Z wudaća: pjatk, 18 meje 2018

Wodorunje: 3 kónctydźenski domčk, 5 wjes pola Běłeje Wody, 6 bjez wobuća, 7 arabski emirat, 10 jědź ze syrym mjasom a jejom, 13 serbski awtor přitomnosće (Jurij), 14 poschod, 15 bratr Abela

Padorunje: 1 čink kuzłarja, 2 wosoba kwasa, 3 słódna, 4 susodny kraj, 8 słód, 9 grjekska stolica, 11 rybjacy tuk němsce, 12 jón dyrbiš­ kruty měć

W čěskim Rumburku spominaja jutře, sobotu, na 100. róčnicu tamnišeho zběžka wojakow kónc Prěnjeje swětoweje wójny. Zachować maja so dopomnjenki na prócowanja wo měr.

Rumburk (SN). W měšćanskim parku Rumburka njedaloko tamnišeje cyrkwje swj. Ławrjenca wotměje so jutře, 19. meje, w 15 hodź. wopominanske zarjadowanje, na kotrymž dopominaja na zběžk wojakow 1918. Tehdy so čěscy wojacy spjećowachu za awstrisko-madźarske wójsko wojować. Zběžk bu brutalnje poraženy. Dźesać młodych wojakow mócnarjo wotprawichu, mnohich dalšich pósłachu na frontu abo jich zajachu. Na tónle tragiski podawk w poslednim lěće Prěnjeje swětoweje wójny dopomina pomnik w měšćanskim parku.

Hosćićeljo Serbskeho ewangelskeho domizniskeho dnja so přihotuja

Bluń (AK/SN). Jědnaty Serbski ewangelski domizniski dźeń Wojerowskeho regiona budźe 17. junija w Blunju, a to w cyrkwi kaž tež w swjedźenskim stanje. „Tón kónc tydźenja wotměja Blunjenjo swój wjesny swjedźeń. Njedźela steji cyle w znamjenju serbskeho domizniskeho dnja“, podšmórnje farar Heinrich Koch, zastupowacy superintendent cyrkwinskeho kruha šleska Hornja Łužica. Nimo toho je wón čłon serbskeho ewangelskeho dźěłoweho kruha, kotryž domizniski dźeń přihotuje. Zapřijeći su Blunjanska wjesna rada, wosadna cyrkwinska rada, towarstwa, chóry a dalši.

Zaměr je wobdźělnikow we wěrje sylnić, hordosć na jich serbske korjenje we Wojerowskim regionje budźić a jim zmužitosć do přichoda posrědkować.

Pěskecy (SN). Kaž kóžde lěto swjatki wuhotuja w Pěskecach tež lětsa swój wjesny swjedźeń. Jutře, sobotu, wječor zahaja jón z oldyjowej party. Njedźelu wot 15 hodź. su předewšěm swójby na swjedźenišćo při sportnišću prošene, hdyž wotměje so tam dožiwjenski dźeń pod hesłom „Dźensa dźemy do lěsa“.

Zhromadnje z hajnikomaj Haraldom Petrickom a Benom Bukom móža sej dźěći a dorosćeni lěs z wida zwěriny wotkryć. Što wobkedźbuje hajnik ze swojeje łakańcy? Kak daloko móža lěsne zwěrjata skakać? Kak běha jeleń po lěsu, bjez toho zo by so z rohomaj w hałzach zapopadnył? Na tute prašenja a wjele dalšich dóstanu wopytowarjo wotmołwu. Wjeselić móža so woni na interaktiwne hry, při kotrychž zhonja wo wšědnym dnju ­a wšědnych wužadanjach zwěriny. Ekskursija traje něhdźe połdra hodźiny. Kuntworow a klěšćow dla měli so wobdźělnicy dołhe cholowy wobuć. Swójbny swjedźeń skići dale hrajny mobil, skakanski hród, kołojězby z wohnjowej woboru, kofej, tykanc, lód a dalše chłóšćenki.

Ćisk. Swój sedmy drastowy bal přewjedźe Ćišćanska rejwanska skupina sobotu, 26. meje, w tamnišim hosćencu „Zeleny wěnc“. Přeprošene su mjez druhim wjacore drastowe a rejwanske skupiny z Hornjeje a Delnjeje Łužicy. Kóždažkuli narodna drasta, wšojedne z kotreho regiona, je wulce witana, njeje pak wuměnjenje za wobdźělenje. K rejam hraja Łužiscy dujerscy muzikanća z Wjelceje. Wot 18 hodź. maja wopytowarjo přistup na žurlu, bal započnje so w 19 hodź. z tra­dicionalnej polonezu. Zastup płaći pjeć eurow. Blida rezerwować dać móža sej zajimcy pola Gabriele Linakoweje pod ­telefonowym čisłom 03571/ 913 358.

Za měrliwy swět

Kamjenc. Zetkanje za měr a prawa ludow wotměje so wutoru, 22. meje, w Kamjencu. Na zarjadowanje we 18 hodź. na Šulskim naměsće přeproša zapósłanča Sakskeho krajneho sejma Marion Junge (Lěwica). Tema budźetej přiběraca wojerska wonkowna politika a njezamołwite wobchadźenje zwjazkoweho knježerstwa z prawom ludow. Organizatorka woby­dlerjow Kamjenca namołwja, so aktiwnje za měrliwy swět zasadźeć a so na zarjadowanju wobdźělić.

Zahaja kupansku sezonu

Strašnje parkował

Ohorn. Njewšědne parkowanišćo wupytał je sej zawčerawšim rano 32lětny wodźer nakładneho awta na awtodróze A 4 blisko Ohorna. Dokelž běchu na parkowanišću Rödertal wšitke městna wobsadźene, wosta wón ze swojim jězdźidłom 200 metrow dale do směra na Drježdźany w nabóčnym pasmje stejo, zo móhł swoju předpisanu přestawku dodźeržeć. Wobsadka policajskeho awta šofera pozdźišo wubudźi, kazajo jemu, zo ma ­w Ohornje z awtodróhi jěć a tam Lkw wotstajić. Šofer drje změje nětko pokutu płaćić. Dokelž je wobchad na A 4 w minjenych dźesać lětach jara přiběrał, parkowanske městna mjez Drježdźanami a Zhorjelcom dawno wjace njedosahaja.

Zetkanje z koncertnej pianistku a solistku-improwizatorku Heidemarju Wiesnerec

Bart, w Malešanskej gmejnje, ze swojim hatom wosrjedź wsy, ewangelskej cyrkwju, rjanej nawsu, hrodowym parkom ze šulu a dwurěčnymi napisami we wopytowarju přijomny zaćišć zawostaja. Rjane zahrodki a hladane chěže přeradźeja, zo so něhdźe 400 wobydlerjow tu derje čuje. Kónc 19. lětstotka zliči profesor Arnošt Muka w Barće mjez te­hdy 513 wobydlerjemi 425 Serbow. W lěće 1956 bě jich hišće 54,6 procentow. Dźensa we wsy jenož horstka ludźi serbsce rěči.

Lětsa w nakładnistwje POP wušła kniha Benedikta Dyrlicha „Grüne Hasen dampfen ab“ je zběrka cyłkownje 28 krótkopowědančkow w němskej rěči. Nimale wšitke z nich zaběraja so na někajkežkuli wašnje ze serbstwom.