrajerjemi. W srjedźišću steja swójba – mać, nan a dźowka –, potencielny serbski nawoženja a Rus kaž tež tři pódlanske aktery, kotrež wšelake róle hraja. Přihladowarjo sćěhuja wosobam w změnje časow a k prěčišćam stawiznow, kotrež zdobom jednotliwe akty postajeja: 1813/15, 1918, 1945, politiskemu přewrótej w Němskej a – w epilogu – přitomnosći.

Hudźbno-literarny wječor „Moja archa Horni Hajnk“ Serbskeho ludoweho ansambla dožiwi spočatk měrca swoju premjeru w Budyskej Röhrscheidtowej bašće. Pod titulom „Bratr štom a sotra škowronc“ bě SLA w minjenej hrajnej dobje podobny, nic pak identiski program z tekstami Jurja Brězana w němskej rěči pokazał. W lěću planuje ansambl předstajenje pod hołym njebjom w Hornim Hajnku.

Trio con moto – komorna wobsadka instrumentalistow SLA – wobrubi hudźbnje sceniske čitanje hrajerja Němsko-Serbskeho ludoweho dźiwadła Měrka Brankačka. Mjez tekstami ze zarjadowanju mjeno spožčaceje knihi Jurja Brězana wusahowachu wosebje stawiznički wo wušparanjach lyriskeho ja ze šeršenjemi, nócnym koncertowanju rjechtacych žabow a swójbje kołpjow, kotraž nowe haty za swój dorost pyta.

Brankačk interpretowaše swoje přinoški raz po wašnju rěčnika dokumentarneho filma, raz poetisce, stajnje powažliwje a přitulnje w duktusu. Waha mjez słowom a zynkom bě wuběrna, hdys ­a hdys napodobnichu hudźbnicy zwuki přirody, kotrež Brězan w swojich wobkedźbowanjach wopisuje.

DJK Módro-běli Kulow – ST 1922 Radwor 1:1 (0:0)

Zestawa hosći: Wróbl – Omran, Šěrak, Henke, Zähr, Wjeńka (81. Hančik), Zimmermann, Rachela (46. Bauer), Bejmak, Kurjat (90. Dawe), Schulze

Dohromady na dźewjeć wrotach bohata hra mjez Radworskimi a Kulowskimi koparjemi w prěnjej połseriji bě woprawdźity spektakl. Po zastatku 0:3 zwjertnychu Radworscy duel tehdy hišće na 4:3, kónčny wuslědk pak rěkaše 4:5 za Kulow. Zhubjene tři dypki chcychu chowancy Pětra Bejmaka minjenu sobotu zaso sobu domoj do Radworja wzać.

Tabulka po 2. hrajnym dnju

1. Pestalozzijowa

wyša šula Lubij   4  8  8:0

2. Serbski gymn. Budyšin  3  6  6:1

3. Powołanska šula

za zežiwjenje Budyšin 4  4   4:4

4. Wyša šula Malešecy 3  2   2:4

5. Wyša šula Wjazońca 2  0   0:4

6. Melanchthonowy gymnazij/

5. SŠ-eks Budyšin 4  0   1:8

Wučerjo-wolejbulisća Serbskeho gymnazija Budyšin (SGB) dobychu tež třeću hru 51. sezony wokrjesnych mišterstwow při wysokim saku, a to 2:1 ­pře­ćiwo kombinowanemu cyłkej ­Me­lanchthonowy gymnazij/5.SŠ-eks Budyšin.

Bjez štyrjoch nadběhowarjow dojědźechu sej pedagogojo Serbskeho gymnazija do Lubija, zo bychu na druhim hrajnym dnju swoju prědnju poziciju w tabulce zakitowali. Tak pobrachowachu z Ro­manom Grzybom, Maćijom Čižankom, Fran­zom Friedrichom a Damianom Boguszom zdobom sylni blokowarjo, štož je k změnje taktiki wjedło a so wězo na hrajne akcije při saku wuskutkowało.