Z wudaća: srjeda, 14 nowembera 2018

Hory (mka/SN). Mjeztym hižo 38. běrnjacy bal su minjenu sobotu na Horach pola Wojerec woswjećili. Tójšto hosći ze wsy a wokoliny bě přišło, zo bychu zabawny wječor ze serbskej a słowjanskej dujerskej hudźbu kapały Horjany dožiwili. Po tym zo běchu w minjenymaj lětomaj přihoty na serbski kwas a kwas samy předstajili, běchu křćizna tema lětušeho běrnjaceho bala.

Nimo turbulentnych podawkow, ke kotrymž móže na křćiznach dóńć, spo­srědkowachu wopytowarjam wjele zajimaweho kołowokoło tohole swjedźenja, kiž słuša w žiwjenju kóždeje swójby sobu k najwažnišim podawkam. Hosćom předstajichu wotběh wosebiteho dnja w małych zahratych scenach. Nimo kmótow a kmótrow přińdźe pisana bobrija hosći do swjedźenskeho domu. Mjez nimi bě samo potomnik něhdy do Ameriki wupućowanych Serbow. Na Horach bydlacy lutki tohorunja njeskomdźichu, zo bychu wukřćenemu dźěsću gratulowali. To činjachu woni na jara žortne wašnje z dwójnej negaciju, kaž je to wot lutkow powšitkownje znate.

Přednošuje na hrodźe

Worklecy. Na přednošk kapłana dr. Jensa Buliša přeprošuje jutře, štwórtk, Worklečanske towarstwo kapałki Maćerje Božeje. Po kemšach we 18.30 hodź. porěči dr. Buliš na žurli hrodu wo temje „Serbja, jich kral a kónc monarchije“. K tomu zaspěwa Marek Rjelka, kiž chce serbske ody za sakskeho krala a jeho swójbu znowa předstajić. Wšitcy zajimcy wutrobnje do Worklec přeprošeni.

Swójby pućuja

Malešecy. Serbske koło „Budyski kraj“ a Rěčny centrum WITAJ přeprošujetej serbske swójby a dalšich zajimowanych na pućowanje podłu hatow wokoło Malešec. Něhdźe pjeć kilometrow dołhe pućowanje je wuraznje wotewrjene za swójby z Witaj-dźěćimi, zo móhli so wone serbsce rozmołwjeć. Zajimcy zetkaja so sobotu, 17. nowembra, w 14.30 hodź. na nawsy w Malešecach. Po puću chcedźa z dźěćimi hry hrać a sposrědkuja wobdźělnikam zajimawosće wo Malešanskich Serbach. Po nawróće poskića kofej a poprjančki.

Žonu mortwu namakali

Hodźij/Čornecy. Wot póndźele dopoł­dnja pytaše policija 58lětnu žonu z Hodźija. Wona bě rano z kolesom wotjěła a so hižo domoj njenawróćiła. Wjacore wobsadki policajskich awtow hač do nocy žonu pytachu. Při tym běštej tohorunja policajski psyk a helikopter zasadźenej. Hakle wčera rano wobydler žonu nježiwu w Čornecach namaka. Přiwołany nuzowy lěkar móžeše jenož hišće smjerć 58lětneje zwěsćić. Kriminalna policija nětko přepytuje, kak je Hodźijčanka zemrěła.

Roswitha Sprigade nimale 20 lět w „Kraju pjerachow“ skutkowała

Dźěćace dnjowe přebywanišćo „Kraj pje­ra­chow“ w Budyskej měšćanskej štwórći Strowotna studnja, w nošerstwje Budyskeho Dźěłaćerskeho dobroćelstwa (AWO) móže so pisane mjenować. To zwisuje z jeho wonkownym napohladom runje tak kaž z wulkej mnohotnosću dźěći. Wone pochadźeja ze wšelakich narodow a pěstuja zhromadne přećelstwo.

Serbska Strowotna studnja

FC Energija Choćebuz

– Sportowi přećeljo Lotte 2:2 (0:1)

Zestawa domjacych: Spahić – Weidlich, Schneider (74. Beazit), Matuwila, Holthaus, Kruse, de Freitas, Viteritti, Schlüter (55. Mamba), Rangelow (74. Geisler), Scheidhauer

Z docyła prěnim mocy měrjenjom ze Sportowymi přećelemi z Lotte njemóžeše a nochcyše trenar Claus Dieter Wollitz spokojom być. A to, dokelž njesteješe škit FC bjez zranjeneho Marca Steina wěsće. Při premjerje přećiwo Lotte w prěnim połčasu žane šansy za hosćićela nastali njeběchu. Na tamnej stronje pak reagowaše Fabian Holthaus w nuzy přećiwo Sina­nej Karweina w šěsnatce njelepje, tak zo Maximilian Oesterhelweg jědnatku do přestawki k 1:0 (44.) přetwori.

termin turněra: 2. měrc 2019

městnosć: Sportowa hala na Budyskim Třělnišću

čas: 8 do 16 hodź.

zarjadowar: Serbski Sokoł z.t.

wuhotowarjo: Sokoł Budyšin z.t., Škit Budyšin, Mustwo 1296

kontaktna e-mailowa adresa: serbski­

zaměr turněra: Pod sokołskim hesłom „Sportej a narodej – zdar!“ chcemy sport a lóštnu zabawu hajić. Zdobom chcemy styki mjez serbskimi wolejbulistkami a wolejbulistami a dalšimi sportowčemi a sportowcami skrućić a Serbski Sokoł dale popularizować.

přeprošene mustwa: Na turněr witane su mustwa dotalnych turněrow a nowačcy. Wolejbulowe cyłki z wukraja znowa njepřeprosymy. Kóždy wolejbulist/kóžda wolejbulistka, kotryž/kotraž so do jednoho mustwa zarjaduje, njech so w swójbje sportowcow derje čuje.