Z wudaća: wutora, 11 decembera 2018

Drježdźany (dpa/SN). Sakske knježerstwo dyrbi sej jasny wobraz přichoda stworić. To měni Drježdźanski politologa Hans Vorländer. Knježerstwo Michael Kretschmera (CDU) je drje w prěnim lěće skutkowanja rjad dawno trěbnych naprawow nastorčiło, přiwšěm „njetworja jednotliwe naprawy hišće cyłkowny wobraz. Pobrachuje wizija, hdźe chce Sakska za něhdźe dźesać lět stać“, praji Vorländer. Loni 13. decembra bu Michael Kretsch­mer za knježerstwoweho šefa w Sakskej wuzwoleny. Lěto po tym žněje wón tójšto chwalby, ale tež kritiku.

London/Berlin (dpa/SN). Britiska premierministerka Theresa May je so dźensa k rozmołwam wo wustupje Wulkeje Britaniskeje z Europskeje unije z nižozemskim knježerstwowym šefom Markom Ruttu a ze zwjazkowej kanclerku Angelu Merkel (CDU) zetkała. Do toho bě wona za dźensa wječor planowane wothłosowanje w britiskim parlamenće nastupajo z Brüsselom wujednane zrěčenje wo brexiće wotprajiła. Wšako bě wot­widźeć, zo w parlamenće žana wjetšina za nje była njeby.

Najwjetši zadźěwk w zrěčenju je tak mjenowany backstop, potajkim garantija, zo po brexiće žane nowe namjezne kontrole mjez britiskej Sewjernej Irskej a čłonom EU Irskej njenastanu. Hewak móhło być, zo přewinjena wobydlerska wójna znowa wudyri. Rjadowanje předwidźi, zo wostanje Wulka Britaniska jako cyłk tak dołho w europskej cłownej uniji, doniž njeje problem z nowym zrěčenjom rozrisany. Wčera wječor bě May w britiskim parlamenće hišće raz potwjerdźiła, zo chce dale za zrěčenje wojować.

Rozsudna faza klimoweje konferency w Katowicach so započała

Katowice (dpa/SN). Na druhe a rozsudne koło swětoweje klimoweje konferency w Pólskej je wčera tójšto knježerstwowych šefow a ministrow přichwatało, mjez nimi tež němska ministerka za wobswět Svenja Schulze (SPD). Wuradźowanja něhdźe 200 statow w Katowicach k zwoprawdźenju Pariskeho klimoweho zrěčenja maja po móžnosći hač do pjatka wotzamknjene być. Zaměr je nadrobna lisćina směrnicow, zo bychu plany za škit klimy jednotliwych statow přirunajomne a přepruwujomne byli. Nimo toho dźe wo dalše pjenježne přilubjenja wuwićowym krajam, kotrež tak a tak hižo pod wuskutkami woćoplenja zemje ćerpja.

Budyski wokrjes ma schwaleny etat za lěće 2019 a 2020. Fakt to, kotryž zasłuža sej respekt a připóznaće. Zarjadnistwo a čestnohamtscy wokrjesni radźićeljo běchu k tomu přinošowali, zo móžeše Budyski wokrjesny sejmik wčera dwójny etat wobzamknyć. Tajku zhromadnosć njeje jenož krajny rada Michael Harig jako pozitiwnu wuzběhnył. Runje tak česća sej wjacori předsydźa w sejmiku zastupjenych frakcijow dožiwjene zhromadne dźěło za jedyn zaměr. Štož zda so někotremužkuli wobydlerjej samozrozumliwosć być, wšak scyła tajka njeje. Hakle po dwěmaj měsacomaj etatoweje diskusije bě jasne, zo je Budyski wo­krjes wuspěšny. Inwesticiska rata něhdźe sydom procentow njeje w žanym druhim sakskim wokrjesu tajka wulka. Tež wo­krjesny wotedawk 32 procentow je jedyn z najnišich po cyłym swobodnym staće. Wuslědkaj to, na kotrejž móža tež woby­dlerjo hordźi być. A na to njeměli wosebje ći zabyć, kotřiž so rady na wulku politiku hórša. Axel Arlt

Zapósłanc CDU w Sakskim krajnym sejmje Alojs Mikławšk je wčera Ralbičansku pěsto­warnju wopytał. Tajke dohodowne wopyty wón wot lěta 2009 prawidłownje přewjeduje a poby mjeztym w 38 dźěćacych dnjowych přebywanišćach, kaž z jeho nowinskeje zdźělenki wuchadźa. Lětsa wopyta sydom tajkich zarjad­nišćow a je Ralbičanskim­ dźěćom jako překwapjenku poprjancowej chěžce a paslenskej kófraj sobu přinjesł. Na wopytach wobhonja so wón tež wo wšědnym dnju a wo pro­blemach w přebywanišćach. Z nawodnicu Jadwigu Nukowej (nalěwo) wobrěča wón tónkróć přechod dźěći do šule. Foto: Nancy Stelzner

Wito Meškank z Berlina wupraja so w zwisku z aktualnymi podawkami nastupajo politiku mjez wulkomocomaj USA a Ruskej ke komentarej: „Sami sej do kolena třělili“, kotryž wozjewichu Serbske Nowiny minjeny pjatk, 7. decembra:

Čitać komentary w Serbskich Nowinach na temy politiki Zwjazka a mje­zynarodnosće klinča mi přehusto, jako by so přenjesła propaganda a agitacija „wulkeho bratra“ z doby, jako­ dźensniši car z pistolu po Drježdźanach chodźeše a „njewotwisny wječornik za serbski lud“ Nowa doba rěkaše. Bohudźak pak sym žiwy we 28. lěće přisłušnosće našeho kraja k Europskej uniji a k wobaranskemu zhromadźenstwu sewjerneho Atlantika­.

Runje 30. nowembra zemrěty George Bush senior je w druhim lěće němskeje jednoty wozjewił, wotstronić nakrajne jadrowe rakety krótkeje zdalenosće, cofnyć­ taktiske jadrowe brónje z łódźow a pomjeńšić składy jadrowych bróni w Europje. Hižo měsacy do toho bu zrěčenje dospołnje zwoprawdźene.

Mału a wulku kupu Worklečanskeho kupoweho hata budźe přichodnje drjewjany móst zwjazować. Tak ma so znowa přistupna mała kupa z wočerstwjenišćom podłu Krabatoweje kolesowarskeje šćežki stać. Tele dny su dźěłaćerjo Wehnertec firmy z Hórkow fundamenty za nowy móst připrawili. Hišće do hód chce gmejna po informacijach wjesnjanosty Franca Bruska (CDU) móst z kranom stajić. Komuna bě jón w lěću ze Sprjejc (Spreewitz) darmotnje dóstała, jeničce transport dyrbješe sama zaručić. W zašłych tydźenjach su drjewjany móst hižo wobarbili. Foto: Feliks Haza

Wotrow (SN/MWj). Z wosebitym lětakom chce Wotrowska wjesna rada přichodnje na móžnosć skedźbnjeć, zo hodźa so na tamnišej starej šuli priwatne kaž tež dalše swjedźenje a zarjadowanja najwšelakorišeho razu přewjesć. Kaž wjesny předstejićer Měrko Pohonč rjekny, Wotrowčenjo rumnosć, w kotrejž je městno­ za hač do 60 ludźi, jara rady wužiwaja, předewšěm za swójbne swjedźenje abo za kofej po chowanjach. Poskitk­ pak móhł snano tež wobydlerjam z druhich wsow abo gmejnow za­jimawy być. Wuměnjenja su na Wotrowskej šuli jara přijomne. Tak su tam hakle loni nuzniki ponowili a k nim nowe durje zatwarili. Tež předrumnosć so nětko w nowej swětłej barbje prezentuje. Tam hodźi so na přikład derje bifej natwarić, hdyž je wulka rumnosć raz woprawdźe ze 60 wosobami połnje wobsadźena.

Swinjarnja (SN/MWj). Po wšěm zdaću hišće lětsa móhła postawa swj. Bosćana na kromje Swinjarnje wottam puć do restawrowanskeje dźěłarnje w Drježdźanach nastupić. To rjekny wjesnjanosta Markus Kreuz (CDU) na zašłym posedźenju gmejnskeje rady Pančicy-Kukow. Radźićeljo přepodachu nadawkaj za ponowjenje historiskeje postawy, kotraž pochadźa z lěta 1635. Tak ma předewzaće ze Zemic-Tumic postament za 7 000 eurow saněrować. Restawratorka z Drježdźan dósta nadawk, za 4 400 eurow postawu swjateho ponowić. Z woběmaj firmownikomaj chce so wjesnjanosta pjatk, 14. decembra, zetkać a sej z nimaj přichodne kroki na městnje dorěčeć. Jasne pak hižo nětko je, zo ma so postament pozběhnyć a na městnje ponowić. Postawu samu dowjezu porno tomu do Drježdźanskeje dźěłarnje a ju potom tam restawruja. Poprawom chcyše gmejna wobaj nadawkaj w jeničkim losu wupisać. Z tym pak delni pomnikoškitny zarjad wokrjesa přezjedny njebě.

Na posedźenju gmejnskeje rady Ralbicy-Róžant dobru bilancu sćahnyli

Nowoslicy (JK/SN). Skerje přerosćene komunalne lěto je gmejnska rada Ralbicy-Róžant na swojim zašłym posedźenju w Nowoslicach bilancowała. Na dobro wjesnjanow su drje něštožkuli docpěli, napjata hospodarska situacija w gmejnje kaž po cyłym zarjadniskim zwjazku Při Klóšterskej wodźe pak překmany přichod njewěšći. Ale znajmjeńša móža w Delanach z wobkrućenym etatom 2019 do noweho lěta hić.

Jako wuspěchi minjeneho lěta hódnoćeše wjesnanosta Hubertus Ryćer (CDU) tójšto ponowjenych a zwuporjedźanych dróhow w jednotliwych wsach kaž tež dobry zazběh planowanja nowotwara Ralbičanskeje pěstowarnje. Po dobrym puću su, přechodne rozrisanje pobrachowacych městnow w Smjerdźečanskim žłobiku hišće w decembru rozrisać. Nachwilne dlijenje bě zawinowane rozsuda wo­krjesa wohnjoškitnych naprawow dla. To je nětko po słowach wjesnjanosty rozrisane­ a přidatne městna budu hišće w decembru wužiwać móc.